في صباح اليوم التالي اخذت التراب ورحت
كلت – اي عمي هذا جيس التراب
– لا عمي ما وصيتني ؟ شنو هو المقسوم ؟
كال – يعني تريد نشتغلك ببلاش ؟
كتله – صار عمي صار ... شتؤمر اني حاضر
كال – زين .... ينراد للعمل هاي الشغلات ... روح جيبها وتعال
وانطاني ورقة مكتوب بيها قائمة طلبات
اخذت الورقة وباوعت بيها ....
خمس دجاجات مال عرب –4كغم رز بسمتي – بطل زيت (مو مال حصة تموينية حتى لا يطلع فاسد)
باكيت مكعبات صلصة ماجي – نص كيلو لوز مقشر –ربع كيلو كشمش تركي اصفر – علبتين بزاليا مطبوخه
بهارات برياني – ملح باليود – اكياس نايلون حرارية للفرن
كتله – عمي هاي الورقة بيها وصفة مال برياني ودجاج ؟
العراف – جا هم الي راح يسوولك العمل يشتغلون وبطنهم فارغة ؟
عاط عليه وكال – شنو انت جاي تقشمر علينا ؟ لا تنسى روحك بايدهم وباقيلك من المهلة 34 ساعة قبل ما يرجع الطنطل مال النت ويجيب جماعته وياه
.... اني فزيت وكزبر شعر جلدي من تذكرت
كتله – صار عمي صار اعذرني
العراف – وهاك هاية ورقة بيها شغلات تجيبها من العطار (ابو فلان) مو من غير واحد
.... اخذت ورقة البخور والعطاريات وطلعت
ورحت للعطار (ابو فلان) لكيت هواي ناس واكفين سرة واكثرهم بيدهم اوراق مثل الي بيدي
وكل واحد ينطي الورقة يكله – هايه من عراف المحلة
انطيته الورقة وباوع بيها وصفن
وكال – بردقوش عدنا وجلجلان اكو وزبل الحمام موجود
بس عظم ترقوة مال قنفذ ماكو
كتله – يا معود على بختك اني ..... دبرلياها
كال – ماكو وحتى اذا دبرناها تره غالية كلش ؟
كال – ماتلكاها ...... لأن كل خمسمية كنفذ يطلع واحد عنده عظم ترقوة
كلت – يابة دبرها وشكد ما يصير حكها اني ادفع
كال – هو واحد يمكن اكو عنده .... راح ادز ابني يروحله ويشوف
ودز ابنه... وراح ابنه... ورجع ابنه... وشاوره ابنه
كال العطار – يابه موجوده ابشرك .... بس اخر قطعه واكو جماعه مخابرين عليها بس تأخروا واذا ما اجو راح ينطيكياها
كتله – لا عمي لا .... على بختك لازم تنطونياها اني تره متوازي عليها وما باقي بيدي وكت
كال – مو الرجال منطي كلام للجماعه عليها
كتله – اني انطيه فوك حكهه بعد
كال – هسه راح ادزلة واحاول وياه
ودز ابنه... وراح ابنه... ورجع ابنه... وشاوره ابنه
كال – يابه تره يريدها بورقه ونص
كلت – يا معود شدعوه هي عظماية ؟
وصاح على ابنه وكاله – روح ابني كله ما نريدها
اشو الولد راح يركض .... اني تذكرت الطنطل والخبال والجهال يركضون ويصيحون
صحت بالولد – ولك تعال ارجع .... روح جيبها وفلوسها حاضره
.... ضليت ادردم ويه روحي وهذا العطار يباوعلي من جوه ليجوه ويخزرني ... وفكرت اني هم عندي عقل وسمعت كلام محامي الحب ... خاف هذا ينصب عليه ؟ ... بس شغلة الطناطله صدك .... اي صدك ...
لان اني سامع هواي سوالف عنهم ....
زين فلنفرض انه وره كل هذا المصرف وطلعت الشغلة كلاوات ؟ ..... شلون بيه ؟
واذا العمل ما صار .... ورجعولي الطناطله ؟
زين ليش ما انهزم ؟ .... واشيل من المنطقة واخلص ؟
بس اخاف ذولي الطناطله رقميين ؟ ..... يعني يجون على عنوان الـ ip مو عنوان البيت ؟
زين اقفل خط النت مالتي وابيع الحاسبة واختفي من عالم الارقام ؟
........ يجوز ذوله عدهم تقنيات متطورة ويلكفوني .... اكيد هم هم اتطوروا ويه الزمن ...
والا شلون عدهم ايميلات ومواقع على الشبكة العنكبوتية ؟
اجا الولد وجاب عظم الترقوة مالة الكنفذ ... والعطار وزنلي شوية شوية من كل شي مكتوب بالورقة
ودفعت تقريبا 200 الف ومشيت
مريت على السوك واشتريت مستلزمات العزيمة مال الجماعه
ورجعت الساعة بالثنعش الظهر على بيت العراف ....
كتله – عمي هاي الطلبات جبتهن
كال – اي زين روح للمطبخ واذبح الدجاجات ونظفهن
كال – اي وتطبخهن وتسويهن بالفرن وتسوي وياهن برياني
كتله – يا معود ما اعرف اطبخ
كال – لعد شكو خابص روحك وبالمنتدى ... دروح شوفلك وصفه روح... لو تره يزعلون عليك
كلت – بسيطة المنتدى يزعلون اكتبلهم جم موضوع اضحكهم ويرضون
كال – ولك مو المنتدى ... ذولي الجماعه الي بالي بالك الله يجعل كلامنا خفيف عليهم
... سلمت امري لله وفكرت ان ابحث في المنتدى عن وصفة .... زهر الربيع ... مشرفة بس ما عندي ميانه وياها
زين ... سوزانا ؟ ....دورت بمواضيعها اشو فتوش وكوكتيل فراولة وما ادري شنو ... بس لاتروح تخرب الاكلة لو تصير حاره وذوله يسمطوني سمط
زين ... دالين ؟ .... دورت بمواضيعها لكيت كنافة بجبنه البراكوتا ... ولحم بقري بالصلصة الايطالية ... لالالا .... ما يعرفوها
سنو وايت ... ماكو بس يسلموووووووووووو
نور الهدى ؟ .... كيف تقطع البطيخ .... اااااااااخ
زهرة الاقحوان ؟ .... كيف تطبخين زوجك .... هي ما تدري زوجها راح ينسمط مثل الباجة اذا خلصت المهلة
هم لو يرضون بلفات مال عجوزية ... جان دبرت حالي
ورحت للمطبخ ولمن طبيت زرك واحد من باب الثاني وطلع ....اني شبهت عليه جنه سامر صاحبنا
بس كلت شيجيبه هنا ؟ هسه ملتهي يتفيك
ذبحت الدجاجات ونظفتهن ... وطبخت التمنات ... وسويت الخلطة ... والحاصل كملت الطبخة بالساعة 2 الظهر
اتغدى العراف ووياه جماعه جانو كاعدين بالغرفه واني كاعد بره انتظر
وجابولهم الجاي وشربو ودخنو نفسين نركيلة .... وهاي حفلته بالاربعه يلا خلصت واني اتكرضم تكرضم
كال – صيحووله هذا ابو طناطلة النت
فتت للغرفة .... تعجبت ماكو بس العراف بوحده
كتله – ها عمي بشر ترى ما بقى شي
كال – لاتدير بال الجماعه راضين عنك
كال – لا تخاف هسه راح يجون .... سد باب الغرفة
سديت الباب واني ارجف من الخوف
خله بخور فوك المنقلة وكام يدردم – والغرفة هي اصلا ظلمة –
وره شوية طلع من وره البردة واحد يشبه هذا الي بفلم (الصرخه) مال الرعب
شوية اللاخ طلعو اثنين .... ووراهم اثنين
وحطوني بالوسطية وكاموا يفترون حواليه وما ادري شيكولون
وسوولي مثل حلقة الزار مال المصريين
وداك وديك داك ديك ... الا ما فقدت وانجطلت بالكاع واني اباوع بس روسهم تفتر حواليه وهم يضحكون
كالو – شبيك لبيك .... شبيك لبيك .... شبيك لبيك
اعضاء منتدى درر العراق بين ايديك
وشالو الاقنعه من على وجوههم ولانهم يشبهون ربعنا جماعة المنتدى
سامر ومحامي الحب وايفيان ونيو وقرصان وعمار وسوزانا وندى العمر ومسافر الليل
وكاردينيا والعراف نزع لحيته والعمامه وطلع يشبه عادل الابراهيمي
اني عطت من الخوف وكلت – انتو شنو طناطله واجيتوني بصورة اعضاء المنتدى ؟
... وركضت للباب بس جانت مقفوله ... وركضو كلهم ورايه
ورجعت على صدر الغرفة .... وكلهم ورايه .... وهذا يجرني منا وهذا منا ... واني اعيط
وذوله واكعيلي دك وخربانين من الضحك
بعدين تذكرت ... وحللت الموقف علسريع
اكيد هذا طنطل النت هو وجماعته تقمصو الشخصيات وراح يخبلوني
ومن الخوف واليأس استسلمت للقدر وكعدت علكاع
وفقدت الوعي وما حسيت الا المي ينرش على وجهي والجماعه حواليه ملتمين ويضحكون
كلت – ها شنويتو عليه ؟ موت لو خبال ؟
كال الجني الي يشبه محامي الحب – لا ابو عبد الله تره السالفه سالفة رهان ابيناتنا
الجماعه دروا بيك مصلاوي واتراهنت وياهم اخليك تسويلهم غدا
وتصورت انه هاي احسن طريقة مال الطناطلة حتى نخسرك الغدى ... لان المصلاوي شيطلع الفلس منه
....... بالله هذا شتكله ؟
... وحتى من الخرعات الي اكلتها كعدت الصبح من النوم لكيت شكلي متغير ولوني صاير اخضر وشعر راسي ما يتمشط
وشوفو صورتي الشخصية شلون صارت ....
رد مع اقتباس
