ما تستاهل ابجيلك حرامات
ولا تأخذ بعد من عيني دمعه
جنت ازرع ورد بس هسه مجبور
حتى الباقي منهن راح اشلعه
ايس ما بقتلك يمي اسرار
وحتى اليدگ باب الروح ادفعه
بقه يمي الشمع بس ذوبه الليل
وانه متاني الصبح يطلع واشيعه
عرفتك ثوب بس ما تستر العيب
المايرهم علي مجبور انزعه
جنت اخجل واعبرلك حجي هواي
واعرف بيه جذب بس كلت اسمعه
وهسه اتگطعت وياك الدروب
وبقه درب الخجل بلساني اگطعه
كرهتك كثر ما ودعت الشموع
شمعه بعيني تحله وتطفى شمعه
جنت گبر الجرح شايل معاناة
وصدك جان الگلب من ينعه ينعه
جن داخل حسن لو طلعت الآخ
وتطلع روحي الك وتردهه فزعه
حسبتك رقم من لمعة البيك
وين ادري الصفر هم ينطي لمعه
وين ادري الغصن بيه يركض الموت
وعلى عش المحنه يودي الأفعى
باجر راح اجفن كل الجروح
ونعش الذكريات براسي اشيعه
وباجر راح اهدم بيت الدموع
وابني من الفرح بعيوني قلعه
وتذبل شفتك وترد اليه زحوف
وانا بجفي النهر وبكيفي اگطعه
واضحكها بحزن دمعات الخدود
وابجيها بفرح والهم اودعه
واشك سنين عمرك وانزف آلآم
وقسم ثوب الغدر بيديه ادرعه
واگلك كلشي مات اللهفه والشوگ
محال اليندفن نكدر نرجعه
وسود تصير كلهه ايامك البيض
وينذل خاطرك ويعض اصبعه
مثل ما جرعتني بكاسك الموت
كاس الذل شرط باجر تجرعه
~ودي~
رد مع اقتباس
