أســــــــــــمــر الــســــــــودان
تـغــريــدة مــن الأعــمــاق
يا نثيث الروح
أخاف العمر يغدر بي وأخاف الحسرة تغمرني
وأخاف الدمع يشرقني قبل أكحل فيكي شوق عينيَّ
بعيد أنا وروحي معاكي في الخاطر
يا بعيدة ودانية لهفانة بي رقراق الخفقة بتشاور
بعيد أنا وفي جواكي زي طفلاً تتاتيهـو ويشاور
يناغم فيك هل صحيح الشمس بتساهر
تمد حلمات شوقها للعطشان عشان النجمة ترضع ضـو
واحات الريدة يا إنته بجـيك باكر
بجيك باكر .. بجيك باكر
أوعك تخلف الميعاد تبكيني أصلي بخاف الحظ يعاثرني
قبلما أفرد الروح جناح ومعاك تفيض بحار حني
وأضمك جوه في خافقي واسقيك سلاف ا لريد وترويني
وأشيلك يُـمه في حباب عينيَّ وأسعد بيك وتسـعدي بي
والروح تخاصر الروح ونحمد الحي
ونحمد الحي الرفع السِِماك بعيد يحدق فيك
ويتشهق يدوب بالمرة في عينيك
عشان عينيك فيها الريد وحنان بلدا موسم فيك
وريدا قلبا لو جَمع حنان الدنيا كلو ما بوفيك
عشان سماح لحظة بكل عفوية أمنتيها للبرضيك
وبكل جسارة خبيتيهو في عينيك
وعطرتي بسلاف الروح ووسدتي لحاف الضي
بعيدة إنتي وأه يومه منك حي
بعيد أنا .. وفال السـُعدِ شاور لي وبقت الشمس بشوفها قريبة تغرود لي
حنان وملاز وحضن أمان حرير يتخدر منو الحرير هيمان
لمستو إتكهربَنْ إيديا خدرة أعضايا وتعب قلبي زاد في الخفقان
ضحوكا وبتتوجد .. قليب أبيض
وتتوقد درة وهـيبة كرمة ضي ومتين يا ضي تطول عينيَّ
يجهرني سفيرك الحاني ويهود بي وأتقرى حرير أيديكي كأنو بين إيدي
على الأمل بشِِّد الساعد تتوه روحي ومعاكي هناك تغيب عني
وأفر كفيِّ وأمد إيدي يا منان تسهل لي
وأشوف الُشوفتو بي الدنيا وأسعد معاهو ويسعد بي
رد مع اقتباس
المشاركة الأصلية كتبت بواسطة عنوان لجروح
