اهواي مثلي بمجتمع ضد الضعيف
اهلي والعادات خطو قصتي
اخواني اني اختار عنهم بت حلال
ومالي حق اختار عنهم قسمتي
ها لبن عمهه الصديق وبالاخير
انداس عمري وما انداست عتبتي
احملت كبر امي وابوي وضل سؤال
من اطيحن ياهو يحمل كبرتي
زغير خواني خطب رايد مكان
يعني باجر لازم انطي غرفتي
احسد العاجر كمت جي عدهه بيت
اني شملك غير صبري ودمعتي
وليش بجدام التقاليد اني اصير
الجنه تحت اقدامي جانت غايتي
والبعض يسالني لو تتزينين
والشماته اتهز اديهه بسكتتي
امكحل اعيوني الشرف تكفيني هاي
بيوم ترهم عود اخطن كحلتي
امرايه وجهي الدمعه ماتعثر عليه
والكبر كسر مراية وجنتي
ما رسمت ابالي فارس امنيات
ابدي ارسم تبدي تمسح دنيتي
من السلف زفيت بيدي اشجم عروس
وارد اهلهل بس اغص بعبرتي
جلمة اليوم الالج ذبحتني هاي
تالي وكتي زغار تدعي الزفتي
جنت اريد كلاده لو اي شي بسيط
مو جهال اخواني كلهه بركبتي
يضني خدامه اليطبنه غريب
روحي رجعي وماكو كلمة عمتي
حرت انظف البيت لو انظف عقول
اثنينهن باكن شبابي وراحتي
والاهم من هذا خن وعي الضمير
ما اريد اطيح ناس بمحنتي
للي غافي اعله التخلف صوتي هاذ
بلكي يصحه بيوم يسمع حالتي
رد مع اقتباس
المشاركة الأصلية كتبت بواسطة كناري الورد
