مواطن في زمن الاحتلالات – 2
اني وابو الملك
سكنت بالضواحي بشقة ايجار طبعا ايجارها غالي علينا ندفع ما يعادل 60% من موردنا المتواضع بس الستر اهم من الاكل والشرب مشكلتنا اليوم مع ابو الملك طبعا هو فد واحد سمين وما يمشط شعره ولابس دشداشة ما مغسولة ومأجر الملك مالتة( شقتين واربع دكاكين جواهن) ورايح بغير محافظة مسجل نفسه مهجر ويستلم معونات مال مهجرين وكل فترة يروح يستلمهن ويجي وكاعد ببيت مبني على ارض متجاوز عليها( يكلك بلكي تجي حكومة وتملكنا اياها ) ومسجل بمؤسسة السجناء السياسيين ويستلم راتب شهري 550 الف دينار وهو جان مسجون على قضية نصب واحتيال بزمن ما قبل الاحتلالات بس سواها بفلوس واستلم هوية سجناء سياسيين..... وراتب عطالة بطالة هماتين.... (يعني شبكة الرعاية الاجتماعية) طبعا هاي كلها بعدين عرفتها
المهم اول ما كعدنا كال ترة يا جماعة اني ما اصرف ولا فلس على الشقة ترة ما عندي وخط المولدة انتو اسحبوه لان مابيها *** واحنا تفحصنا الوضع لكينا العوارض التالية( عدم وجود 6 قطع جام مال شبابيج- ماكو خلاط مال دوش والحنفيات مسولكة تنكط مي – معظم سويجات الكهرباء عاطلة لو مكسورة – وطبعا الحياطين صبغها مجولح ) كلنا ما يخالف نصرف من جيبنا وامرنا لله احسن ما يكلب علينا وتروح الشقة من ايدنا وهم احنا وضعنا احسن من غيرنا الله يساعد الكاعدين باكواخ بالمزابل او اضطرو ( يتجاوزون على اراضي الدولة من الماكو)
رتبنا الشقة وكملنا نواقصها وكعدنا والتهينا شلون نرتب امور حياتنا( بالمناسبة احنا تونا عازلين ) ونخطط نوفر بعض الفلوس حتى نشتري اثاث مستعمل بالتقسيط من محل قريب يبيع ويشتري بالاثاث المستعمل وهو فد رجال متفهم ووافق علبيع بالتقسيط مما زاد فرحتنا وبدأنا نمر عليه كل جم يوم نشوف شعنده جديد ( يعني اشياء مستعملة اشتراها توا وليست جديدة بالمعنى الحقيقي ) واخذنا منه نص طخم قنفات وزولية وطبلتين ودولاب مال مطبخ ابو 3 بواب وجبناهن بعربانة وجينا ... شافنا ابو الملك وفك عيونه وكال اي مبارك يابة ايدكم بالدهن .... طبعا اني تشائمت من شوفته بس اضطريت اجامله والتهيت اصبغ الدولاب
راس الشهر مال ابو الملك يوم 20 من كل شهر هلشكل اتفقنا ودفعنا الايجار حسب الموعد ( اني احب التزم على حساب اي شي وما اريد اخلف الموعد ويه احد ) اجا الايجار الثالث واني دفعته وابو الملك كال يابه تره ورقة الكهرباء اجتي ولازم تدفعوها ( طبعا هي ساعة كهرباء وحده موجودة بالملك ) كتله عمي شكد فلوسها وشلون ندفع كال بالتساوي بيناتكم ( فكرت انه المبلغ بسيط وبعدين هي وينهه الكهرباء ) وافقت ولمن شفت القائمة لكيت بيها مبلغ 964 الف و516 دينار لانه صدرت قوائم بتعرفة جديدة لسعر الكيلوواط غير معروفة سوت بلبلة بنص الناس وصارت حديث الساعة وانضميت الى المستأجرين المحتجين هذا يكول كل يوم ساعتين كهرباء لو ثلاثة وهلكد تجي القائمة – والثاني يكول عمي اكطعو الخط مال الوطنية وما لازم وابو الملك يصيح يابه واني شنو علاقتي حالي من حالكم والمشكلة واكعه براسي لان الساعة باسمي واخاف اتغرم .... المهم بعد ثلاثة ايام من النقاشات المحتدمة والمناوشات خضعنا للامر الواقع لو ندفع لو نطلع وتقاسمنا الفلوس ودفعناهن لابو الملك ( هو خطية ما بيده شي ) ونسينا الموضوع من ضمن هواي مواضيع تعودنا ننساها او بالاحرى نتناساها حتى لا نطك قهر
بعد ثلث تشهر اجت ورقة الكهرباء الجديدة وكال ابو الملك يابه هلمره بسيطة 98 الف دينار بس وقسمناها وانطيناها اله نفس الشي ومشت الامور .... فد يوم كعدت يم صاحب البقالية الي جوه شقتي شربت يمه استكان جاي اشو اجا واحد بيده دفتر ويباوع من وره الباب على درج الشقق كتله تفضل عمي امر خدمه كال اني ابو الكهرباء وهاي ورقة الكهرباء المن انطيها كتله عيني اني ساكن هنا انطينياها شكد طلع هلمرة علينا كال 103 الاف دينار وانطاني الورقة وراح ..... البقال كال يا معود شنسوي – والقيت نظرة على القائمة وصعقت من مبلغ الديون السابقة الذي بلغ ( مليون و 62 الف و516 دينار ) يعني ابو الملك ما دافع الفلوس الي اخذها من عدنا مال الكهرباء – وعلكت – بعد ما اخبرت الجميع وانتظرنا ابو الملك الي اجا ثاني يوم
.....وواجهناه بالموقف عبس بوجهنا وكال ليش هي هاي الفلوس مو حك الكهرباء وانتو دفعتوها _ قلنا بلى _ فرد علينا
وكال ما : الكم علاقة بعد اني والحكومة ننجاز
رد مع اقتباس
المشاركة الأصلية كتبت بواسطة مواطن تعبان
