هنا

[المرقب]

قبل شويه سولفنا انا وياك على علاگة المسواگ
ياترى انته ابو بيت .. يعني شلونك ويا المسواك

واكو مقوله على اهل الموصل انهم كاصين ايديهم
هالمره نريدها بصراحة وعلى لسان مصلاوي
مامدى صحة هذا القول؟

[جرح قديم ينزف]

اني ابو بيت من الدرجة الاولى
ورهيب بتلكي الفواكه والخضراوات وحاجات البيت
اما المقولة اللي على اهل الموصل
هذا الشي ما موجود بس اكو بعض اللي عاشرو اليهود اللي كانو بالموصل
وتعلمو منهم الحرص لا البخل فالموصل مدينة كريمة باهلها وناسها كرماء
في دكة الشواف تحاصرت مدينة الموصل وما بقى فيها من المؤونة ما يكفي
لسد رمق 10% من الناس فيها فمرو بجوع وهذا الشي خلاهم يعملون غرفة خاصة
بالبيوت يحتفضون فيها بكل ما هو قابل للخزن دون تبريد والتي تسمى مونة الشتاء
اعتقد انه ماكو مدينة بالعراق مثل الموصل تصرف مواد غذائية من الاسواق
ههههههههههه نكته فد يوم مصلاوي قاعد يشرب شاي وقفت ذبانه على استكان الشاي
مسكها وخلاها على استكان الشاي وعصرها وقاللها اشغبتينو زوعينو يعني اشربيي ذبيه
هههههههههه

[المرقب]

ههههههههههه
قويه

انا عندي اصدقاء من الموصل .. لما اروح لبغداد يزعلون اذا ما اكل عندهم

فامزح معهم اقوللهم .. اشك بيكم مصالوه .....

انا اشوف ان اغلب العراقيين مسرفين
حتى لما اطلع خارج العراق اشوف ان العراقي يسعد اصحاب المحال التجاريه لكونه كثير التبضع

ثامر .. انت قليل التواجد .. لكن حين تحضر تكون صاحب حضور جميل
ياترى .. هل تحس ان هنالك من يتابعك .. او يعجبه قلمك؟

[جرح قديم ينزف]

هو اسراف صح بس قبل كل شي هم كرماء
اكرم شعب على وجه الارض هم العراقيين
انا سافرت كثير من البلدان العربية ودول الجوار
ماشفت اهل غيرة وكرم واخلاق واصحاب عشق لتراب الوطن مثل اهل العراق
من الشمال الى الجنوب وعاشرت اهل الجنوب مثل كرمهم وملكاهم ما شفت

اما عن تواجدي بالمنتدى انا صاحب عمل واكثر ايام عملي في فصل الصيف
وتواجدي بالمنتدى حسب الظروف لكن ما اغيب اكثر من اسبوع واشتاق للمنتدى دائما"
واعتقد اكو كثير من الاحبه الاعضاء يتابعون كتاباتي وتواجدي وهذا يظهر من خلال الردود
والمشاركات اللي تجي على مواضيعي

[المرقب]

يعني ما اعترفت منو ههههههههه

زين ممكن اعرف علاقتك بالشعر الشعبي ..
وهل انت من المتابعين له
ومن يعجبك
واريد فد مقارنة من وجهة نظرك بين الشعر الشعبي العراقي
والشعر الشعبي في دول عربيه اخرى كالخليج ومصر والشام

[جرح قديم ينزف]

الشعر الشعبي انا اعتبره غذاء الروح
ومساحته في النضم واسعة وحسب اللهجة
وكل دوله الها طابع في تنظيم هذا الشعر
بصراحة ما اتابع الشعراء الشعبيين بكد ما اتابع الشعر الجميل
والخليج الهم مجال في نظم الشعر رائع وخاصة الامراء منهم
اما الشام فشعرهم بلهجتهم راقي وجميل واكثره في الابوذية
في العراق يعجبني شعراء طور جبير الكون وشعراء الابوذية
في الجنوب وشعراء الزهيري في الشمال في منطقة الشرقاط وما حولها
امثلة

عينة يربي لو نخاك البشر عينه
سودة وما تحب الكحل عينه
رفع طرف العباية وشفت عينه
شفت ميزان ونجوم وثرية

متعجب انت تكول هجرك مردهن
عد ولفي عشر بتوت عمده وحركهن
مص ارد امص هواي مص الطماطه
واشبج العشره بحيل من حد رباطه
يا يمه ليش وليش جبتيني للظيم
الدنيا بس وياي تمطر بلا غيم
يا يمه لا تبجين لو ابنج يموت
ابجي على موت هواه وبعالي الصوت
متلكيه هالنسوان خاله ابجن ابجن
لو تبجن على هواي لو اسب اهلجن

ياليل ما قصرت بس الفكر مهموم
صابر واشيل القهر وهموم فوك هموم
حسيت ون الفجر محمل جديده هموم
وين الصديق الوفي ماشفت مثله جار
مدري الوكت عالبشر لو بس علينا جار
ناديت مثل الهبل لاكو خوي لاجار
مثلك رفيج وشهم ويشيل عني هموم

[المرقب]

جميل جميل
الحوار وياك حلووو ... وماينمل
لكن اكو ناس جاي اتاني دورها تريد تسأل
فلابد قبل الختام من شي تقدمه للأعضاء من كتاباتك
وان تقول كلمة اخيرة قبل لأتركك بيد الاعضاء

[جرح قديم ينزف]

ايها الساكن في جنبات قلبي
اسرح .. فهواجسي منفتحة لك
هدير انفاسك في اذناي لها صدا"
وآهات عشقك في قلبي تتوه
ترتكن هنا تارة وتمتحن صبري
وترحل في ذكرياتي بعيدا"
فهمسك انين اقداح هوى
تنتشي بها روحي حد الثماله
تسكرني عبرات دمعك
وتغرقني في سكون قدري
اشتاق اليك في ليلي الف مرة
واحتضن اوهامي واغار
واهيم بشوقي فابكيك في وحدتي
فارحمني انا التائه المجنون
بك انت فأنت هو حبيبي

اشكر سعة قلبك وصبرك وجمال روحك
امتعتنا بافكارك ومواضيعك الرائعة
اخي وحبيبي المرقب
قد اكون بالغت في سرد الحديث ولكن ضغطت على مكان الالم ففتحت مغارة النوى
لتبوح بما في القلب من حديث خرج بعفوية وسلاسة كلمة اخيرة
شكرا" لك وشكرا" لكل من ساهم في رقي المنتدى وشكرا" لكل عضو منح قلمه
وعطائه واحساسه ووقته لرفع ورفد المنتدى باجمل وارقى المواضيع
اتمنى التوفيق للجميع وان يمنح بلدنا الغالي العراق الامن والامان والتقدم
ويصفي القلوب على بعضها ويرفع راية ديننا الاسلام الى اعلى المراتب
شكرا" لك وبالتوفيق

[المرقب]

اشكرك جدا .. اعجبتني جديتك وصراحتك وروحك الصادقة
تعرفت عليك اكثر .. متمنيا ان اكون قد وفقت في ادارة هذا الحوار


والان .. احبتي .. الطريق مفتوح امامكم لتدلوا بدلوكم
وهذا ثامر العراقي يستقبل اسئلتكم ..

فتفضلوا وعلى الرحب والسعة

[سراج]

كانت اسئله رائعة من الرائع المرقب
والاجوبة ايظا بتلك الروعة
شكرا لكم تلك الكلمات التي كانت فيضا عذباً بعذوبه نهر الفرات


ليس لدي لكم سوى الورد اقدمه تعبيرا عن شكري لكم