حبيبي السني أموت عليك ....
مقال رائع
اتمنى من كل العراقيين من كل الطوائف ان يقرأوا ما كتبه شاب عراقي من الجنوب
رِساله من شيعي..."حبيبي السُني أموت عليك"..
أخي وحبيبي السُني لا تنسى أنه ربنا ونبينا وقبلتنا وكتابنا واحد وكذلك واقعنا المريض واحد..أثنينه تطفآ عدنه الكهرباء وأثنينه موجود بمناطقنه ناس يسكنون ببيوت الحواسم وناس تعيش على جمع(قواطي البيبسي)من المزابل.
صديقي إذا شفت شيعي متعصب وبالنقاش(قافل من الأبي)لا تتعب نفسك وياه وكَله أريد منك وعلى الأقل تعاملني مثل ما كان الأمام علي يعامل الخلفاء..
أكيد أوقات تشوف أخوك بالبيت يقوم بعمل معين انت تعتبره ما مقبول بس هو عكسك تماماً يشوفه مقبول ومع ذلك يبقى أخوك وتحبه وتخاف عليه لذلك مسألة المواكب الحسينية والتشابيه يا بعد روحي يعتبرهه أخوانك الشيعه حالهه حال العمل المسرحي الفني لتخليد ثورة الأمام الحسين(مع تحفظنا آني وياك على التطرف في بعض الأمور وهذا يتعالج بالكلمة الطيبه الهادفه الصادقه مو بالأستهزاء ولا بالتسقيط والتجريح)....
ها؟جاي تسمع هذا الصوت خارج البيت؟هذا يمكن موكب جاي بشارعكم،أخوي أريد منك تروح وتقدملهم ماي ومو شرط ماي أرو أو من التصفيه لأنه الناس خلصوا عمرهم فقر وحرمان من ايام الديكتاتورية لأيام الديمقراطيه وعادي عدهم الشرب من الحنفيه وبطريقك كَلّلهم عبارة مأجورين وعظم الله لكم الأجر وشوفلهم الطريق...يلّه أخوي ما أوصيك أخاف واحد يريد يأذيهم..
هااا خويه وينك شو تأخرت..انطيتهم ماي..شفت اشلون حَبوك وظلوا يبَوسون بيك موكَلتلك ناس طيبين وعلى نياتهم وما بيهم أي أذيه..
صدك..شفت هذا الطفل الحلو إلي يشبه طير الحمام...هذا يمثل دور عبد الله الرضيع إبن الأمام الحسين...بشرفك حتى لو كان كافر مو جريمه يجي افغاني أو عراقي أو عربي ويفجره او يذبحه؟..
حبيبي لا تخلي هذوله السياسيين(الخرنكَعيه)يفرقو نه لأنهُ وعيونك لا يمثلوني ولا يمثلوك وأنت سيد العارفين وأجوا بساعة جهل طائفيه من انتخبناهم ونتحمل اني وياك الذنب...
عزيزي اني وياك مثل الأنسان والنبات واحد يحتاج الأوكسجين والاخر يحتاج ثاني أوكسيد الكاربون لذلك تقسيم البلد يعني راح نكون لعبه بيد امريكا وايران وتركيا والسعوديه وقطر ونصير مضحكة لليسوه والمايسوه..
وحتى ما انسى تره عدنه بعد هواي اخوان من باقي المكونات بالبيت اما المسيحيين فهذوله طيور حب ولازم نشاركهم مناسباتهم مثل ما يشاركونه مناسباتنه وأن شاء الله بعد كم يوم راح ارمش عليك بالموبايل(لأن تعرف اخوك حديقه وما عنده رصيد)ونلبس ملابسنه الجديده حتى نروح نحمي أحتفالاتهم براس السنه ونحيط كنائسهم بجسمي وبجسمك أخاف أبن حرام يريد يجي يفجر نفسه بنصهم...
حبيبي السُني اموت عليك والقران بس فدوه لعينك لا تجيبلي سيرة صدام..
بقلم الكاتب والاعلامي سامر رسن الواسطي
واني اكلك ياحبيب كلبي كلامك حلو بس الختمه مالته كانت بيها ابعاد كبيره حبي انتم تعتقدون السنه كلهم صدام اذا اكو احد اذاكم فهو اتباع صدام من الشيعه اكثر من اتباعه من السنه واذا احنه انريد صدام لان كان منطي للعراق الهيبه والكل تحترمه وتحسبله الف حساب ومنطيني الي والك الامان الي هسه نتحسر عليه ؟ ولا الفقر نفس الي بل زاد؟ والسنه والشيعه واحد وماتفرقو بس السياسين هم من فرقو؟...
تحياتي الك على كلامك الرائع
رد مع اقتباس
