ارد احجي قصيده بيهه اشرح ضرف اطفال العراق
راجعت عندي قصايد من زمان بيهه شي عن الطفوله
بس شفت ما بيهه جمله تحجي بالموجود وتصور الاشوفه لذالك جنت اطلع للعجد
ارد احس بالحال واحجيه بالشعر صدفه لاكاني طفل كلش جميل
استغربت سيماء وجهه شكد جميل واشكثر خشنات اديه
كتله من لعب الاتاري كال من لم القواطي بالعجد
شاهدت سلايه بيده من سئلته منين هاي كال هاي منهد ما جنت اشتغل بالعربانه
اتمرضت امي وبعتهه حته اجيبلهه دوه
وجان مشكوك القميص من الردان والدكم مشدوده شد شعر بيه اني اتباوع عليه
كال عندي انه جديد امي كالت من يجينه العيد البسه وصارلي شكد انتضر ما اجه العيد
كتله البسه لو رحت للمدرسه كالي انته شكد قديم
اني امي بطلتني من ابوي انعدم بايام النضام جان اخوي شويه شاطر
عود خليناه يكمل انكتل ذاك اليوم من صار انفجار
شكد ضجت مديت ايدي بجيبي اورثلي جكاره
لزم ايدي وكال عندي فلوس لا عمي اشتغل
وانحنيت اعليه او لجله انحنيت وجان عركان الطفل
امسحت وجهه بديه كتله هم تتمنه شي
كال يوميه كبل لا انام اضل اتمنه ساعه ساعتين تالي اغفه وامي تندهلي الصبح
كتله مثليش التمنه كال يوميه اتمنه اجمع جم فلس
ارد اجيبن شيله لمي شيلة امي مشككه سنين صار بيتهه وما سيرت
كتله عدكم يعني بيت وراح عني وبعد مده صار صايح
كالو الارهاب فجرله طفل كمت اركض بس ركض كلش ثكيل بالضبط ركضه بحلم
الناس هوسه تلم وذر
شلت جف وبس لزمته اعرفته جف ذاك الطفل باقيه السلايه بيده
وجف الاخر مرمي غاد بيه علاكه جديده وبيهه شيله
ذيج الاغله من البريسم هاي مشريه بدمه
كمت اصيحن امه وين ذيج كالو عالرصيف متربه بلايه عبايه
حاطه الراس بحضنهه تكله اكبر هم جنت انته زغير وكبرك هذا الثدي
وكامت تلولي بعلاة الصوت وتبجي الصخر
دللول الولد يبني دللول بعدهي مشككه الشيله يمدلول
للشاعر احمد ماضي
مع تحياتي اخوكم حسن الرماحي
رد مع اقتباس
