هنا

[علي الميساني]

اشتاكَيتلك
ـــــــــــــــ
بينك وبيني الحجي ..
اشتاكيتلك ,
والدمع غيم بعيني بجي ..
واسألت نفسي وكلت ,
شجرة اعله رمح العطش
لشوكت اضل منتجي ..
عاتبني كلبي وطحت
لحضتها يمكن متت
ومدري انت مدري النفس
فجأة اعله ريتي فتت ..
وبس اشربت نسمتك شجرة عشك خضرت ..
غصن السهر من رحت
ثكلن عناكيده ..
والنوم سلة فرح
لاسأل عني واجه ولاكال ماريده ..
بُعدك مثل خنجرك
مايمشي الا وره الطعنات التفيده ..
الشيب اعله طولي مشه
ومن كد فشلتي كمت
كلت النهر لو مشه تكثر تجاعيده ..
بينك وبيني الحجي بغيرك ولا داعي ..
وبحبال صبر العمر ما شدن اشراعي ..
بس لجلك انا ابحرت
وابحور سبعه اعبرت
متحزم بريتي
ومي كصتي اشراعي ..
محتاج اسمعك شجن من حنجرة ناعي ..
ومحتاج اشوفك ترد ناي بحلك راعي ..
بينك وبيني الحجي
ماعندي بي غايه ..
بيه الصراحة طبع جن طبع المرايه ..
من اشمرت كذلتك
الليل كله انشمر بعيون الولايه ..
والشمس من شافتك لمت ضواهه ومشت
صعدت السابع سمه واتعلكت رايه ..
هنياله كلمن كضه
عمره بطرف شفتك يتمرجح حجايه ..
فهمني يمته ترد مو طالت الفركه ..
خطوة جدم فركتك كلش تعذب الكلب
وتغيضه وتحركه ..
هدت علي غيبتك
وانا بطرك صفنتي وبريتي اذا دورت
نفسين ماتلكه ..
جرحك البيه نزل يمكن شبرغمكه ..
مغرور كالوا ! كلت لا هذا مثل النخل
طال الجذع او كصر ينهاب من عثكه ..
وقررت كل الحجي اليوصلني ماصدكه ..
جي لن بعيني شفت !
الغيمه الاصلهه مطر بهداي تمشي تضل
واعله البحر والنهر لو مرت مدنكه ..
مي حبنه كلش سرح
يلتم سوه شما بلم شماتنه يفركه ..
جرحك البيه نزل يمكن شبر غمكه ..
فهمني يمته ترد مو طالت الفركه ..

[كرار الغراوي]

شكراً لك علاوي