وديلي اخر صورة اخذوهه الك..!!
وَديلي آخر صورة أخذوهه ألَك
رايد أشمهه وأبجي جي طَولِت
ذاك القطار ألبي خَذوك ومشوا
أبصدري أحسهه السِجة مِن سافَرِت
دَليني وين الكَاك ؟ خــاطِر أجي
كَاع الله مَلت جِدمي مِن دَورِت
كل لحظة سِت ساعات أنطرَك تُمر
گدام ميل الساعه حيل خجلت
مَوعِدنه يَم الشِجرة مِن نِلتقي
أغصان طكَن بيه وينَك نِمـــت ؟
من أمشي واسمَع صوت يِصرَخ عَلي
وين الله اكَولَن (أنتة) مِن ألتفت
محتاج جَيتَك ولو مو بالصِدكَ
نٌص حِلم قابل.. هاي أذا وافَقِت
كَدام ناسَك راسي مايُرفٌع
مو فَشلة بَس بِالكَاع أدَورَك جِنِت
عطاب أجر من رحِت ماجٌر نِفَس
هوة الله كَمت أختِنِكَ بي من رحِت
راس الجِكَارَه بنار أورثة جِذِب
من عيني هيجي إبغَيبِتَك وَرثِت
يا شارع الأمشيه إلك بي أثر
إهنا ضِحَكنه ..إهنا احِبَك كَـِلت
إهنا بِجينة ..إهنانة. لا أستِحي
شتريد أكَلهم مِن خَذك كـَيَفِت
جَم نَظرة ظَلت أرد اشُوفَك .. تِجي؟
ماريد أمرلَك كَلي ..ليش أسكَتت
صَفكت مِن اخذوك مو أكرَهَـك
ضنيت إلي إيجيبوك من صَفكت
سألوني عَـنك بس تريد الصِدك
عرفوك رايح مِني جي حومَرت
الهوى إبهجرك بَس يِطكَني أنطرح
ياخــذني... يَمَك الله أذا جَذَبِت
ماجاك ؟ مامَر ؟ مانِشَد ؟ ماسِأل؟
كَـد ماحِجوهن بذني أحِس طورَشِت
يادَمعةْ نِزلَت مِني إذا مو إلك
الأيتام صُفنوا بية مِن دَمَعِت
ورقة آنه والشِمات أحِسهٌم رُمح
سألوني وينه وبالحَجي اشكَكَت
فاتت فَراشة إبصَفي ورفَعت إدَي
حَسبالي انتَ الهسَبب سَلمت
ياهوة بَعدَك كَال ضِكَت الأَكِل؟
الكَصبة أسمَن مِني إذا قارَنِت
لَمَن أنام أهواي ضَنهُم كَسَل
مادروا أسأل موتة عَنَك جِنت
للمبدع الشاعر ياسر التميمي
رد مع اقتباس
