مرحبا عليكم
طبعا سلسلة (مواطن في زمن الاحتلالات) هي سلسلة افتراضية
كانت موجودة في عقلي على شكل ملاحظات عامة عن الاوضاع باختلافها
بس اني عندي قدرة اجمعهن من شاتان على باتان واسويهن سالفه مرتبة
ما ادري انتم شنو رأيكم ؟
دشوفوا هاية ومطلوب منكم ان
تعدون شكم سلبية بيها من سلبياتنا ؟
مواطن في زمن الاحتلالات – 4مواطن في المستشفىالتوجه الى المستشفى فيه اوجه كثيرة اولها طلب الشفاء ( والشفاء من الله ) لكن الله جعل لكل شئ سببا وثانيها ( كفارة ) نعم كفارة عن الذنوب التي ارتكبها الانسان فيبتليه الله بالمرض ( عافاكم الله ) او مرض احد افراد عائلته لتكون زيارته للمستشفى عذابا دنيويا يؤجر عليه وبذلك يتخلص من ذنوبه .........
************************************************** *
توجهت الى مستشفى ( ........ ) الحكومي طبعا لاجراء فحص ومعاينة من اعراض مرضية المت بي ......... ذهبت لوحدي معتبرا ان حالتي الصحية ليست سيئة الى الحد الذي يستدعي ان يرافقني احد ما .......
سجلت بطاقة مال فحص بـ( 500 دينار ) ورحت للطبيب المقيم انتظرت ساعة وشوية بينما اجاني السرة ودخلت :
اني - صباح الخير دكتور
الطبيب - شبيك ؟
اني - دكتور عندي وجع بصفاحي و ....
الطبيب - مدد علسرير (تمددت علسرير وكشفت ملابسي واجا فحصني بسماعته وهو مكشر ومعبس )
الطبيب - بابا لا تتحرك اكطع النفس ( اني هم كطعت النفس واني خايف منه لا يرزلني) )
الطبيب _ عندك حرقة بالادرار ؟
اني - اي دكتور بس مو كلــ ....
الطبيب - وليش ليهسة ما راجعت طبيب اخصائي ؟ انتو الا تصيرون على سرير الموت يلا تتذكرون ترحون للمستشفى ..
( (طبعا اني بكت هوا من كال هلشكل وتصورت نفسي على حافة الموت وانقهرت لان ما اجا واحد من اهلي وياي حتى يستلم جثتي وراح يخلوني بالطب العدلي بالمجمدة بين ما اهلي يدورون عليه ) ودمعن عيوني ....... وكمت من على سرير الفحصوكتلة : دكتور يعني ماكو امل ؟؟
الطبيب - روح سوي هذني الفحوصات وتعال
اني - زين دكتور حالتي تستوجب عملـــ.....
الطبيب - اخي تفضل روح لا تأخرنا عدنا شغل
**************************************************
توجهت للمختبر مالة المستشفى واني كوه امشي , رجليه ما بعد تشيلني ودخلت انطيت الورقة لابو المختبر انطاني علبة وكال روح جيب عينة ادرار ( طبعا هوسة يم المختبر وهوايه مراجعين وابو المختبر ما يرد على احد وشكله جنه زعلان ) ورحت للمغاسل حتى اجيبله عينة ادرار , ويا ريت ما رحت ؟!؟!؟ ) المهم جبت العينة واني راجع للمختبر خابرت اخوية وكتلة لا تكول كدام احد ترة حالتي خطيرة وبمستشفى ( ...... ) تعال عليه ........
دخلت انطيت ابو المختبر العينة كالي : اطلع بره انتظر بعد نص ساعة النتيجة
طلعت بره وكعدت علكاع لان ماكو مكان من الازدحام ........
بعد نص ساعة صاحو اسماء المراجعين وكلمن ياخذ نتيجة التحليل ماله ويفلت
فلان ابن فلان , فلانه بنت فلان , فلان الفلاني , مواطن تعبان .......
اني - اي عمي اني ... اني ....) واخذت الورقة وكتلة بشرني ) طبعا ما رد عليه
رجعت للدكتور وانتظرت اكثر من ساعة بينما اجا سراي ودخلت وانطيتة التحليل
الطبيب - نتيجة التحليل سلبية
اني - دكتور شاكو ؟
الطبيب - هاك هاي الورقة وروح اخذلك سونار
اني - دكتور ليش ما بين بالتحليــ .........
الطبيب - الي وراه بسرعه
طلعت بره واني مرتبك وسألت مضمد : عمي السونار وينه ؟
كال : من ناك على ايدك اليسرة
رحت للمكان ولكيت فد عشرين واحد واكفين سرة ووكفت وراهم انتظر
************************************************** ****
دك التلفون مالتي وفتحته ولانه اخوي يكول احنا بالمستشفى انت وينك ؟
كتله - يم السونار ( ودقايق ولن العشيرة كلها جاية)
كتلة - ولك مو كتلك لا تكول لاحد
كال - شلون وانت حالتك خطرة ويجوز تنام بالمستشفى ؟ على كل حال لا تدير بال احنا حسبنا حسابنا
........ بعدين خذيت السونار ورحت للطبيب والجماعة كلهم وياي
كتله - دكتور هذا السونار
الطبيب - ( متأملا النتيجة ) - هاي عندك حصوة بالكلى اليمنى
اني - والحل دكتور
الطبيب - لازم عملية لان الحصوة 10 مليمات وسدت راس الحالب والكلى عندك متضخمة ,وكتبلي دخول مستشفى على ورقة المعاينة
************************************************** **
ركضت الزلم واحد جابلي العربانة وكعدني بيها ووداني لردهة الباطنية والثاني راح للمضمد يفتحلي ( طبلة ) والثالث خابر صديقه بقسم العلاج الطبيعي والاخر راح جاب بطانيات وترمز الجاي وترمز المي من السيارة والاخر راح يجيب كباب من المطعم الي بصف المستشفى والاخر خابر البيت يطمن النسوان وكاللهن وره الدوام تجن مو هسة ......... وانخبصت الردهة من كثر الزلم واشتغلت الجكاير وعثولت وهذا يحجي بالتلفون وذاك يفوت ويطلع وانسلبت راحة المرضى .......
************************************************
المهم قبل نهاية الدوام مر الطبيب وكتبلي ادوية على الطبلة وانطوني ابر مال وجع الكلى وراحو ........ ووره نص ساعة اجني النسوان !!!!!!!!
خالاتي وعماتي وبنات عمي وخالي واشتغلت السوالف ( شلونك ؟ وشكال الدكتور ؟ وشوكت العملية ؟ تحتاج شي ؟ ودخت سبع دوخات ...... وسوولي لفات كباب وشربوني جاي وفرشو بالكاع وكعدو وسدو طريق الناس وحطو الغدا وبلشو .... ووراها صبو الجاي وورثو جكاير واشتغلت سوالفهم ( فلان بعتها لسيارتك لو بعد ؟ شكد تجيبلها ؟ ابو حسين شوكت تزفون الولد ؟ ام ستار يمتى يجيبون نيشان المحروسة ؟ ابو محمد تعال اكعد هنا يمي ؟ ...... وقسم منهم راحو كعدو يم المرضى الي بالردهة يسألوهم شكو ما كو ؟ شعندك عملية ؟ من اي العمام انت ؟ وين اهلك ؟ تحتاج شي ؟ اعدلك المخاديد ؟
*************************************************
طبعا العراقيين دوم سباقين لخدمة الغير ..هذا ما اكو اثنين يختلفون عليه ........ بس كلبو المستشفى كهوة ....... بعدين الساعة ستة المغرب اجا الممرض الخفر وكاللهم اخوان الله يخليكم بس واحد يبقى ويه المريض والبقية يرحون وبلكي تطلعون بره تدخنون لان مو زين على صحة المرضى ......... كامت الزلم تتطوع كل واحد يكول ( انه ابقه ) ووره نص ساعة مشت الوادم وبقى ابن عمي ( صديق الطفولة يمي ) وفرش على السرير الفارغ يمي ومدد .. وظلينا نسولف عن ايام زمان وذكريات الطفولة والمدرسة ( هذا ابن عمي فد واحد فطيرواسمه احمد واحنا نصيحلة ( ابو الدكايك ) هلكد تتكسر على راسه كحوف .....
اجه الممرض الخفر ووياه الطبيب الخفر كشفو عليه وكالو باجر الصبح الساعة ثمانية عمليتك لا تتعشى ولا تاكل شي وانشا الله سهلة ........
بقينا اني واحمد نتعلل للساعة 12 بليل وكام صبلنا جاي من الترمز وشربنا وجان ينكب الجاي على السرير مالتي وخطية احمد حولني على سريره ونظف السرير ومسحه بالمي وكتال نام انت على السرير الناشف واني راح انام بالكاع اذا ما نشف المي ............ ونمت
**************************************************
الصبح كعدني اخويه : ها ابو الوطن شلون صرت كتلة الحمد لله زين
كال - جبتلك ريوك
كتلة - عمي يا ريوك بالثمانية العملية مالتي
كال - هاي شني الساعة تسعة
باوعت ساعتي صدك بالتسعة كتلة : اشو ما احد كعدني لعد ...... وهذا ابو الدكايك وينه ؟
كال - ما شفنه
كعد اخويه ينتظر ووره شوية جابو سرير العمليات وعليه مريض توة طالع من العملية
كتلة للممرض الصباحي - اخي اني اليوم عندي عملية على اساس بالثمانية
كال - اي عيني شاسمك ؟
كتلة - مواطن تعبان
كال - شنو لعد هذا الي سويناله عملية منو ؟
باوعت ولنه احمد ( ابو الدكايك ) ممدد على عربانة العمليات ورايح بيها
كتله للمضمد - عملية مال شنو سويتولة ؟
كال - على اساس حصوة بالكلى بس طلعت كليتة نظيفة فالدكتور سواله عملية الزائدة الدودية وكال احنا فاتحين بطنه وفاتحيهه ...........
*****************************************
رد مع اقتباس
