انا معارك زمن مايفتهم شنكول!
مو عركة عشاير وبفصل تنفض
حليب وماربت ذب راسي عالرجلين
ومعيدي زماني مو لعب من خض
بصفنت عيني شارب كل خضار الكاع
وفز ولكاها صحرة والشرب ما مض
لنتلة وماهضمني.. وعزبت مافاد
فرشت ابساط اله وماكعد مره الحظ
ومن حولي لاصحاب انفضوا وظليت
وحدي .. وكلبي امهم مو غليظ وفض
لذلك بالمواقف مو بالمرايات
رغم شدة سماري تشوف وجهي ابيض
الميخاف المنية .. يخاف هجر احباب!
ومن هجر الحبايب موتي جان افرض
ومابينت خايف جي كرب عذال
بس بداخلي رجفة حرامي انكظ
قوي الحد بالحديد اطبع بدي نيشان
وحساس وعلي بنظرة عتاب انرض
معلعل بس شسوي بدوخة الدكتور
بجيت ربعي اطيبن لمن اتمرض
جنود دموعي تعبت بس عريف الليل
شمايغفن بعيني وهو صاح انهض
رد مع اقتباس
المشاركة الأصلية كتبت بواسطة سام2
