آخ ساعات المناطر
صارن لعمري عمر
مدوهن ومشدوه بالي
ولن تكلي الناس
أنت شتنظر
شنتظر!
بطران أني
لوهي روحي
تبسمرت يم دار خلها
تنتشي بشم العطر
وماهي بيدي
لويصح بيدي
أجودر كَرب داره
واحفر الروحي كَبر
زغير وربيته بيدي
وجنت اعلمنه القراءة
وكَلمة الحب
جنت اسويها سطر
هايم وكَلبي تسودن
والقدر يحكم عليه انتظر
انتظر عمري الجفاني
انتظر خلي العماني
انتظر ذيج الأماني
انطر أمجازات
ساعات انتظاري
من الفجر حتى العصر
أنا مو بطران
لمن انتظر
حتى امي
جانت أمأمنه عليه
وتكَدر أتحدد مكاني
وهذا جان أجمل عذر
وكل سلفنه
يعرف الخل الخليلة
وقصتي صارت
قوافي الكل شعر
انتظر دمعات عيني
من أشوف أعيونَها
يصيرن حمر
ومن أشوف أعيونها
تنقل خبر
أنا مجبوره من أعوفك
وهذا يعني راح أسافر
وانتظارك
يكسر كَليبي كسر
انا مجبور من أعوفك
بس جسم نحلان اروح
وتلكه روحي
بحضن روحك
من الفجر حتى الفجر
انا أبيا يوم عن شخصك بعيده
تضن افرح لون عَيد بعيده
انا عيدي حزن وخلاف عيده
وعيدي يصير من تكَبل عليه
بقلمي
الفقير إلى اللغة والبعيد عن الحسجه
لكم كل الحب والاحترام
ابو زهراء البهادلي
كتبتها اليوم
19\ 4\ 2013
رد مع اقتباس