جنت الساعة بالوحدة ونص بالليل كاعد علنت وقريت موضوع حول الجن
وطبعا ثار اهتمامي وقررت ادور بالنت واسوي بحث قوقل .....
طلعت هواي عناوين ومن بينها لكيت عنوان
www.tantal/eflt.com
اني هم ما جذبت خبر دكيت على العنوان وظليت منتظر الرد
اول مرة بس سمعت خرخشة بالحاسبة ودنجت اشوف الكيس عبالي بي شي
سكتت الخرخشة وعدلت راسي ويا ريت ما متعدل
لكيت طنطل واكفلي يم الحاسبة بالظلمة وجان يباوعلي بغضب
اني ظليت اطك سن بسن وركبي ما بعد تشيلني
ردت افلت بس ما كدرت اكوم
صحت - يمه الحكيلي يمااااااااااااااااااااااا اا
بس ما طلعلي صوت وما كو احد بالبيت كاعد حتى يلحكلي
كال الطنطل - ولك اشعدك بنص الليالي تدك علينا؟
كتلة - عمو طنطل والله ما متعمد
كال الطنطل - ومنين جبت عنوان النت مالتنا؟
كتلة - عمو والله من الكوكل
كال - ابوك لا ابو الكوكل وياك هاي تاليها صرنا قشامر يا هو اليجي يدز علينا من وره النت
كتلة - عمو التوبة والله بعد ما ادك عليكم
كال الطنطل - ولك مو انت راح تتوب اني راح اتوبك وانعل سنسفيل اجدادك
كتلة - عمو مو اني اصغر منك عيب تضربني دشوف شلون ما اوصل ركبتك
كال الطنطل - بسيطة هسه راح اصير بكدك واشبعك دفرات
واذا بالطنطل يصغر حجمه ليصبح بطولي
وكال - هسه متعادلين
وشالني ولطشني بالكاع وعدلت راسي ولنه شايلني من رجليه وفرني فرتين وضربني بالحايط واني اصيح عمو والله التوبة000 بعد ما اسويها
وما يفيد وياه......... وبعدين كضاها بوكسات وراشديات وجلاليق
واني اكلة - عمو طنطل بس بسط ماكو مسبة؟
وهو يكول - اذا ما تكلي منو الدلاك علينا الا اخلص عليك ولك طايح الحظ
واني اصرخ واعيط وما كو فايدة وهو مصر الا تكول منو دلاك علينا؟؟؟؟؟؟؟
بهاي اللحظة لمعت ببالي فكرة وكلت خلي اخلص نفسي
كتلة - عمو هذا محامي الحب دلاني عليكم
كال - ولك تقشمر عليه شلون دلاك علينا ؟ شلون ؟ ها ؟
ودك بوكسات ... اعترف ولك اعترف
كتلة - لا عمو طنطل هذا واحد يسمي نفسه محامي الحب بالمنتديات ويكتب عليكم
توقف الطنطل عن الضرب وكال
- وين الكاه هذا ؟
كتله - عمو والله ما ادري
.... وشجم بوكس ودفرتين.....
كتله- عمو روح على منتدى درر العراق يم (سامر)هو يعرف عنوانه
كال - ولك انت مكد ام الفلسين وتريد تنصب علينا
.......... ودك راشديات
كال الطنطل (وبعده شايلني من رجليه) - كوم ولك كوم .... اكتبلي عناوينهم وهسه اروحلهم واحد واحد
كتله - عمو طنطل والله ما اعرف عناوينهم ( وعينك ما تشوف نور)
كال - ولك لعد شلون تعرفهم وما تعرف عناوينهم انت فد واحد جذاب واليوم انسيك لغة النت كلها
والحفلة انتهت بعد ان انطيت وعد واقسمت بقسم الملك سليمان ان انطي لعمو طنطل عناوين اعضاء منتدى دررالعراق خلال ثلاثة ايام والا يرجع يصنفني والنوب يجيب ابو وياه
نصحني محامي الحب في اتصال هاتفي بالذهاب الى واحد
يفتهم بشغلات الجن ويسوي حجابات لو فد شي
رحنا اني وصديق طفولتي العصرية يم واحد بمحلة قريبة علينا
وحجيتله للعارفه حجايتي ويه الطنطل مال النت
كال - على يا عنوان دخلت
انطيته العنوان مال البارحة جنت كاتبة على ورقة
فهو صفن وقرا شغلات وذب شوية بخور بالمبخره وظل يوشوش
بعدين كال - ذوله ما راح يفكون ياخه عنك
كتله - اروحلك فدوه عمي سويلي جاره تره اني بشاربك
كال - هو اكو حل واحد بس
كتله - الحكني بي اروحلك فدوة
كال - نحبسه للطنطل ببطل ونختم حلك البطل بخاتم النبي سليمان
كتله - عمي وهذا ياهو الي يكدر يلزمة ويحطه بالبطل وشلون يطب بالبطل
وهو جنه طنطل يعني لا اكيد هو طنطل ها كبره
كال - لازم ينذب علي تراب من مكبرة تجيبوه بنص الليل
وتقره عليه هذا الدعاء( وانطاني ورقة بيها استدعاء خدام سفليين
واسمائهم كلش مخربطة ما تنقري )
كتله - زين عمي ما يصير بالنهار نجيب التراب؟
كال - لاع الا بعد نص الليل ....... وتره اذا تأخرت ورجع الطنطل وجاب ابو وياه
محد يكدر يفكك منهم ابد والله يخبلوك ويخلوك تديح بالدرابين والجهال يركضون
وراك ويصيحون ( هي...... هي.... مخبل(
الحجي بيناتنا تصورت نفسي لابس هدوم مشككه ولحيتي طويلة وشعري كفش
والزعاطيط تركض ورايه( فزيت فزه قويه) وكلت لنفسي الموت ولا العار
كتله - عمي نروح نجيبه للتراب وامرنا لله
صاحبي ندسني وكال - تروح تجيب التراب .... مو نروح
كتله - لك لا تظل خواف المكبره مو بعيدة واحنا نروح سويه ونرجع بسرعه
كتله للعراف - عمي شلون شنسوي؟
كال - لازم تراب من كبر ما مكتوب عليه اسم وصاير ناصي كلش ومنسي
وتحفر نص متره اقل شي وتطلع تراب ندي
كتله - صار انشا الله الليله نجيبة
رد صاحبي - تجيبه مو .... نجيبه
لطيته على حلكه
وكمنا طلعنا بعد ما اخذت تعليمات العراف
وبقينا كاعدين بالبيت نتدارس الموضوع وحضرنا العده مالتنا ( تورج وحبل وقزمه وكرك للحفر وسجينة ام الياي لان الطناطلة تخاف من السجينة وجيس نحط التراب بيه وباكيتين جكاير ولفات فلافل وبطل مي )
وصارت الساعة 12 ونص بليل وطلعنا من البيت مشي
جانت اكو مكبره قديمه ومحوطه بسياج تبعد نص ساعة بالمشي
طبعا تسللنا من الدرابين واحنا منتبهين لا احد يشوفنا
وصلنا المكبره الساعة وحدة وربع
وكلبنا من فوك السياج وكعدنا نراقب واحنا نتراجف من الخوف وواحد يكله للثاني
بارده مو ..... لو جايبين ويانه قماصل جان احسن
مشينا بالمكبرة بين الكبور وصاحبي يقره ايات ويباوع يمنه يسره
هم زين يكدر يفك حلكه اني حلكي ابد ما جان ينفتح (جيم تجيم )
ووصلنا بنص المكبره وجانت اكو شجرة جبيرة وجواها كبور ما احد يعرف المن
ورايحة منتهيه لو مو حجر يم الراس ماتندل بيها
كال صاحبي - يا الله ولك احفر بسرعة خل نولي
وبديت احفر بالقزمة وايديه تتراجف بس كدرت اكمل نص متره
وكتله لصاحبي - تعال جيب الجيس خلي نملي تراب
ونزل صاحبي ولزم الجيس واني دا املي وما اشوف الا صوت
من فوك روسنا - ولك هاي شدتسوون؟
واخترعنا ذيج الخرعة
وواحد حضن اللاخ وظلينا نتراجف
ولنه فد واحد طويل ولابس اسود وبيدة توثية وواكفلنا
كتله لصاحبي - طلعلة السجينة ولك
بس رجال اليندل السجينة وينها
كال الطنطل - سجينه ها .... تعالو يا ولد
والتمتلك علينا الطناطله اربعه من كل صفحة واحد وبيده توثية
بس جانو اصغر من هذا الاولاني
اني خربت وما بعد اوعي بروحي
ما حسيت الا مي بارد انرش على وجهي ولمن فكيت عيني
لكيت الطنطل الجبير يباوع بوجهي بالظلمة
ومن الخوف صار عندي قوة وكمت ركضت ركض واني اصيح
ولن الطناطلة اربعتهن يركضن وراية وصاحبي هم وياهم
ويصيح - ولك اوكف طاح حظك
(ايباه 000 هذا صديق الطفولة مالتي ثاريه طنطل واني ما ادري)
واني اباوع وراية ارد افلت من الطناطله
وابوهم هذا الجبير صاح - دير بالك يا معود
التفتت كدامي ولن الشجرة بكصتي لطش وانطفه الضوة
بقيت بس اسمع حجي بين الطناطلة واني من الضربة مالة الشجرة دايخ
والخوف مخرسني
صاح الطنطل - جيبو المي
ورشو على وجهي مي وفتحت عيوني وراسي ديفتر فر
كال الطنطل - خوما صارلك شي؟
كلت بكلبي ( والله لو بس تهدوني كلشي مابيه )
بس ما اكدر احجي وباوعت على صاحبي واني الفظ انفاسي الاخيرة
كتلة - حتى انت طلعت طنطل واني ما ادري بيك؟
كال - ولك انت طنطل هاي شبيك؟
طبعا اني من خلال اليأس من الحياة وامنت بالقدر وحجيت
كتلهم - اخواني الطناطلة ما دام نهايتي على ايدكم كتلوني بس لا تخبلوني
وتخلوني افتر بالدرابين الله يطول اعماركم
رد صاحبي - ولك ذولي الحارس مال المكبرة وولدة الثلاثة مو طناطلة
طبعا كلماته رنت باذاني وردت بيه الروح
كتلة - انت صاحبي يعني مو طنطل؟
كال - لا عيني لا مو طنطل يا طنطل
وشربني شوية مي وكعدوني تحت الشجرة وورثولي جكارة
وكعدو يمي يهدون بيه
كال الحارس - بويه جا انت شمالك خربت من شفتنا شو صاحبك احسن منك ما خرب؟
كتله - عمي والله سالفتي سالفة
كال - ادري سولفلياهه صاحبك من جنت انت خربان
وهاي جبتلك الجيس مال التراب وكوم روح لاهلك الله يعينك
وتركونا وراحو رجعو لبيتهم الي جان بطارف المكبرة
وكفت على حيلي وكتلة لصاحبي
- يعني ذولة صدك مو طناطلة
كال - لا بشر مثلنا
كتلة - وانت صاحبي مو طنطل ؟
كال - اي مو طنطل ..... يا طنطل
وجانلك اشيل ايدي واركعة براشدي من هذا التوصاه خليته ينكلب علكاع
وكتله - ليش لعد ما كتلي من الاول؟
كال - هو ليش انت انطيتني مجال هم خربت ولمن صحيت انهزمت
ورجعنا نمشي للبيت وصاحبي حلف يوصلني للباب
ويم باب بيتنا اعتذرت منه وكتله - الله يخليك لا تسولفهه للجماعة
تره فضيحة
كال - لا يا يمعود لا تدير بال سرك ببير
تصبح على خير .....وراح
اني طلعت المفاتيح وطبيت للبيت وشربت مي وارتاحيت
هناك بقية
رد مع اقتباس
