قصة في قصيده هي من اروع الملاحم الشعريه التي كتبت بلسان حال طفله تزوجت وهي في سن مبكر جدا وعانت ماعانت تقول
ثكلت اللكمه عليكم مالتي؟؟ _مو بعدني ازغيره كد لعابتي
شنهي مرتكبه وسجنتوني بزواج _الموت ارحم واشوه من زنزانتي
فوك راسي البيت واعيالي وجهال _جنت اعجز من حمل شكالتي
كبل كله براحتي اكعد انام _هسه شغل البيت شكك راحتي
زوجي يملك مال ما يملك حنان _وانا املك دمعه بس مو مالتي
اوياي ما يلعب جبير ابكد ابوي _وما يوافق يمي تلعب جارتي
اخذ عمري واخذ حيلي وكل قواي _ريت ياخذ مني جان احجايتي
عقلي ما مبني بعد حتى ابني بيت _ابني مستقبل ردت بدراستي
بنت البعمري غفه ابجفهه الكتاب _انا يغفه ابجفي خدي وغايتي
سجلوني ابصف رجل مو بالدوام _ادموعي كامت تكتب ابجربايتي
انا كلش شاطره امحظره الدموع _وظهري حدب حضرب عكازتي
زوجي يضرب ايده في خدي واطيح _يطلع الدم بيها ترسب حالتي
كلبي اليدك مو جرس والفرصه خوف _والشماته اعيالي كلهه ابساحتي
ميل وكتي اتشلل وما يمشي كام _جنه ميت هيج باقي ابساعتي
انا من يوم الزفاف امعلعله _بالعرس سمعني جلمة لا هله
حاجوا عزرايئيل بلكن يرضه اموت _اتوسلوا بالله الموت سهله اتحمله
سولفولي اعلى الكبر لا زوجي وين _بالكبر يعني انا حيل امدلله
انا اثار الضرب مكياجي صار _العيشه سوده ومن حزنهه امكحله
كتله ورده اشلعلي يشلع كلبي ليش _حملي حتى النوك ما تتحمله
هالوادم اتكله علي بنتك ملاك _ومن يكلهم مرتي اصبح مهزله
مو محبه ولا قصد يرفعني شان _يدري هاي الجلمه راسي اتنزله
ربي وفق زوجي ما من عنده صوج _صوج اهلي وهمه ساس المشكلة .
رد مع اقتباس
تقييم
