ليش تجبرني أحبك مو حرام ؟
إنت مو ذاك الحبيب اللي أحبْ
آنا جربتك طلع حچيك سرابْ
وكل وعودك بانت وطِلْعت چذبْ
واكتشفتك مو مثل باقي الرجال
بس على اصحاب المراجل منحسب
إنت محتاج اليدلّك عالطريق
واليعلمك درِس من تهوى وتحب
خَلْ اعلمك درس عن معنى الوفاء
وانت كل علومك الغش والنصب
اليحب لابد يلزموه بعقودْ
واشتراطات الأبد ما تنكتب
اشتراط موقّع بحس وضمير
مو حبر يومين وثالث ينشطب
وانت لا حس اليلزمك لا ضمير
لا علم وياك ينفع لا كتب
إنت مدري منين طالع لي وتريد
أگضي عمري وياك بس تعب بتعبْ
إنت سچين بخواصر من تجور
وآنا طبعي وياك ما أبدي الغضب
بالحِلِم وياك اعدّيها وأگول
هيّ زلة ابن آدم اطباعه الذنب
بس شِفِتْ وياي زلاتك بحر
إنت شايف بحر يتغطى بترب ؟
إنت كل من عاشرك يگضيها ضيم
وكل شخص خاواك لابد يكتئب
الناس من تمرض يصير المر دواء
وانت مرك داء أبد ما ينشرب
حاوَلِتْ أتصبر وياك وأگول
بأول الخطوات تونه على الدرب
گمت اخادع نفسي واچذب عالضمير
والتمس لك عذرْ وادري اشگد صعب
صبّرت روحي وگلِت يمكن يجوز
وآنا أدري التمر ما يرجع رطب
خلنا نعلن خاتمتنا بلا رجوع
كلمن الله وْياه ونكفّ العتب
النخَلَ من غير جمّار اشيفيد
كل نفع ما بيه بس يرهم حطب
رد مع اقتباس
