نخوه إگبال عينك گمره عالباب
او روح اتذوب مثلك عاذره أحباب
تصفحت الوجوه او ما شفت عين.. تفز بالمستحه او تخجل من إعتاب
لگيت ابماي وجهك صهوة الريح
- تمد ذرعانها او صاريها ميطيح
تدور الغيره بيك اهموم بالراس.. او تطوف أنهار روحك خضره بالعين
اشوكت ما جيت الگه إچفوف الوداع، تهز ملگاك وادموعك چوانين
نميل إويه السنابل عذر للگاع.. وانته إمن المواسم تحصد اونين
البخت خرزه او حمتها اثياب العليك.. او تريد الناس من جدك نياشين!
شجاع انته او خبز نار التنانير.. تلوّن بيه خدك بالنياشين!
عبرت اسنين تغرف بالنواطير.. و"المعيبر عبد".. عده الملايين
تفوج او لا يهمك عرض الشطوط.. تخوض الماي وانته ابشرجي واتعين
تمطر عسل گلبك نذر للضيف.. تدير الگهوه مهجه إبلا فناجين
هلي والدمعه گبل الملگه اتطيح..
والهوسات تعله ابكل مهب ريح
توازيك ابمزنها امطار تشرين
من تعبك رويت اعروگ الاشجار
رد مع اقتباس
المشاركة الأصلية كتبت بواسطة حيدر الغديري
