قصيدة ( مجانينك )
الشاعر : الشيخ وسام الشويلي
عشق يظهر يبو الآكبر هنف منحر محبينك
هذولا احنا مثل عابس يسمونا مجانينك
مجانينك .. مجانينك .. مجانينك
----
قواميس العشق كلها
فلا قدرت تفسرنا
وحتى احنا ويا قصتنا
شنوصفها تحيرنا
عشق قيس وعشق ليلى
سألناه وتعذرنا
عشق عابس فقط هوه
الـ قدر يقنع ضمايرنا
ولو حتى الـ جرى بعابس
قليل ويكبر بعينك
هذولا احنا مثل عابس
يسمونا مجانينك
----
اذا عابس نزع درعه
لجل عشقك يامحبوبه
مهج لجلك نزعناها
جثثنا بدمها مخضوبه
اذا حر واحد بطفك
اجاك بدمعه مسجوبه
ألف حر هسه متعني
يقلك سيدي التوبه
نقدم الروح يالغالي
نذر لتراب رجلينك
هذولا احنا مثل عابس
يسمونا مجانينك
----
زليخه انجنت بيوسف
حرام ارتكبت بعشقه
واجر ناخذ على حبنا
القميص من القبل شقه
اذا يعقوب ظل عايش
تحمل لوعة الفرقا
نموت احنا فلا نقدر
نناطر ساعة الملقى
ويانا ماصارت
سنابل زاهيه سنينك
هذولا احنا مثل عابس
يسمونا مجانينك
----
تعال وانته مو مبعد
تعال وعاين احبابك
نواظرنا شمع خلصت
دمع يتجارى لمصابك
فدائك احنا ماقلنا
فداء نقول لترابك
فضل منك تخلينا
نجيك ونوقف ابابك
الصلاة للباري ماتمت
اذا مانسجد لطينك
هذولا احنا مثل عابس
يسمونا مجانينك
----
نحبك يامن بحبك
زرعنا بكل شبر آيه
مشينا بدربك ونعرف
طريقك غاية الغايه
إلك نبجي إلك نلطم
إلك نتعنى مشايه
يطيح بهالدرب دمنا
لجن ماطاحت الرايه
يمن من الوريد اقرب
نسألك ابعدت وينك
هذولا احنا مثل عابس
يسمونا مجانينك
----
قسم بالـ ماترك جوده
ترك ع المشرعه جفوفه
قسم بالـ خلتك عاري
مشت مسبيه مجتوفه
نعوف العالم بأسره
طريق الخدمه مانعوفه
نطوفك يامن بقبرك
عرش رب السما نطوفه
يسارك جنة المأوى
وتجي الفردوس بيمينك
هذولا احنا مثل عابس
يسمونا مجانينك
ـــــــــــــــــــــــــ ـــــــــــــــــــــــــ ـــــــ
قصيدة ( لانلامُ )
الشاعر : الشيخ وسام الشويلي
حيــدر .. حيــدر .. حيــدر ..
على جنون العشق لا نلام
كعابس هاج بنا الغرام
هو الحسين مالنا سواه
وحبه اوجبه الآله
لجل الحسين وخدمته انخلقنا
وافضل عباده ينحسب عشقنا
ام الحسن من تحظر المجالس
كل واحد الـ بينا تشوفه عابس
حيــدر .. حيــدر .. حيــدر ..
فلو جرت من عيننا الدماء
دما بكت من قبلنا السماء
لا عجب لو ادميت رؤوس
بل عجب ما ازهقت نفوس
موعجبه نفرش بالجمر دربنا
جمر الخيم متوجر بقلبنا
جم مره سحقت ع الجمر رقيه
وازرق متنها من سياط اميه
حيــدر .. حيــدر .. حيــدر ..
الجرح نادى والشعار حيدر
لو شئت خذ منا دماء المنحر
رؤوسنا لرأسك القطيع
نرخصها بل هي للرضيع
واحدنا من يلطم تصيح دموعه
ليش الحبيب مهشمين ضلوعه
دم يجري من متن العقيله زينب
خل نموت وبالدما نتخضب
حيــدر .. حيــدر .. حيــدر ..
نمشي على الاقدام كي نواسي
من سبيت وذاقت المآسي
كيف لنا معيشة هنيه
وزينب قد اخذت سبيه
وبركضة طويريج من ركضنا
جينا نأدي بكربلا فرضنا
شفنا حبيب يسجل الاسامي
ويانا يلطم ع الذبيح الضامي
حيــدر .. حيــدر .. حيــدر ..
---------------
قصيدة ( لآ ترد )
الشاعر : السيد عبدالخالق المحنه
مآ هو بيها ..
دار خلاف آهلها ماهو بيها
شلي بيها وآبويه ماهو بيها
شبه طفله الـ مضيعه ماهو ابوها
تحسد كل طفل بآحضان آبيه .
----
لا ترد ..
ما ظل اثر كل شي انتهى بسفركم
لا ترد ..
مات الورد من انقطع خبركم
كتبت اعلى دارك .. دمعة انتظارك
----
بويه تدري من غيابك موتي راحه
والـ يسافر يبقى عايش وي جراحه
ردت اشوفك حتى اقلك بالصراحه
ترجع إلمن دنيا ماكو بس نياحه
لا تظن نفس الوضع لازم يجي بديله
لاتظن لمن ترد تستقبلك عليله
ماتت بمسارك .. دمعة انتظارك
----
ادري صعبه من اقلك ماكو رجعه
ما يسرك هذا حالي وداري تنعى
والليالي ذوبتهن شمعه شمعه
ماتشاهد من اثرنا الا دمعه
لو تجي تلقى حزن تلقى الم مصابي
لو تجي تلقى جرح يلجم جرح عتابي
عاشت اعلى نارك .. دمعة انتظارك
----
تابعتكم خطوه خطوه تيهتكم
من مشيتوا وابتعدتوا عاتبتكم
عمري كله لحظه بيها الـ ودعتكم
دورتكم وي جروحي ماشفتكم
ياعتب يشفي القلب وبيا قلب اعاتب
ياعتب واكبر عتب من انسأل شجاوب
تقبل اعتذارك .. دمعة انتظارك
----
انتهينا وتركتلك ذكرياتي
وبصوركم تلقى دمعة امنياتي
تلقى حسره من دعائي في صلاتي
ابحياتي انته غايب وبمماتي
سلوتي مهد الطفل اتصوره والولي
سلوتي ها يالأخو يالـ ماترد حجولي
تنجوي بنهارك .. دمعة انتظارك
---
يالـ عفتني املي دربك بس خواطر
ياما ياما قلتلك ارجع لا تسافر
يقضي يومي وقلت اشوفك بلكي باجر
لا ياباجر سيفه يذبح بالمشاعر
آيست مات الأمل وبيا جرح تجيني
آيست لا ماترد وآني عفت آنيني
تنطوي بمدارك .. دمعة انتظارك
--------
قصيدة ( دمعة عطش
الشاعر : الشيخ وسام الشويلي
دمعة عطش وجروح
جلمة عتاب ونوح
وين العطاشى تروح
إلمن تدير العين
إلمن تدير العين
----
نار العطش تسري .. دمع العتب يجري
وينه الـ تكفلنا .. معقوله مايدري
ياعمه روحيله .. يالحاله قليله
وهاج اختي دمعتنا .. خليها تحجيله
نعرف قلب عمنا .. مايحتمل همنا
بس يعلم بجوده .. مسرع يصل يمنا
ما اظن على الوفاي .. صعبه المطالب هاي
قليله جيب الماي .. من العطش ميتين
----
عبدالله شيهوده .. ذابل ورد خده
نار العطش قامت .. هيه تهز مهده
متغيره اوصافه .. يبست ضما شفافه
ليش شعجب عمه .. بهذا الوضع عافه
من الـ خطف لونه .. قاموا يناغونه
عمك ياعبدالله .. جايب لك عيونه
دمعة طفل حساس .. معناها يا عباس
انا بأخير آنفاس .. هز مهدي جف البين
----
صاحت رقيه آنا .. عطشانا عطشانا
خلص دمع عيني .. والغالي ماجانا
من عاين اوصافي .. صاح الصبر كافي
حتى آنا ياطفله .. هم يبست شفافي
يمكن بعد لحظه .. ينهي القلب نبضه
وانا على هالحاله .. بالموت اريد ارضى
صبر القلب مفتوت .. ارحم لصار الموت
صحت بضعيف الصوت .. ودعوني ياطيبين
----
سكنه ويا عمتها .. مشتركه ونتها
تحجي بعتب لكن .. خجلانه كلمتها
جا وينه اللي يوافي .. واعدنا بالصافي
يدري العطش جمره .. وتفزز الغافي
بدمعي احترق رمشي .. مابيه حتى امشي
صبروني صبروني .. قمت اقبل بكل شي
قللولي راح يعود .. قللولي هذا الجود
بس كلمة المفقود .. ماريدن بهالحين
----
كسر الظهر يوحي .. ماتنتهي جروحي
يازينب وشحجي .. عباس اخذ روحي
يا اختي وعلى وعوده .. ودالج زنوده
وتلقى بعيونه .. سهم الـ قصد جوده
قمت اشتم جفوفه .. ودموعي مذروفه
لو بيدي يازينب .. صدقيني ما اعوفه
من ردت اجيبه وياي .. صاح الاخو الوفاي
ما ارجع بلا ماي ماي .. وعيالك متانين
ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ
قصيدة ( صاحت زينب )
الشاعر : الدكتور أحمد العلياوي
صاحت زينب
قلبي من الهم هلك .. صاحت زينب
الموت لي وليس لك .. صاحت زينب
من قطعك خذني معك .. حسين حسين
----
ياعالم احساسي وياعالم وني
ياساكن انفاسي وياضايع مني
عنك ادور لو تدور عني
يا آخر آهلي ويا بداية حزني
جيت ولهيب من الخيم سكني
امشي ويماشيني للقائك ظني
هل حان ميعاد السفر .. صاحت زينب
خوفي اذا شاء القدر .. صاحت زينب
ما اسرعك .. خذني معك .. حسين حسين
----
هذا انته لو غيرك ع الترايب
جسمك اشوفه ساحه للحرايب
حاضر عتابي وانته عني غايب
مسني القهر من شدة المصايب
شلون ارجع وشرد اخبر الحبايب
خليني انوح واندب واعاتب
دعني اقيم ها هنا .. صاحت زينب
تشرب من دم القنا .. صاحت زينب
كي اتبعك خذني معك .. حسين حسين
----
منظر عجيب وعيني ماتفهمه
منظر رعب خلاني اعيش بظلمه
دليني اوصلك يابو الايمه
ساعدني انته ياحبيبي بكلمه
مثلك رماني الشر ياخويه بسهمه
خل نحرك يكلمني ارد اكلمه
ياليتني كنت الفدا .. صاحت زينب
اراك نهباً للعدا .. صاحت زينب
من شيعك .. خذني معاك .. حسين حسين
----
احجي ويادمك والدما تحاجيني
واسمع ونينك من يحن لونيني
ليش انت نايم ع الترب حاجيني
يانفسي ياروحي ويا احلى سنيني
ياعيني انته وما تشوفك عيني
ما اصدق انت حسيني آه ياحسيني
انته حبيبي المحتضر .. صاحت زينب
وانته في الليل القمر .. صاحت زينب
من ضيعك خذني معك .. حسين حسين
----
الموت إلي راحه من اموتن يمك
ماقدر احمل يخويه همي وهمك
ماعندي عين اللي تشاهد جسمك
خويه انهضم لمن اقولن اسمك ياحسين
بجدك احلفك وبكسر ضلع امك
خل قبري قبري اللي بترابه يضمك
لا عيش لي موتي حلا .. صاحت زينب
روحي هنا في كربلا .. صاحت زينب
من ودعك خذني معك .. حسين حسين
------------
رد مع اقتباس