بسم حزني والجروح المهمله
والدموع اللي بعيني كل حين
اعترف إن المحبه (بهذله)
وان ما هي من مقاس الطيبين
علمتني كل ما كنت اجهله
باعت احساس الوفا للخاينين
يكفي اني عشت عمري باكلمه
نظرتي حرمان وانفاسي أنين
كلما قلت انتهى فيني الولــه
وانمحى شوقي وفارقني الحنين
يبتدي فيني الوله من أولـــه
كنّ ما مرت على الفرقا سنين
ما قدرت من الخجل حتى اسأله
ليه عذبني وخلاني حزين
من جماله كنت بس اتأمله
واعجز انطق أو ارتب كلمتين
كامل الاوصاف والوجه اجمله
زانته شامه على الخد اليمين
كن ربي بالليالي كحله
واسبغه بالصبح في وسط الجبين
كلما قمت ارسمه واتخيله
فز قلبي .. كن به للقلب عين !
سيدي .. يا ظلم ليلك مــ اطوله
ما رضى فجره على الدنيا يبين
مسأله فرقاك ما هي مسأله
تستحق ابقى اعانيها سنين
بس جرحي ما قدرت اتحمله
وانت به ادرى وسيد العارفين
وان رضيت الظلم واللي تعمله
فابتعد ... واقطع شكوكي باليقين
دام صار الحب عندك ((مـــهــزلــه ))
فالبقاء لله رب العالمين
رد مع اقتباس
