مناجاة
للشاعر خالد البارودي
چنت آنه من أحـچـي تجي اشفافك
تسد اشفافي و گليبك يدگ
و اليوم كل ضحك الضحكته اوياي بايام العشگ
وديته لك يابو فرگ
وخليت بس عندي البچي تذكار يحرگنی حرگ
و أتخيل دموعك صدگ
ثاري طلع ساسك رمل ما بيه عرگ
واردود أرد اردود من چنه و چنت
لأيامنه الذاك الوكت
يوم الأموتن لو جزيت العگد و لوجهك شفت
يوم الأطيحن لو مشيت بدرب ملفوف ابّشت
يوم إيدي بيدك يا حلو نلگط رطب
واشفافك الـچانت عنب و النخل یرگص و الغرب
چم نوبه گتلی اطيور كون انصير و انعيش ابطرب
حتى السمچ فک عینه یتعلم عشگنه او ما تعب
تالي ظهر حبك جلب صيهود يا شط العرب
ريت الزرع لسگيته عا گول او حطب ريته جدب
حلوات گعدات المضت چتف ابچتف
تذكرها يا أحلى حلو واترف ترف
وايدي اعلى شعرك و الشعر سعفه يرف
و الماي شاهد و الجرف
وين الحچی الگلناه يا أكبر صلف
ريت الجره و الصار ما صار او جره !
ولا أسمع اصياح العرس :
" يفلان جبنالك مره ، من غير حمره امحمره "
دشن سچاچينك بلب احشاي سون مجزره
وتدري يبعد الروح من جاني الخبر
فزيت ... ظليت ابكدر
و النخل ذاك الچان فرحان إحتصر
حتى السمچ مخلص طلع و لبلوتي طگ و انفجر
من سمع گطعولك مهر
راح او نسيته ابساع و اگطعت المهر ؟
ريت الگلب ما عاش فرحه اوياك وانگلبت قهر !
ياريت گطعان المهر گطع العمر
و الموت كون اعلى السمر
كل السمر و أهل السمر
كل واحد اليهجر وليفه ريته مگصوف العمر !
رد مع اقتباس