من اقوال وتجارب جدودنا..
الاولى ..
اترك مسافه كافيه بينك وبين الاخرين
بعض البشر ودك حدود المعرفه معهم سلام
والثانيه ..
اصمت ولا تحرص على كثر الكلام .. الصمت زين
اللي سكوته ساتره يمكن يعريه الكلام
والثالثة ..
اذا تكلمت احذر تكون اطول المتكلمين
السالفه لا طولت يضعف معاها الاهتمام
والرابعة ..
امزح ومزحٍ باللسان اخير من مزح اليدين
مزح الرجال العاقلة على حدود الاحترام
والخامسة ..
اضحك ولا تضحك برفع الصوت .. رفع الصوت شين
من الادب والذوق عند الضحك ضحكٍ بإبتسام
والسادسة ..
اكرم وبيبان الكرم واجد ولا يحتاج دين
وترى الرجال إكرامها ماهوب في كثر الطعام
والسابعة ..
احلم ولا تعجل ولا تغضب ولا تشري بدين
وشاور ولو رايك معك لا شرت عداك الملام
والثامنه ..
اذا شريت بدين لاتبطي على المتجملين
كلٍ حلاله غاليٍ عنده لو انه ما يسام
والتاسعة ..
لاجاك مديونك معه بعض الوفى وبعضه لحين
فأستد باللي جاك وشدراك لله الدوام
والعاشرة ..
ترى التغافل فيه لذه وانشد المتغافلين
وان جات كلمه توجع اطلقها مع سرب الحمام
و الحادية عشر ..
وارضى ليا جاك الرضى لو العذر ماهو سمين
وترى التسامح ميزة الساده رفيعين المقام
و الثانية عشر .
اصدق مع نفسك وتلقى نفسك من الصادقين
والنفس خيل ابليس لاتعطيه نفسك واللجام
و الثالثة عشر ..
ليا نصحت انصح خفى لا تفضحه فالحاضرين
ترى الرجال يقودها لين الحكي قود الخطام
و الرابعة عشر ..
اذا تسولف عن طموحاتك مع المتفرغين
كنك تسولف للنصارى فالحلال و فالحرام
و الخامسة عشر ..
العمر ماهو فرصةٍ وحده ولا هو بفرصتين
مع كل مطلع شمس لك فرصه وخطوه للامام
والأخيرة ..
لازلنا تعلمنا الليالي والسنين
والعلم اخير من الجهل والنور جلاي الظلام
مما راق لي
رد مع اقتباس
