انت مو طالب
انت مو طالب اكيد انت العميد
اي من تطب واحدنة يرجع ليـــ ورة
الناس تستاعد واجت تركض وراك
وعلى محبتك هالبشر تلزم سرة
من تطب للقاعة يتراجف الباب
وتوكف السبورة لك والمسطرة
جنة بيهة انتة.. اذا انت بيهة تفوت
ولما تتركهة عبالك مقبرة
ترة الاداب جولة وكل شي ما بيهة
كآبة الجامعة وشخصك محليهة
لقبولك قدمت فايل معاناتي
وبكيفك بعد لو ردت تلغيهة
بقرارك حاربتني ورقنت قيدي
ومتقصد تذلني شلون ترضيهة
اذا انت العميد وببيدك كتابي
واسباب الفصل كلي شتسميهة
ادرس بالصباحي وضينت حظي
رجعوني مسائي وهاي تاليهة
وارسب بامتحاني وعندك اوراقي
ولو ما كيفك ما حمّلت بيهة
اجة التاريخ كلة ينقب عيونك
وبخدودك اهرام الجيزة نلكيهة
وهتف الاعلام وبإسمك شعاراتة
وعراضة تقدم كبالك يسويهة
اكسيكيوزمي وما عرف معناهة
وبنات الترجمة تترجم نخليهة
الآ من ناصرٌ؟... ياما العرب قالوا
عليش بصدك العالم تأذيهة
وتضاريس بجمالك توجد انواعة
ياللي مجغرف بروحك وانت ضانيهة
يا حس البلابل سجلت صوتك
نغمات بجهازي وراح اخليهة
حتى اشتاكلك واتولع بنارك
واتعنى الصبح وبمايك اطفيهة
قبل طلاب شكثر ماتوا يحبونك
يالبايع ثكل دشوية حس بيهة
اذا حتى الامن كاموا يلحكونك
واساتذتك تكبسل من تحاجيهة
روحك خلي اكبل اني وياهة
وانت مأتمن محد سمع بيهة
لأنك دوختني ودوخت راسك
كافي من اللعب هاللحظة ننهيهة
احبك راح اكول وخلي نتباهى
وبين اهلك واهلي تعلك خليهة
يا ابو عيون بجمالك حايرة الطلاب
واني اول شخص بالكون حبيتك
تتباهة بجمالك والجامعة للتعليم
وتاخذلك تحية اقسام كليتك
من تحجي بعيونك واني ارد بالعين
ولك هاي اول اشارة وبيهة دليتك
مرات ارد اعوفك لكن من تروح
اضل واكف بدرب الرجعة تانيتك
لك صح انت حلوو...
لك صح انت حلو ومتكبر ومغرور
لا تثكل علي كافي انهجم بيتك
مو ذاب الكلب ووصلت لحد الموت
كلهة مكبلة ومرتاحة الطلاب
و انا بلا كبل وانتظر برقيتك
من يوم العرفتك اعلنت اضراب
زعلت الدنيا وانت راضيتك
يا دكتور قلبي ويا عميد الروح
انت استاذ عيني وصدري كليتك
اغار من الوكف وياك لو لحظات
ومن كد ما اغار اعذرني سبيتك
ياللي منور العمادة وسنتر العشاق
ارجف وارتبك لو مرة لاكيتك
اكوم اقرة شعر ومن بين هالطلاب
يا ريتك تفتهم يا مني يريتك
اجيتك اريد اصارح واكشف المستور
اريد اعرف يغالي شنو تاليتك
يا ابو عيون الشعر ما وصفك جذاب
حليو انت وكمر الاداب سميتك
احبك هذا طبعي وما اضم عليك
واعلنهة للناس اليوم حبيتك
-----------
رد مع اقتباس
