تهدم كل حياتي بصفنتك هاي
وتاخذ حزني كله وتبني نعشي
لأن تابوت دمعي امكدس هموم
وطريق گبور صاير هذا رمشي
ادور بس عليك وادري كتال
واشمر شوفي لمن يمك امشي
حتى براحتك تكتلني عالكيف
تنطي الدمع حقه وتنطي كلشي
والمحك من تجيني امحمل احزان
شايلهن فراشة اتگول يمك
واتذبهن عليه ابحيل شلال
وسبايا الروح ياخذ هذا همك
نعم تملك عطر دوخ بساتين
مو انته التملكه هذا اسمك
اشم بحروف اسمك واغمض العين
واطب بحلام جنة ابيوم اشمك
اطب العيني لمن اذكر امشاك
وافتح باب عيني والگه رسمك
لوحة من الحلم مرسومة بشموع
نقشت بالعلن اسرار حلمك
بشرايين الجسد تتمشى بسمات
وضحكات الجهال انشوفه دمك
واتعمد اجرحك وابدي بالراس
حتى الضحك يمشي بطول جسمك
نسمة من الترافة ايمرلي طاريك
ويفوت ابضحكتي معناها اشهگه
وانحت بالحچي من اتغازل وياك
وانته اتمن عليه ابشوگ ملگه
الك يانفس يطلع چنه جمهور
وكل الجسد يطلع يهدي صفگه
شفت رمشك اغاني عيونك الحان
سُلم من موسيقى ابعينك الگه
مسرح وسط خدك يحوي تمثيل
ضحكك دور جاهل وانه اشبگه
سمارك رسم ورد كل الاشجار
وانه شكلي حديقة ابلايه ورگه
عليمن تبتعد من ارد احاچيك
اجيك ابحدي هاك خيالي احرگه
واذا انته تخاف اسأل هاي الايام
انه طبعي سماء وتبقى زرگه
رد مع اقتباس
