شنو عاشگ گبرمالحظه حاچي وياي
هم لو بيك ميت چا حچه بگبره
ظهري من الطعن چم علگ شدو بي
اليجي يطعني يصفن ظهري لو حظره
اليعصر دمع امه يطيح اخوه المات
ومن اعصر دموعي تطيح الك ذكرى
ضيگت النفس حتى استلذ بالموت
عكسك ماعشت ميت وهوى بصدره
گبل چان الهوى يدگ بابي حتى يفوت
بريتي ويحترگ من يرجع بحسره
وهسه اشتاگلك كلما اشوف أثنين
يمشون بدرب وبخطوه مختصره
عليك بداعتي هم سولفت وياه
هم گتله حبيبي الموت ينتظره
هم گتله الشمس طلعت عليه باليل
هم گتله شبقت چم ذكرى ع الشجره
اذا تسكت تطير حروفك بلا صوت
وتكتب ع الهوى ضيعنا نص عمره
مشيت ومرني صوتك عكس دربي وراح
زرعت انساك بس خضر وهم فكره
بتجاعيد البوجهي العنكبوت يتيه
نبي بيها ومغاره و وادم تنطره
ولتگلي ع جفنك چان يغفى الليل
المايعرف علي مايفهم الزهره
بحلم نعسان اجيك بطيف بي خدران
زراگ السمه بعينه وعينه لا حمره
نظره عيني چان يخاف منها الذيب
بس هسه شبر ماتعبر النظره
رد حسبه حلم مشتاگ اضوگ النوم
وجهي من السهر بي طبعو الگمره
انا دمعي الوگع بلل خيال الماي
لجلك لان شايل حرگه العشره
صوت الحيه هسه يرگص اكبر ناي
خلگ فلاحي مات وذبلت الشجره
بلا چفين اني ونهر مهرك چان
المثل حظي وقسمتي البلم ميعبره
وزفوك بنهر مو بالنهار بليل
مثل روجه بنهار انشافت العبره
وعلى باب الجفن كتبو شمس متفوت
وگالولي وَهَم اصل الشمس سمره
واقنع بس احيرآ من ينام الليل
بيضه وجوهم بس تنگلب صفره
مثل مامشطت شعرك امشط الليل
چذب بس هسه غيري المشطو شعره
جرحك چان يشفه بشفتي مو بالخيط
بس هسه ع جرحك نامت الابره
رد مع اقتباس
