اول ما نكعد نكول صباح الخير لامنا وابونا
ونستمتع في الصباح ونحن راكبون الباص للذهاب الى المدرسة الاعدادية
) ايام الشباب(
نستمع الى اغاني فيروز الصباحية - عا هدير البوسطة - ونحن نسترق النظرات الى الفتيات في الباص دون ان نجرؤ على اكثر من ذلك فقد
كانت البنت من الخطوط الحمراء
وننزل يم السوك القريب من المدرسة
لنلتقي مع الشلة
ونتريك - كاهي - لو لحم بعجين
لو لفة بيض
ونشرب استكان جاي من الكهوة واحنا واكفين برة
لاننا صغار بعد وعيب نكعد بالكهوة وحتى لو كعدنا ماحد يكلنا الله بالخير
لاننا ننتهك خطا احمر من العلاقة بين جيل واخر وخصوصية الكبار
ندخل المدرسة وبالاصطفاف نوكف مثل العسكر
ونتوجه للصفوف بسير هادئ ( عيب نركض لو نصيح )ومن يطب المدرس نكوم نوكف ونكعد من يسمحلنا وبتحية العلم يوم الخميس نتبسمر
لمن ينرفع العلم ماكو احد يراقبنا بس احنا
ما نكسر خط احمر
نرجع للبيت بعد الدوام ونساعد امنا باعداد المائدة بينما ابونا يجي
ونلتم علسفرة ونتغدى واذا تأخر ننتظره ونركض عليه واحد يجيبله بريج المي يغسل
ولاخ يجيبلة شحاطة البيت وما نكعد قبله علسفرة
وما نخلي ايدنا علكاع لمن ناكل حرام
ولا نضحك لو نتشاقى
ومانذب حافة الخبز الثخينة وما ناكلها لان شوية معجنة
وناكل من طرف الماعون الي كدامنا وما نمد ايدنا علوسطية حتى لا تطير البركة
ومن نشرب الجاي ما نطلع صوت الشفيط مالنا عيب
ما يصير نكسر خط احمر
والعصريات يسمحلنا ابونا نطلع شوية نفتر ويه اصدقائنا
ونطلع عيوننا بالكاع حتى لا نشوف نسوان الجيران العصرية من يغسلن باب الحوش ويرشنه وبعدين يكولون علينا ما مربايين - ومن نمر بالدربونة الضيكة ويقابلنا احد جبير ننلزك بالحايط ونفسحلة درب
ونشيل اي حاجة من طريق الناس حجارة بنص الطريق لو تنكة
وما نوكف براس الدربونة على درب اليمرون
عيب هذا خط احمر
ولمن نروح للسوك ندور شي نحتاجة
ما يصير نطب بقيصريات بيع المواد والحاجات النسائية وملابسهن
ولمن نشتري من محل ننتظر الي واكف يخلص معاملته وياخذ حاجته
وبعدين احنا نسأل ونتعامل
ونكلة للجبير عمو وحجي والجبيرة خالة وحجية
ونعبرهم الشارع بايدينا مثل الطفل الصغير
ونمشي فرحانين وراسنا مرفوع لمن يكولونا ( الله يرضى عنك وليدي )
ويمكن اصلا محد ديباوعلنا بس احنا نحس بالرضا
نروح خطار ويه اهلنا ببيت اصدقائهم لو معارف
يودون صوغة بمناسبة
ونكعد بلا ما نحجي ولا نتدخل لمن هم يحجون
ولمن يصير تعزية بالطرف نروح نساعد بلا ما احد يدز علينا
ونقدم كهوة مرة ونجيب مي ونشيل نفاضات الجكاير ونشعل بخور
وننقل مواعين الاكل وكت الغدى والعشا ومن تفض نرجع للبيت ناكل
ما اكلنا بالتعزية حتى لا يكولون جايين علاكل
ولمن تصير زفة وعرس
نتجمع ويصخرونا الكبار روح جيب وتعال ودي وشيل هايه وحط ذيج
وصل خالتك ام احمد لبيتهم وتعال اغسل باب الحوش وامسحه بالماسحة
سفط الكراسي زين وخلي بيناتهن مسافات
علك بردة من هاي الصفحة حتى يطبن من وراها النسون
حط البنكة بالزوية حتى هواها يضرب علصفحتين علك الكلوبات من سطوح
بيت ابو عمر على سطوح بيت ابو علي ووصلهن لبيت ابو نسرين
واحنا نركض بليه تعب عبالك عرس امنا
وبرمضان وعاشورا
نودي مواعين فطور وهريسة لكل الطرف لا تنسى تودي
حتى لابو توما وحنا
وبعيدهم نرش مي وياهم ونعايدهم ونبوسهم ويبوسونا
وناكل كليجتهم وبيضهم الملون
وبعيدنا يجونا ونتغدى سوى وسوى نفتر
نعزيهم ويعزونا
ونروح وياهم بليل للمستشفى
ونطلع لسطوحهم نفرلهم الاريل لونصب فلانكوت
قبل الشتا حتى لا تتبلل غرفهم
وهم تره هم يجونا
ولمن واحد من الجيران يعمر ببيته لو يصبغ
احنا كلنا عمالة وننكل حجر ومونة
ومن يخلص التعمير ننظف المحلة ونكنسهة
وتبارك وتهني كل الدربونه
نروح للملعب نباوع الطوبة
فريقين قواي يلعبن نشجع ونهوس ونفرح ونصيح
كل واحد لفريقه وضد الي ما يحبونه
ولمن تخلص المباراة نرجع سوية للبيت ونسولف
عدنان درجال ورعد حمودي
لو حسين سعيد
جان البطل والكل يشجعونه
ونشتري دوندرمة من ابو العربانة
كاسات كزاز تلمع بضوة اللوكس مالته
والوانها قهوائي ابو الككو
وابيض حليب كله اصلي ما يخلطونه
لان الغش خط احمر
وننام فوك السطوح بعد كل هذا التعب
ونشرب مي بطاسة الفافون من الحب
قبل ما نصعد للسطوح
ونكول تصبحون على خير يا أمنا وأبونا
يلي على المحبة والمبادئ ربيتونا
وعلى كل خطوط الحمرة
علمتونا
رد مع اقتباس
