البصره زعلانه يعبد الله عليك
او حلفتني
اتريد اوديلك تمر
ما بيه نوه
اتخاف حكهه اعله النوه
ايخضر غريب
اتخاف حكهه اعله النوه
ايخضر ذليل
اوتدري انته
افضالة الفقره النوه
الكاع حصتهه النوه
الكاع...
الكاع والفقره
يعبد الله ..
يعبد الله سوه
اوحلفتني ابريحةامك
بالثدايه
ابجرح ابوك
المات حسره اعله الدوه
البصره زعلانه يعبدالله عليك
اشلون ترضه تبات وي جتال ابوك
ومن هواه تاخذ هوه ؟
اشلون ترضه تبات وتصبح غريب ؟
الغربه تكتل
ونته بس ريحة عدل
وبلايه صوت
الغربه هيكل عظمي موت
ابلايه موت
اشلون ترضه تبات وتصبح غريب
اوباجر تقوم القيامه؟
او آه..
ياحسره اشتهت
جف الطحين
اوآه ياشدة حصارالبنسلين
اتهون
من تفرش اديك اويه الدعاء اتهون
بس شلون بالماله ادين
الغيره كاس..
الباع روحه ؟!
ايعيش وي روحه غريب
ابلايه ناس
الباع جنسيته اوهويته وباع ساسه
ايعيش عمره بلايه ساس
الباع مسقط راسه
يبقه
يبقه بلايه راس
بلايه ديره..
بلايه دار
الديره والبستان
وآنه
وكبر ابوك ودمعة امك
دمعة امك صارت اعله الكاع دمعتهه مزار
الغربه..؟
الغربه مابيهه مضيف
العازه كلفه
اوكلفه من تخله تره جفوف الشريف
البارحه!!
البارحه بالطيف
شفتك عل رصيف
اغطاك وفراشك جرايد
حته صينيتك جرايد
ايه....
ياوسفه يعبد الله
يعبد الله صرت عبدالرصيف
وجانت امك
جانت امك انته تذكر؟
من تجوع ايصير
مدري اشلون
مدري اشلون جف امك رغيف
الغيره جام
امدلل انته بجال ابوك
وخبزةامك
لا يعبد الله حرام
تبوك جف امك حرام
تبوك ديس امك حرام
اشماخذك ونته ابن ابوك؟
وتدري انته الكاع بالممشه
بالممشه تره تبوس الجدام
اوبوسةاجدامك
تراهي الكاع غيراهلك
يعبد الله حرام
وداعة البصره حرام
وداعةالبصره حرام
اوشارة اليحلف تره بكاع الربه
شارة امام
البصره زعلانه يعبدالله عليك
ومارضت
حته اوديلك سلام
رد مع اقتباس
