حجيك نعم بالهمس ونظرات عينك درس
بالنظره اذوبن شمع شوف شيسوي اللمس.
طولك اقيسه بفكر وانطي اليشوفك عذر
ايشيل الثلج والجمر ويبجي الزمن والعمر
ساعات الك ينتظر ويكوم لمن تجي ويطيح لمن تمر.
بالوجنه اشك عاكسه وصح من اشك العكس
شمس الله تعكس الك لو تعكس على الشمس.
شايل حضارة رمش منقوشة باجمل نقش
ماتعبت هدهدك رمشك حبيبي عرش.
شاشة عرض ركبتك واستديو في جبهتك
حصريا على الوجه ربك خلق شفتك.
عطشان وانت نهر فرصه واجت ياخطر
اتيمم ابيا شرع والماي يمي حظر.
بعيوني اشوفك ضوه والماي وانت سوه
لاتكطع بجيتك تكطع عليه الهوى.
السوك عزل شلع والناس تدفع دفع
تسودنوا لشوفتك لاتطلعلهم دلع.
جسر الحواجب يزف بين الزلف والزلف
عريس ليلك نزل باس الصبح عالجتف.
اليشكل عليه الوصف بسكته ودو ألي
خاف الزمن يسمعه ويرجع زمن جاهلي.
شاركني فدوه بشغل ماتخسر ابشركتك
كل الخساره علي والربح كله الك.
محبوبي اذا سولفت بالروح مدري شحس
صدكني بداخلي تصير الفواتح عرس.
بجايك شكر مااحط حط اصبعك مو سهو
وعاتبني اذا ماطلع جايك حبيبي حلو