الصاير بيك حقك لمن تكول
الصارن بيه ما ينحسبن هواي
أنه من البيت أطلع شايل هموم
و أرد شايل هموم شلونك بهاي
لا جنحاني عانني وطرت فوك
ولا رجليه عانني أعله ممشاي
و أيدي اليسرى كصرت بعد متلوح
و أكصر منهه جا شتلوح يمناي
كلش مالي واهس والخلك خيط
وصارت زرف أبره بعيني دنياي
أذا لاكيت غيري ايجوز ترتاح
وأذا لاكيتني عاشور ملكاي
وانته تريدني أضحك ؟ أضحك شلون
وانه جم خنجر المزروع بجلاي
وميلوك الضحك للقلبه تعبان
وجرح وي دمي يفتر رايح او جاي
وانه اوداعتك مو مال ضحكات
أخصائي بجي سوتني دنياي
شلون تريدني ألكه أفياي بالصيف
وانه أبعز الشته ملكيتلي أفياي
اسنيني الحلوه شاهن جنهن طيور
وظلن كشش عمري وماكو شراي
حزني شلونه حزني أشكال والوان
شنو لون الفرح تعذرني من هاي
عليه ثوب الهموم أمفصل أفصال
وكلش على كدي ولايك أوياي
أنه أبدرس الفرح ماخذ صفر دوم
وميه بالحزن حطتلي دنياي
الناي أشكد حزين أيبجي الناس
وظل ياخذ درس من حزني الناي
ربه وياي حزني وكمت أماشيه
وتعلم حتى كام أيبات وياي .
رد مع اقتباس
