"" سلاح الهجر ""
فوك راس العين شلتك من اجيت
وانته ما تلفظ إلـ (أهلا ) من أمر
تدري نيتي وياك حلوة وكلهة خير
إذن ليش تصير وي گلبي الشمر
مترة چان الموت عني وما اجيت
هسة شترجة ؟ وصبَح عني شبر
قـُصر من عندك شفت بعيوني هاي
لا تـــگلي عــيونك ألبيهن قـُـصر
عشرة بالمية چنت منطي تخون
الواحد انته اعشگتة والباقي صفر
جسر سويت ألگلب حتن تفوت
من عبرت شبيك ؟ فلشت الجسر
تملك بروحي ارض كلها اشتياق
وآني يمك شوگ ما أملك متر
يمي لا تاخذ ولك دور الحمام
سوالفك ذني ميمشن عالنسر
نار وياية وچنت تطفة أگول
ومن طفيت أتحولت لكن جمر
أجر من ربك إذا انته تريد
گلي ياهو ألغيرك ؟ تكسب أجر
جبر لمن تنكسر ليدك يصير
أشتحط لكن إذا گلبك ينكسر
مدري أنته الجيت زيدت العذاب
مدري جابك حتى تذبحني الفگر
ماله قيمة الـ (س) إذا أ ُس ماكو بي
وصعب حلة يصير إذا صار بجذر
المد إذا ما خلة للجزر احترام
بعد ميشَـوف أبد وجهة الجزر
الليل إذا ماحسب لوكت الشروق
لازم أيكضة ويشگ حلگة الفجر
العجـِـز اكبر صورة لو بيده يشيل
مـــحد يصفگلة إذا عاف الصدر
من تريد أتجيب عذرك للسماح
جيب نيتك حتى اصدگ بالعذر
گلبي درعتة بدرع لا للدموع
يعني بي ميأثر أسلاح الهجر
من غدرتة الگلبي ماشفتك صحيح
لكن اشتميت بالحضنة الــغدر
حـَـذر ما ماخذ چنت من السيوف
هسة من سيفي إذا اسلة حَذر
فعل ماضي أعلى الـ ( هجر) مبني الرجوع
وفعل ( نسيانك ) مضارع مستمر
عالگلب لا تهد جيش الذكريات
تره ايدهلك بس تصل جيش الصبر
فوگ صح انته صرت بس استفيق
الگاع يمسح بيك إذا ضاج الحَدر
روح متحصل أذا ترجعلي كوخ
وألك بالجنة إذا ترحل قـَصـر
نخلة طبعي المازگاني بأيده ماي
لو يموت بصفي ما أنطي تـَمُـر
لكم مني ارق تحيه
رد مع اقتباس
