مشتاك لرحلتي وذيج الايام
حلوة ايامنه بلون الطباشير
رحلتنة قديمة تشــــــــــــگ الــــــهدوم
وارد زعلان مــــــــــن روس البسامير
نلعب والنهار يـــــــــــطول نوبــــــــــات
ونشرب مــــــــــاي مــن رسم النواعير
ارد وكت الظهر الگه امــــــــي عالباب
وتسألني بـــــفرح شنطوك تـــــــــحضير
مدرستي ورحلتي وصفي حــــــــــــلوين
كبرنه وغــفله مــــرت ذيـــــــــچ لسنين
اغيبن لو نسيت احفضهه الــــــــدروس
وارد لبيتنة بحـــــــيلة شيــــــــــــــاطين
امشي اعله الزلگ ما امشي عالگاع
واطيحن مــــــن چذب حته انتلف طين
حياطين المدارس عاليه هــــــــــــواي
وتمنعني انهزم ذيــــــــــــــچ الحياطين
هسه الخصري واصـــــــل ذاك السياج
انه شما اطول ينزل منه ســـــــــــافين
اثـــــــاري من العمر كل ساف اليضيع
واثــــــــــــاري الگاع ظلت تبلع اسنين
رغــــــــــــــم ذيچ الطفولة اتذكر هواي
حته بذكــــــــــــــــــريات ي شگد درابين
بالحله انتعارك عـــــــــــــــــركة ابطال
نقط الاقــــــــــــــلام ويصيرن سچاچين
عــــــــــــرك مثل القبائل بين الصفوف
بس لافصل عــــــــــــــــدنه ولا دواوين
مدير المدرسة يصــــــــــالحنه كل ساع
ونرد نلعب عــــــــــــــرك مثل المجانين
رد مع اقتباس
المشاركة الأصلية كتبت بواسطة حوراء الدبين
