يبني
يبني كل طلعة شمس ولها غروب
وانه اريدك تشرگ امن اغروبك
لو صبح وزن الزلم ثگل الجيوب
خلّي وزنك من تخف اجيوبك
غير بأوّلهن اذا صار الزماط
ورجع اخرهن سويت الماغزن
لا تگول اني او تمن منّة بخيل
ماتمن عالگاع گطرات المزن
لا تأمّن ضحكة ال أومه ابگفاك
احذر اچفوف العليك اتنادسن
گلبة الحيّه چتل لاتستهين
وصاحب الغدّار مغشوش اللبن
يبني عيب اعله الشبع والدنيه عوز
واليتيم ايدوّر الخبره ابچفن
والأرامل يبني محتاجه الغيور
يبني شگ ثوبك اذا يمّك بچن
لاتبيع اشما گصه اوياك الزمان
و لو غصب بعت المهر اخذ الرسن
موت واگف وكسر اعيون الزمان
او صول ميّت لو خواتك هوّسن
موت عابس لا تموت ابلا حسين
او نام بجروح الأبد ماينّسن
خلّي ملچ الموت يعرگ من يجيك
وختم ابآخر نفس يابا الحسن
ويبني لاتبچي علي بس دمعتين
او غسّل اعيوني العلى اثنين انطفن
بااليمين اكتب احبّك ياحسين
وبااليسار اكتب احبّك ياوطن
لو ذنب حب الوطن اشري الذنوب
لاتبيعه او لاتبدّل ثوبك
يبني كل طلعة شمس ولها غروب
وانه اريدك تشرگ امن اغروبك
السيد عبد الخالق لمحنه 2003
رد مع اقتباس
