ياشهر عاشور أرحم حالي
بيّه جرحك ظل يون للتالي
۞۞۞
دمعة احزاني على اخواني تصب
وهظـمـي ياعـشــور ابد ماينحسب
من تجيني تلچم اجـروحي الگلب
وتزرع بروحي الحـــــزن للتالي
۞۞۞
من اشوف اهلالك بحزنه يهل
روحي تتطشّر مثل ذاك الشمل
بيك اشوف حـسيــن شايله طفل
وأم تلولي بمـهـــــد لاچن خالي
۞۞۞
جبت ياعــــاشـور ونّات الأمس
وذكرتني بجاســــم وذاك العرس
تحنّه من دمّه وفغى بحر الشمس
ورمله ظــلّت لا حمه ولا والي
۞۞۞
دمعه حمره اعله الوجن منّي اتهلي
يامـحـرّم جــاوب شـخـلّـيـــــت الي
حسين محني الظهـر يم جثّت علي
ايصيح يوليـــدي انفـطـــــر دلّالي
۞۞۞
والله ياشهر الحزن گلبي انخمش
تذكر شـسوّيت بينه من العطش
مهد عبد الله صفه الجسمه نعش
وامّه تـسگـيـه بـدمـعـــها الهالي
۞۞۞
ياهلال الهظم وجهك لو كبر
گمر تتحـوّل وتـشـبـعـني قهر
غاب يم المشرعه عنّي الگمر
وعگبه ياوسفه الشمر يبرالي
۞۞۞
بكـــربـلـه ياريت خلصان العمر
ولا اشوف حسين ويذبحه الشمر
بالحوافر رضرضوا منّه الصدر
وعلى راس الرمح راسه اگبالي
۞۞۞
ياشهـــــر ماتطفه جمرات الأم
وآنه ذيچ الحرگوا اعليها الخيم
بس يتامه وياي مرعوبه وحرم
النـار اطـفـيـها وتلــــوح ذيالي
۞۞۞
ياشـهـر للـيــوم گـلـبي منهـظــــم
بت علي وينضرب متني وانشتم
بين نــــار وخــيـل بـايـتـامي ألم
وبالـسـيـاط مـلـوعـيـــن اعـيـالي
۞۞۞
نسالكم الدعاء
وسام الشويلي
رد مع اقتباس