الله يساعدك ....... يامجلس النواب
الله يساعدك ....... يامجلس النواب
عكرنه مزاجك .......بينه ضنك خاب
سويت العليك .......وبارك الله بيك
كلمن كال عنك قصرت ......جذاب
كل هل مده حاير بينه......واحنه نلوم
غشمه وعل سياسه نكول لعب جعاب
تأخير الحكومه تأخر.........شجم يوم
كمنه انصرح ..ونستنكر....... ونغتاب
هنه اشجم شهر . واحنه كلبنه الكون
مانعرف المغزه ........ونجهل الأسباب
لو بس افتهم ...هذا الشعب شيريد؟؟
ميعجبه العجب ما يقتنع ....من عاب
واذا ماكو شغل..... لا كهربا... لا ماي
وشنو يعني ...افترض جرح الوطن ماطاب
واذا ماكو آمان ........وناس تاكل ناس
وعله الكرسي اتكاتل كامت الأحزاب
واذا كل لحظه عبوه ابكل دقيقه احزام
وكل يوم اليمر ..... تمطر الدنيه اركاب
واذا تحت الفقر ...نص العراق ايعيش
ودستور انتهك ...... والحكم حكم الغاب
واذا رد الخطف ....والقتل ..والتسليب
ورجع اقوه امن الاول ....بعبع الأرهاب
دفع الضرر .....واجب هذا حكم الدين
من استشرعوا...... حجاجنه النواب
خافوا ريح صفره اتهب علينه....انوب
لذالك شبكونه..... وبسمروهه الباب
اشبيكم ... بيهه صالح اذا هيج اتطول
هاي اسرار دوله .... ابغير ذكر اسباب
مستعجل عليمن .. ياشعبنه اشبيك
اثكل .....لو خفيف اتصير .. ماتنهاب
كلهه اشجم سنه ونعبر لذاك الصوب
ماضل شي بعد ... لا تحسبلهه احساب
شوف البرلماني.. ابكل وكت مخبوص
وبهاي الدول ........يوميه طالع طاب
غير ايريدنه انعيش ........بأمان وخير
واحسن اكل ناكل ... نلبس احله اثياب
هيه ابكيفكم ......ضلت شلون اتصير
المهم هذا الشعب ...من انتخبكم تاب
وآثار الندم......... تلكاهن ابكل أيد
دور ....تلكه كل جف بيهه عضه ناب
الله يساعدك...... يا مجلس النواب
ويساعدنه عليك ابجاه داحي الباب
رد مع اقتباس
المشاركة الأصلية كتبت بواسطة haneen
