مرحبا اصدقائي هذه سلسلة متتالية ومنوعه
احكي فيها عن هموم ومشاكل المواطن العراقي اليومية في زمن الاحتلالات
حيث هناك من احتلنا عسكريا او سياسيا او فكريا او ثقافيا او اقتصاديا
مما نتج عناه تداعيات انعكست على حياتنا
مواطن في زمن الاحتلالات – 1
اعرفكم بنفسي انا مواطن تعبان كلش
والاسباب كثيرة ليس لها اول ولا اخر
ولكني وجدت ان الطريقة الوحيدة لابث همومي هي عبر المنتدى
طبعا انتو مو مجبورين ولا محتاجين تسمعوني ولا تقرون الشخابيط مالتي لان انتو هم خطية
ما تكدرون تحلولياها لكن اني محتاج الفضفضة لان اذا ما حجيت راح اطك واموت من القهر
*********************
ذهبت صباحا الى عملي الجديد (على باب الله)بالساعة الخامسة والنصف لاصل السوق الساعة ثمانية
وطبعا ما متريك رحت اكلت لفة فلافل وشربت استكان جاي وحطيت بسطيتي وكعدت وبعد شوية اشتغل العياط (حاجة بربع) وطبعا ينراد طاقة مال باجة مو فلافل حتى استمر الى الظهر لكن اني اتحمل وما عندي فلوس زايدة حتى اجيب مكرفون الي يصيح بمكاني لان فلوسي كلها دفعتها سرقفلية لمكان البسطية وجبت بيها بضاعة ففكرت انه استغل ابو البسطية الى بصفي لان عندة مكرفون وطرحت الفكرة عليه وافق نحط بسطياتنا وحدة بصف اللخ ونخلي المكرفون بالوسطية ...... ومشت الامور وارتاحيت شوية
*********************
اليوم الثاني صاحبي استأذن عندة شغلة نص ساعة ويرجع وعرض علية ادير بالي على البسطية مالته فوافقت من باب الزمالة واحنا ولد كار واحد وشيلني واشيلك وهو صاحب فضل عليه ........... وراح
صاحبنا وما رجع للساعة 12 الظهر واشترالي لفتين فلافل واعتذر لانه ابوه دخل بالمستشفى والتهى وياه 0000 وطبعا اني حبيت ابين انه متأثر ودعيت لوالدة بالسلامة وكتله عزيزي اني يمك لا تدير بال والبسطية امانة بركبتي بين ما والدك يطلع من المستشفى ...................
وانطيتة الفلوس الي بعت بيها الحاجات من بسطيتة طبعا بضاعتنا مختلفة واحد عن الثاني
********************
وثاني يوم نفس الشي بس احنا دمجنا البسطيتين كأجراء مؤقت وصارن بسطية وحدة وصاحبي رجعلي الساعة 1 بعد الظهر ومبين عليه ضايج وكال ابوية يحتاج عملية تكلف مبلغ هواية بس اليوم اروح على عمامي بلكي يدبرون جم فلس واني هم اتداين فلوس واكملهة
وسألني تغديت كتلة اي عمري اكلت لفات فأصر ينطيني فلوسهن واعتبر انه هذا واجب عليه ولازم
اوافق حتى ما يحس انه ديستغلني (مسألة مبدأ يعني) واني حبيت اخليه يكون مرتاح فأخذت الفلوس منه وانطيته حساب بضاعته الي بعتها
*********************
مرت عشرة ايام واحنا بهاي الحال بس صاحبي يجي وكت التعزيلة وينطيني فلوس اللفات والجاي
واني متونس بهاي الصداقة
وبعد يوم اجا صاحبي وكال اريد ابيع مكاني بسرقفلية حتى اكمل فلوس العملية وخلي تبقى البضاعة يمك ونشتغل سوية فاصريت ان ابيع مكاني وانطيه الفلوس كمشاركة مني لاخوية الذي لم تلده امي وفعلا بعتها وانطيت الفلوس لصاحبي وحطيت البضاعة مالتي (طبعا اني اخذها علتصريف من تاجر جملة)
واجا يوم سبت الي هو موعد التسوق للبسطية ورحت جبت بضاعة الي ولصاحبي بس طبعا اخذتها باسمي من التاجر .......... واني متوجه اروح للبسطية شفت صاحبي كاعد علكهوة يشرب جاي صحت عليه من بعيد ما انتبه واحد كاعد بصفة كله ابو فلان العامل مالتك ديصيحلك
اجا صاحبي وشال الاغراض وياي ورحنا فتحنا البسطية صاحبي كال اني جنت انتظر واحد ديجيبلي فلوس اكمل قسط العملية وادفعهن اليوم وبالتعزيلة حطينا البضاعة بالخان الي يحط صاحبي البضاعة بيه وكال الصبح اجي واني اطلعها (لان صاحب الخان ما يعرفني بس يعرفه اله(
*******************
اجيت ثاني يوم افتح البسطية لكيت الاغراض بالخان ماكو سألت كال العامل مال ابو فلان اجا اخذها رحت شفت البسطية مفتحة وواحد ما اعرفة كاعد بيها سألت عن صاحبي كال كاعد بالكهوة رحتله من شافني بدل علية وكال يا جماعة دتشوفون قلة الحيا فوك ما باكني وطردتة اجا هنا وراية
وما اشوف الا الراشديات دك وبعدين رحنا لمركز الشرطة وسألني المفوض حجيتلة كلشي بس صاحبي وياه شهود شهدو انه اني صارلي شهر اشتغل عنده بالبسطية وهو طلعني وجاب غيري
لانه يشك بامانتي (طبعا هم ما يدرون يحسبون اني صدك عامل) واجا المتعهد وشهد انه مكان البسطية مسجل باسم صاحبي واني بايع بسطيتي قبل شهر لانه محتاجها لعملية ما يدري مال شنو ........ورادو يحبسوني بس صاحبنا كال للمفوض خطية هذا فقير ما عنده واني متنازل عن حقي والله ياخذ الحق منه وحكمو عليه بعد ما اطب هذا السوك
وطلعت ورحت للبيت وجبت وياي جاهة (هم تعبانين مثلي) يتوسلون بالتاجر الي تسوكت منه حتى ينطيني مهلة وبعدين بعت الثلاجة والموبايل(فرخ الطابوكة)حتى كدرت اسدد والتاجر خطية هم عفاني من بقية الفلوس
وهاي وحدة من الهموم
رد مع اقتباس
المشاركة الأصلية كتبت بواسطة مواطن تعبان
