((بحــــر الهجــر))
عطش كلبي عليك وانته بيدك ماي
شفت الماي بيدك ليش بديته
ابحر هجرك حبيبي انه غركان
رجعت اشلون عالغركان غطيته
ماهزك ظميرك عني من اتروح
موهزيت حيلي وكلبي هزيته
بخناجرمن طحت لاكتني الكاع سيفك من عمه بنص ضلعي حديته
مو مذنب بحبك ما أظن غلطان
قاسي وياي دوم وياذنب سويته
الذنب ذنبي حبيبي اتعلقت بيك
ماكفاني هم البيه خليته
انجرح كلبي بجفاك انتظرك اتعود
من ايست منك بالملح داويته
عله جدران روحي شوفني اشخليت
كتبت اسمك عليها بدمي خطيته
ياوسفه اشكلت من طيفي اتلكاك
درت الوجه عنه بفشله رديته
من جنت بحنانك وجهي ايشع نور
فاركني حنانك نوري طفيته
جنت انته تعزني وانه اعزك حيل
هسه اتظوج مني وغيري عزيته
وجنت بحبل وصلك دوم مربوط
حبل وصلك كطعته بعجل كصيته
جمعت ارماد حبنه بصرخة الهيهات
تعنيت لطريجك بيدي طشيته
الك وحشه التضكني بضلمة الليل
موحته النجم بهمومي ساليته
طيرالحب غفه اعله جتافي اسنين
كسرت اجناح طيري بصحره ذبيته
رد مع اقتباس
