تذكرني بس كَلبك كون الذاكره تسعفه
انه اول نبض دكَيت بي واول هوه ورجفه
لوحه وبيه نار وليل وبلابل شارده وزفه
انه من خذت جفك كلشي مابقى بجفه
انه الظل اثر جدمك لهسه طابع بجتفه
جمع صورتي من الريح كض محارة العفه
الكالي بخيالك خيط فك سنين ملتفه
دور وين ماشي الموت واندل جرحي من نزفه
دور عن ملامح روح ملامح وجهي مختلفه
دور مثلي من ضليت ادور للدمع صرفه
من خليت بيه احبابي والشمات تتشفه
صرت بموقف الينبآكَ لحنه واحد يعزفه
عفتني اتعثرت والشوف كد موادعك كفه
افرش ع الجفون وعود حتى اسرارهن تدفه
اشيل من الزعل بصمات خاف الوادم تكشفه
يل تارك دليل اثبات ضحكه وسالفه وشفه
بطعناتك ولا حسيت مثل حجايتك ترفه
لا تذكرني مثلي هواي ترضه تعيش المنفه
ولسان الشراع يطول من يفارك الضفه
خلص بستان الشوك وانه بعازة السعفه
اظل عطشان بس ما اضوك من طيفك بعد رشفه
تجي بالصدفه يجوز ترجع تاخذ الصدفه
رد مع اقتباس
