شعر شعبي
حطني ابال كل لحظه العشتهه وياك
وشخبط ذكرياتي بحايط النسيان
وارجع لم حجينه الطلع مدري منين
سد باب السوالف واستر الحيطان
قلق ليلي السهرته وعشك عمري الفات
لحد هسه وضحكتك عالجفن سهران
ذكرتك والحلم غمض اعيونه وفات
خطف من مستحاي امدنك وخجلان
ولكيتك من شفتني وجنت ماملهوف
رغم جيتك ضوه لرية صبح غركان
ملامح غيرك امبينات كلش بيك
من لاكيتني عبالي غير انسان
علية ايامي دارت من درت مكفاك
ودمعة روحتك ما كفه ليهه اردان
رحت واترف زعل بوداعك اشتميت
ريحة ملكه بي ما شامهه الزعلان
تلكيته ابخجل .. وابنكلة الخطوات ؟
شلت دربي اعله جتف الجدم شي تعبان
الصدك محتاجلك وبعمري مامحتاج
قدر حاجتي ابطيبة كلب والسان
غرُك واهسك واستفحلت عالروح
وصبح كل ما املكه امن العتب ذبلان
رش ماي الموادع واسكي بية الشوك
انه شجرة هوه وشهكاتي بيهه اغصان
خريفك مر علي واتساقطت الايام
وبقه نص عشك بية لجيتك عطشان
خلص شوفه ابظهر خطوات درب اجفاك
غلط .. ولخاطرك كلت الك ما غلطان
شرني ابحبل هجرك نشف الكلمات
تنكط احروفهن صارت صدى ابحرمان
سولفلي اعله هسه الماضي نسمه ابريح
يهمني الجاي كله وما يهمني الجان
هز جفني اعله كيفك لان طيفك بي
ثكل من حمل طيفك مو لان نعسان
يبو ضحكة املاكه وبالكفه تابوت
وجهك والكفه جن عيد وي دفان
زرعت بية امل .. حطم اماني هواي
كلبك فاتحه بس قافل البيبان
دورلك عذر تقنعني بي وارتاح
اثر شوكك امبين بالوجه نيشان
ردلي لخاطرك ولخاطر الحبوك
قبلي .. ولاتشد هجرك ابجرحي اعنان
يل ابرد من اشوفك رغم حر الشوك
واتدفه ابضحكتك لو جنت بردان
احلفك بالثواني البيهه جنت وياي
هم تشتاكلي .. ابلحضاتي هم حلمان
اذا ما ناسي ردلي .. واذا ناسي الشوك
شخبط ذكرياتي بحايط النسيان
رد مع اقتباس
