مواطن في زمن الاحتلالات – 3
انا وسيارتي
قررت اشتري سيارة صغيرونه اشتغل بيها على باب الله بالشارع
بعت الذهب الي عدنا بالبيت واهلي فزعولي بجم ورقة صار عندي 30 ورقة أخذتهن ورحت للبيع المباشر طبعا استخدمت حق ( الاستعانة بصديق ) لان اني ما اعرف بالسيارات وظلينا اني وصاحبي نكلب بالسيارات ونشوف هايه ونباوع على ذيج ونسأل علاخرى ونتعامل بدون نية الشراء
وبعدين كعدنا يم الجايجي دنشرب جاي ووصلنا الى نتيجة انه فلوسي ما تكمل حتى مقدمة سيارة ( طبعا اني عيني جانت على سيارات البالة )
صاحبي كال تعال خلي ناخذلك فد برازيلي نظيفة واشتغل بيها بينما الله يفرجها ولملك جم فلس(ورقة) وبعدين بدلها ترة هي العافية درجات
- والله حجايته قطعت بعقلي - وارتاحينا وكمنا نكمل مشوار البحث بس هلمرة ندور برازيلي
*******************
لكينا هواي برازيليات بس نص عمر لو النظيف كلش غالي
وقبل ما نطلع سلم علينا واحد ( طلع دلال بالبيع المباشر )
كال - يا شباب شتدورون اشوف صارلكم ثلث ساعات وطالعين بايد الفارغة ؟
كتلة- حجي والله اريدلي سيارة اشتغل بيها بالشارع مال خبزة يعني
كال - بسيطة عمي اشكد فلوسك
كتلة - 30 ورقة بس
كال - عمي اكو سيارات مناسبة وسعرها مناسب تعالو وياي اشو
..... ورحنا وراه شوفلنا برازيلي تكسي وانطانا السويج وكال كلبوها انطيكمياها شرط المحرك رايمن لانفخ ولاصرف والسايز عشرة فوك وعشرين جوة والصدر معمر كله اصلي وطخم التايرات تشوفو بعينكم كوري جديد وبيها قطعتين تبديل......
اني باوعت السيارة داخلها حلو ومرتب وصاحبي ظل يتفحص التكم والسكف
وكال - ما مكلوبة بس هذا صبغ عام مال تكسي
وكال للدلال :عمي بيش تريدها
الدلال - اغاتي اطلعو بيها تراي وبعدين نحجي ( لان شاف بريق عيناي من اباوعها)
صاحبي - حجي افصلها ونطلع تراي
الدلال - فقد لو نقد
صاحبي - عمي انت تدري هاي فلوسنا هلكثر
الدلال - اذا فقد والمقدمة 30 احسبلكمياها بخمسة واربعين وبالشهر ثلث اوراق
صاحبي - لا حجي احسبها باربعين وبالشهر ورقتين تره احنا شراية
***********************
وما بين مد وجزر تم الاتفاق ان ندفع 30 ورقة مقدمة وتنحسب السيارة علينا ب 42 ورقة وقسطها ورقتين بالشهر ( شرط الوكالة) ورحنا تكاتبنا بمكتب العقود المرورية ودفعنا الفلوس واتفقنا كل راس شهر ندفع القسط اعتبارا من يوم كتابة العقد وكتبت وصل امانة بالمبلغ الباقي وطلعنا من المكتب كناله للدلال حجي لازم نوصلك حتى نعرف وين نجي ننطيك الفلوس كال - لا يا معودين كل شهر تعالولي هنا بالبيع المباشر اني اشتغل بيها للساحة بس يا شباب الله يحفظكم لا تأخرون القسط لان اني هم بايع شاري وعليه التزامات واقساط
كناله - حجي الله وكيلك ما نتأخر يوم واحد وتعال ويانا للبيت نتعشى وتندل مكانا وتعرف اهلنا
كال - لا يابه لا الانسان مبين من وجهه سلام عليكم ...... وراح
***********************
انطلقت بسيارتي والدنيا لا تسعني من الفرحة وكتلة لصاحبي لازم نروح لابو الزينة نخليلها واقيات ونشدلها ملاعيب وهورن جديد الهورن مالها تعبان كال - لا تتعلم على مصاريف زايدة خلى نشوفلك فد اشتراك ونرتب شغلك وبعدين هاي الفيكات .... اني اقنعت وسكتت ووصلنا للبيت وتعشينا وراح صاحبي بعد ان القالي محاضرة عن اسرار التكسي واسرار الشارع واني قفلت السيارة وصعدت للشقة انام بس صدكوني ما نمت ولا غمضت عيني واني تايه ببحر الافكار عن الشغل بالسيارة والاشتراك ادفعه للقسط وباقي الشغل نص اذبة علسيارة ونص علبيت واكيد راح اكدر الم شوية فلوس حتى اطور نفسي - وغفت عيني وفزيت الساعة بالخمسة الصبح صليت وتريكت وطلعت شغلت السيارة وفحصت دهنها وميها وانطلقت بالشارع وكروة ...كروتين .... ثلاثة صارت الساعة 11 الظهر واني مشتغل ب 30 الف كلت خلي اروح افول بانزين وارجع للبيت وفعلا فولت السيارة (خمسين لتر للحلك) ورجعت الساعة 2 ونص للبيت وتغديت ورحت لصاحبي اشوف شسوالي بالاشتراك وكعدنا بكهوة - ابو علاء- شربنا نركيلة وصاحبي كال لكيتلك اشتراك 3 موظفات بالمصرف وكلهن قريبات وزوجت صاحبنا ابو علي وياهن كوم نروح لبيتهم نتفق ويا ام علي
**********************
رحب بينا ابو علي وكال لو ما انت من المنطقة وصاحبك مدحلي بيك جان دورت غير ابو اشتراك بس ترة هاي امانة تدير بالك عليهن موظفات وتوصلهن لي باب البيت كتله- صار ابو علي تتدلل واجتي ام علي جابتلنا ببسي (ار سي ) وكالت باجر الساعة سبعة وعشرة تجيني هنا حتى نروح لبيت صديقاتي وتندلهن - ودعنا بيت ابو علي وعدنا للكهوة وصاحبي كال هذا الاشتراك راح يسدلك القسط والباقي تعيش بيهن
*********************
الصبح وديت الاشتراك ورجعت اشتغلت بالشارع وبالساعة 2 الظهر رجعت الاشتراك واتغديت بالبيت وطلعت بالخمسة العصرية اطكطك شوية ورجعت الساعة بالثمانية واني متونس واشتريت دبتين بانزين من علشارع لان ما صارلي خلك اوكف بسره البانزين اعتقد ان بانزين الشارع اصرفلي لانه يوفرلي وقت 0000 وهكذا مرت الايام وانا سعيد لا يهمني التعب ما دام دا اشتغل واجيب فلوس صحيح شوية عطلات صارت بالسيارة بس هينه وايرات ديلكو على فتح كابريته على طخم دسكات
المهم اجا راس الشهر
*****************
رحنا اني وصاحبي نودي القسط اول ما شافنا ابو المكتب شال الموبايل وخابر( عبالي مخابرة عادية ) كعدنا وسألنا على الحجي صاحبنا كال - هسه جاي وما اشوف الا فد واحد ووياه مفرزة مال شرطة دخلو للمكتب وبيده ورقة امر حجز علسيارة مالتنا --- يابة ليش كا السيارة بعتها للدلال بالاجل قبل 3 تشهر واستحقت الفلوس قبل عشر تيام وهو ماكو وسويت حجز علسيارة .... اني هم طلعت عقد المبايعة اشو هو طلعلي الكومبيالة الي على الدلال - وعلكت - اخر شي الشرطة سحبو السيارة للحجز كتله لابو المكتب هذا الدلال وين بيته 00 انطاني عنوانه واخذنا تكسي ورحنا للبيت .... دكينا الباب ماكو احد سألنا فد واحد ابو محل قريب كال - يابة هذا مسافر لسوريا صارله عشرين يوم هو وعائلته شعدكم وياه خوما انتو ديانة كناله - لاعمي طلبة سيارة ووكالة كال (وهو يضحك) هاي انتو ثالث جماعة بهليومين اجوي على طلبة سيارة انحجزت لان عليها كومبيالات
كناله - حجي ليش شني السالفة كال - عمي هذا ماكل فلوس العالم وكلب على سوريا ووراه طلع الخياس هذا ماكل علعالم اكثر من اربع دفاتر بهاي حيلة البيع والشره مال السيارات
******************
وبعدين طلع ماخذ خمس سيارات بالاجل وموقت استحقاق الفلوس على تاريخ واحد وبايعهن بمقدة نص حكهن
وكالب بالفلوس والسيارات انحجزت وراح الخيط والعصفور
*
رد مع اقتباس
