هنا

[أســمر من الســـــودان]

خفقة أولي
أيه اقول غير يا حلات الدنيا بيكا يا إنسان
جملته حياتي بالوصل الزائد
والحنية والعرفان
وإكتست أيامي معاك ورود وزهور
وكبرت أحلامي الوردية
وأتبدلت أيامي أفراح وأعياد فرايحية
مابين همسة شوق وبسيمة عيدية
وأناديك يا أروع ريد من الله هدية
وأتوه معاك في رحلة أنسية
وأقول سمحة وخلاصية
وأناغم طرفها الوسنان
وأقول مياسة فاقت فريع البان
أخو زينة السمحات أنا
وبشوفِن في خاطري عيان وبيان
وتسلم الغندورة كرمة الحبان
اللي اللروح ملاز وأمان
وأمجد صنعة الرحمان
وأقول ضواية أضوى من قمحة
وأقول بحرا بالعفاف مغمور
حباب زولا سمح صورة
جوه الضلوع سمتو البديع محفور
مابين زهور وزهور بيتوقد شعاع النور
هيبة وصدق نية
وخفرا أضحى الحياء والطهر ليهو حصون وستور
وما بطولوا المراكبية
يا وداعة وإلفة وفي الجمال آية
وفي الحسن روعة
هتف خاطري ناجاك لهفة عيونك يا مها
جمالك فاطنة السمحة ورقتها
حكاوي حبوبة في الحجى
وهتف جواي دخيلك ياقمرة
فاضت شجوني وتعبت معاي كل الأكف الضارعة
جواي فنارك إحتفى
إنتي الوفاء وإنتي المحال المشتهى
كل البعاين في مداك .. أبداً ولا قط ما رآك
غير كل الجمال وهبوه ليك ما لي سواك
هتف جواي دخيلك يا كرنفال العفة والوسامة
رفقا فقد أتعبت عيني القسامة
ومُرالسجال بين عين وعين
رفقا بالنزق اللهيف .. فقد غضضتُ طرفي مستسمحا
وكتبتُكِ سماحا في الخافقين
ولازمتُ رؤاك عبر الخيال في كل حين
ولقيتك ملاك مكتوب على خدُ الأسيل
المنعة والطبع الرزين، وجمال ورقة متلازمين
خلاصة سماح أنوارُ أصفى من اللجين
وأرتسمتك في الخيال مخبوزة من انوار ودين
محفل رزانة وكون من حلاة
وجبينك الضواي براري
شوف عينىّ أمامو الشمس ذواية منسدلة
وجاثية مبهورة تحت رجلينك القمرة
وأشتعل جواي بضي شمعة
يا كوثر فراديس الجمال والهيبة والروعة
وناجيتك بطيب خاطر وحنية
يا حبيبة قلبي يا أشجى من غنوات فرايحية
وا فجعة الوِلِـه الشفيف لما تتفجر عواطفو
ويتخثر طبعو الرهيف .... ويبقى بحـرا ما لو قيف
قالت وين؟ وين وكيف
والله مشتاقة
شــوق مدامع الطرفه في عز الخريف
يا خفقة الزول الرهيف
لما يرحل للداني البعيد
وتبقى خطاهو خفقو
بردان والدنيا صيف
ملازمو خيالك ويعصى قطفو
ويتفصد النزق اللهيف
ويتفتق القلب الرهيف
حفقة ثانية :-
بريدك .. ويتمحق حرف الكلام
بين رجع الصدى والصدود
لا أستاذي يا غالي..
من جواي همت دمعة
وأتفصدت تاني مجامع الشجون لوعة
يا راح الروح والروح عليك في نزوح
وإدفقت غناوي البوح
وأستسلم الصادي العنيد وجموح
امام الرقة والروعة ..
شقاف القلب تتقّصَف
وسال سواد العيون دمعة
جفف دميعاتك الحزاينية
وتوب وأرجع واخلص النية
يا منحور على وضم السهاد
أمانة عليك ما الريد البِشُق
قلب الحنون غُـلب
بصبح ذكرى منسية
ما إنته بقيت بي الصد والحرمان موعود
فاض بيكا الشوق وللصبر معاكا حدود
قلت ليها الفيك دليك
معدن وسامتك يا أم خدود
شوق الشوق العانق بعضو
وإتجذر في قفا الخاطر
سماح زولا خفور وودود
ديمة راحل في خوابيكي وخيالك

وفجأة إنداحت غيمة الوجا الحراق
وصبح في لجج الأسى موؤد
وكيف يا سمحة ينطفى
شروق قمر العشاء الداداي
ويتسهد وليد العين
وتتمحق بحار الشوق
وفي مسامك بترمح رفة الزول
الحنون وودود
رسم منقوش في عمق الخاطر
وين وكيف؟ الرهيف الغائب عن عيونا
ومتين يعود
قلت ليها يا الرضية
تسلم القمرة الحفية
القليب عندك هدية
ولسه فاكرك
كون من رحابة اثيرية
وطلة ريانة وندية
وأنا آهة حراقة منسية
ورفة حِن شاشاي سرمدية
وشجون بي الحسرة مروية
وشتلة ريدة عطشانة
عند القيف أسيانة متكيه
وا غربة القلب النزق اللهيف
لما يرمح وينجرح قلبو الرهيف
يا بحراً بشيل عوامو عندالقيف
وين وكيف؟ يا حورية
يا رقيقة مسالمة ومهولة رضية
وين وكيف؟ الجوة في الأعماق مصفد
والقليب مكسور جريح
يا أهة مسقية بي رهق التباريح
ومشنقوة بين رفة القلب الحنون
ورقة الريد الصريح
عارفو قلبك حاسي بيا
وإنتي لسه بتهاتي بيا؟
وداري بي الحاصل عليا
آه لو تمور وتدفق الدمعة العصية
ما الحب الشفيف يا البنية
حتى لو كان في الثريا
ياكي القليب الرؤوم وبيدفق إنسانية
ولو بي مرادي قلبي الرهيف أتكيوه وأنحروا
وما بهم إيه يحصل عليا
وكيف أنحروا وأنتي فيهو
وأعيش في أسى وحرمان وأسية
وإنتي ناري وإنتي نوري
وياكي عمري الباقي ليا
وديعة خفورة ونِقية
إن قلته سمحة عليك شوية

أقابلك كيف وأسالمك كيف
عيان وبيان ولا خفقة وطيف
وأمتع عواطفي بي الدهشة
وأبوس أيديكي يا الملكة
وأخفض طرفي في لمحة
وفي جواي اهتف وأقول سمحة
رهيبه ومهابة
حنينة هيابة
ووقوره جذابه

ولما تناغم وين وكيف
أهيم وأتلقاها بي لهفة
وأقول وين وكيف؟
شيشك قليبي رهيف
حنون وعفيف

خفقة ثالثة:-
وين وكيف؟ وا لهفتي وا لهفتك
والجرح العميق لابيندمل ولا بيترتق
القك حياك توبك عفافك وروضتك
وين وكيف؟ في مرافي الأسى

مستني الحظ يحالفني لحظة رضاكي وأوبتك
وأهتف أقول بحبك وتزرف دمعتك
رائعة وحفية ما أعذبك ما أروعك
خفقة رابعة:
خفيفة روح ومتل البانة منقمسة
تمس الروح تدوب فيها
تطول الآهة تشفيها
عقلك غلاك وميزانك
العفاف والرقة عنوانك
يا ملاذ الروح غلبني أدوزن ألحانك
وأنا إنسانك وسحر بياني من خفاقانك
طولت بالك وفيض أنسانك
قلبي فضحني قال الكلمة
أوفي حنانو وجنه جنانك

يا أحلى وأندى حروف في جوايا مخفية
وإنسانيتك والحنية
الجوه القلب شايلاني وفا وإخلاص وحنية
سودانية ميه المية


خفقة ليست بالأخيرة
إكسير الدواخل الجميلة
يا زينة بنات حواء ويا فخر للأوطان
أول مرة في التاريخ ألآقي ملاك ف شكل أنسان
وأتوه أتوه وأرجع أمجد الرحمان
كار أجدادنا ما مشريه من دكان
أشد أوتاري وأغنيلك
واقول مياسة فاقت البان
وأدفق وأدفق أحاكي بلابل الأغصان
يدُقّ قلبي ويفيض حني
وألاقيك في جوايا
نخلة باسقة الأغصان
ويزيد القلب في الخفقان
وإلازمك في الخطي
وأشيلك في الجبين عنوان
وأمجد فيك صدي الأوطان
وأقول سمحة وأناغم طرفك الوسنان
وأدق سدري وأقول للدنيا كل الدنيا
بحبك إنتي يا عظيمة الشان
حبيبت قلبي يا سودانية
ياعقل متفتح
ياقليب بفيض تحنان وإنساينة

أســمر الســــــودان

[ابو العبدالله المبارك]

سلمت يداك

[warda]

شكرا لك اخي

جميل ما قدمت
دمت بخير

[ود امدر]

يسلمووووووووووووووو
اسمر الورد فاح عبيره
فانتشينا حلاوة وطلاوة
لك منى التحية توأمى الرائع
فيض حبى
يحفظك الله

[أســمر من الســـــودان]

سلمت يداك

مرحب أخي أبو الـعبـــــــــــد الله ..
مـرحب ..
وألف أهلا وسـهلا
نحن شـراكاء في المحبة لهذا القامة الرائع والرائــد

الشــاعر العظـيم عــبد الــوهـاب البــياتـي ..
فهـو يكتـــنا جــميعـاً
كلنا في الهـم شــرقُ ..
ضد التشظي والتفرقة
لأمــة واحــدة تعشق الوطن والتراث ..
وكل ما خلفه لـنا الآجــداد مـن إرث تاريخي عظــيم ..
ولكن يا خـســارة
سـطى علــيه أدعيــاء التلمـود ســارقي ..
أجمل ما في أرث حضارات العالم - على عينك يا تاجـر - ..
دم ودامت عـراق الملاينن الآحـرار ..
عراق الجمال والحضارة والتاريخ ..
رضي العـزال وأعوانهم أم أبوا ..
وغدا سـيأتي الـذي قيل لنا لن يأتــي ..
ولكن غضبة الشــعوب ..
وإرداتها لن تعلب
بل سـتكون لها الغلبة
ولو بعد حــين ..
وذاكرة الشـعوب لا يسـتطيع كأئنا من كان أن يمحــوها ..

لك حبي وتقــدير وجليل إحــترام

أســــــــــمـر الـســــــــــودان

[خواطر~]

رفقا بالنزق اللهيف .. فقد غضضتُ طرفي مستسمحا
وكتبتُكِ سماحا في الخافقين
ولازمتُ رؤاك عبر الخيال في كل حين
ولقيتك ملاك مكتوب على خدُ الأسيل

أهلاً بك أيها السوداني
وبحرفك الأنقى
لك كل الاحترام وفائق التقدير

[الملاذ الاخير]

شكراً ع الطرح المميز اسمر

[المرقب]

دوما أقول

ان في السودان من الروعة مايشد العقول ويمتع النفوس

لاتحرمنا وجودك اخي ودمت رائعا