بالصور .. طرق ذكية لتخزين الملابس الشتوية
كل سنة وكلكم طيبين، خلاص الصيف بدأ بحرارته وشقاوته، وأكيد كل ست بيت بدأت تخزّن ملابس الشتاء التقيلة بألوانها الدافية، علشان تفضّي الدواليب لاستقبال ملابس الصيف بألوانها الزاهية.
والنهارده جبنا لك طرق جديدة ومبتكرة وسهلة علشان تخزّني بها ملابس الشتاء التقيلة، واللي بتاخد مساحة كبيرة من الدولاب، من غير ما تشيلي همّها..
1- شنطة البطاطين القديمة
ممكن تخزّني ملابس الشتاء في الشنط الكبيرة اللي بنشتري فيها البطاطين، ودي ميزتها إنها بتكون شفافة في معظم الوقت ولها سوستة، وده هيخلّي قفلها وفتحها أسهل بكتير، وكمان هتقدري تعرفي إيه اللي جوه كل شنطة بسهولة لأنها زي ما قلنا شفافة، وعلى فكرة لو ما عندكيش من الشنط دي هتلاقيها متاحة في أي سوبر ماركت كبير في القسم الخاص بالحاجات الخاصة بالمنزل والتخزين.
2- شنطة السفر القديمة
ممكن تستخدمي شنط السفر القديمة اللي عندك في إنك تخزّني فيها ملابس الشتاء، وطبعا ده هيكون أفضل بكتير من إنك تستخدمي الأكياس البلاستيك، وخصوصا مع الملابس القيّمة اللي بتكوني عايزة تحتفظي بشكلها ورونقها.
3- اعملي مخزن عملي وشكله مميز
دي فكرة ممكن تبقى غريبة شوية وهتحتاج إمكانيات معينة، لكنها هتبقى مناسبة جدا مع المساحات الصغيرة وعدم توافر المكان المناسب للشنط اللي هنخزّن فيها الملابس الشتوية، والفكرة في منتهى البساطة، إنك تعملي زي أدراج في السقف عن طريق إنك تبني مسارات عند أي نجار أو أي ورشة بتصمم الألوميتال، وتمرري فيها الأدراج المناسبة، وبكده تقدري تحتفظي بأي حاجة فيها من غير ما تاخد مساحة من شقتك، والفكرة دي مش بس هتبقى مناسبة للاحتفاظ بالملابس الشتوية، لكن تقدري تحتفظي فيها بأي حاجة عايزة تخزّنيها ومالهاش مكان عندك.
4- استخدمي صناديق التخزين
ممكن تستغلي أي مساحة بين عمودين في أي غرفة نوم في بيتك، وتصممي فيها أرفف خشبية زي اللي بتبقى موجودة في محلات الملابس، وتخزّني الملابس في صناديق خشب أو من الكرتون المقوّى، والميزة في الطريقة دي إنها مش بس وسيلة للتخزين لكن هتعمل شكل جمالي جديد لبيتك، لأنك ممكن تجيبي صناديق حلوة وبألوان مميزة.
رد مع اقتباس
المشاركة الأصلية كتبت بواسطة sawsanmahmoud
