درر العراق

مصطفى العراب · 20/December/2013

**الذبانه المطلقه وصديقتها ام السحوره.....
*..
.
.
.
.
.
.

ﻛﺎﻥ ﻳﺎ ﻣﻜﺎﻥ ﻓﻲ ﻗﺪﻳﻢ ﺍﻟﺰﻣﺎﻥ :
چان اكو ذبانه اسمهة لولو
هاي الذبانه حلوه كلش...وجانت تشتغل رئيسه الذبان على كل محلات الحلويات والكافتريات الي اباب الشرجي
وخلصت عمرها بالشغل حته تعيش اهلها الذبانين
فد يوم شافت ذبان بالصدفه وانعجبت بي...
وهوه هم انعجب بيهة
وبدت علاقتهم وجانو يتواعدون يم جبار ابو الشربت ومرات يم الحمداني
وصارت القسمه وتزوجو
وعاشو حياه حلوه
بس المشكله هاي الذبانه عدها صديقتها تغار منها لان جانت سمعتها مو خوش بين الذبان
يعني حسب ما سمعت تروح للروابي ووووو فاهمين قصدي
قررت هاي الذبانه تحطم حياة صديقتها
اول شي سوته سافرت وسوت كم عمليه تجميل
وراهة راحت لشيخ مال ذبان بالعبيدي
هذه شغلته سحوره وهجمان بيوت
كامت وسوت سحر لصديقتها
بده زوجها يضوج منها
وهاي الذبانه ام السحوره كامت تروح ع زوج صديقتها وخلته ينعجب بيها
وره فتره تعلق بام السحوره
وكام وحول الاملاك كلهة باسم الذبانه ام السحوره
وجبرته يطلگ صديقتها
طبعا صديقتها اجاهة الخبر
خسرت حبيبها وزوجها وشغلها واملاكها
متحملت الصدمه وحاولت تنتحر
راحت لجسر الصرافيه وقررت تشمر نفسها
بالصدفه شافها زنبور اصفر
عرف ان الذبانه المطلقه تريد تنتحر
لزمها وكاللها احجيلي
حجتله قصتها كولها
والزنبور وعدها يساعدها
اخذ الذبانه وراح للخليه وحجه لامه ع القصه
ام الزنبور كالتلها انت نامي اليوم
وباجر اخذج ع كرايبنه
الخليه مالتهم جوه جسر السنگ
المهم راحولها الصبح وحجولها القصه
كالتلهم اطلعلكم السحر بس بشرط
تجيبولي قميص زوجج
وتجيبيلي شويه من جناح الذبانه ام السحوره
طبع الشغله جانت صعبه
بس المهم دبرتها
وعرفو ان العمل موجود بنستله كالاكسي ومدفون جوه النبكايه الي بحديقه الامه بساحه التحرير
راحو طلعو السحر
وزوجها رجع لطبيعته ورجع الاملاك
ورجع يحبها اكثر لزوجته لانها طلعت حامل ب 1653 بيضه صب صب
وعاشو عيشه سعيد
وعاشت ايدكم ع اندماج
اذا ماعجبتكم تروح عليكم قصه الصرصر وزوجاته 7

محمد الساري · 20/December/2013

هههههههههههههههههههههه حلوة

warda · 20/December/2013

ههههههههههههههههههههههههه ههههههههههههههههههههههههه ههه

قصه حلوه والحقيقه هل شي موجود بين الصديقات
والغيره والحسد وخاصه اذا وحده فاشله وتشوف نفسها مو مثل صاحبتها الي احسن منها والناس يحبوها ...فهاذي الصديقه الغياره تكوم تسوي كلشي حتى تداري فشلها حتى لو كان على حساب سمعة صديقتها

طبعا هذا النوع من الصديقات لا تغز بيهم العشره ولا الايام الي عاشوها سوه
وتشوف قلوبهن سوده دائما ومكروهات من قبل اكثر الناس
.............................
وهل شي ناتج عن تجربه شخصيه مع احدى ال........((كنت اسميها صديقتي بيوم....بس مع كل اسف))زايد عليها اصلا كلمة زميلة عمل

شكرا للقصه الرائعه واحلى تقييم