تخنگني خنگ
تخنگني خنگ بالليل عبرات
رافگهن سهر رفگة شماته
يگلهن واني وجهي امشكبن هموم
دگـّن عالخشب وجهه اشحلاته
الدمعه عله خده اتخبل خبال
والدخان من ايشگ لهاته
جرحه الينزف اشگد دمّه محبوب
ولا مجروح ابد شايل صفاته
ولو طب الصفنته ابعالمه يضيع
جن قدّيس مشغول ابصلاته
ادعن كون ربجن لاجمع يوم
شملة ويه الفرح ولحد مماته
طب گلوبنه وفرگاه ما تهون
عِشرة من الزغر أوف شغلاته
گلت يغيب سرّي ويبقه محفوظ
بلكي الليل لو ضمني ابعباته
لذت بيه من نهاري وسيل العيون
ليل وظلمته قارب نجاتــه
طلع ليلي عميل الظهر ياحيف
وسهري وعبرتي طلعن وشاته
متواتر حديثي وصار مشهور
قوي الأسناد موثوقه رواته
نقلاً عن ونيني ودمع العيون
ورواية ليل ما يغزّر ابذاته
نقل جنح الظلام اخباري للناس
ما أمّـَن دخيلة ولم شتاته
روح الليل ستره وليلي اظن مات
والواجب علي أدفن رفاته
منقول
رد مع اقتباس
