نعرض في هذا الباب بعضاً من الأكلات الشعبية القارية إضافة إلى بعض الأطباق التي تحضّرها الأسرة القارية. كانت الأكلات في قارة تعتمد على مواد من البيئة القارية كالبرغل والبطاطا والكشك واللبن والخضروات.
الصلص بحامض:
كأس من البرغل الناعم ينقع بماء ساخن حتى يتشرب الماء مع رشة ملح ثم يدعك البرغل جيداً مع 4 ملاعق طحين حتى يصبح على شكل عجينة نقطعها قسمين قسم يقطع على شكل طابة صغيرة يعني مثل شكل (الكل) والقسم الآخر بصير كبة محشية دهنة مع فلفل ودبس رمان وفليفلة حدة حسب الرغبة، اما عن صلصة الصلص مكونة من حمص مسلوق وعدس مسلوق وسلق مقطع مع بطاطا مقطعة الى مكعبات، اما بالنسبة للحمض نذوب حمض حصرم واذا في ثماق واذا ما فيى ليمون بيمشي. نترك الصلص على النار حتى يتعقد شوية وطبعا نضع كرات الصلص والكبة حتى تسلق بالصلصة، واخيراً نفرم 2أو 3 ثوم ونقليها بالسمنة ثم نسقي الصلص بها. وصحتين وهنا.
الدبابة:
كأس برغل ناعم ننقع البرغل بماء ساخن حتى ينفش، وبنسلق بطاطا وبعد نضجها تقشر وتخلط مع البرغل مع رشة ملح وتوضع على الغاز حتى تسخن، وفي مقلاية نضع السمن وإذا وجد السمن العربي أحسن وبنفرم 2أو 3حبة بصل وبنقليها بالسمن حتى يصبح لونها زهري، بنسقي السمنة على الدبابة وبنخلطها جيداً ونسكبها في طبق التقديم ونضع البصل المحمر عليها مع رشة فلفل أسود. ويؤكل الى جانبها اللبن أو صحن سلطة قارية.
العروق ببطاطا:
نصف كيلو برعل ناعم منقوع بماء ساخن حتى ينفش، ونصف كيلو بطاطا مسلوقة، و رشة ملح ورشة بهار مع 2 ملعقة طحين ونخلط العجينة ندعكها جيداً وزيادة رشة ماء اذا تطلب الامر.
الحشوة: قديماً كانوا يحشوا بصل مفروم مع رمان بس لكن ألذ اذا كان في لحمة مفرومة نضع السمن ثم نضيف البصل المقطع وبعدين اللحمة مع رشة ملح فلفل وبهار بالاضافة الى رمان ان وجد واذا في دبس رمان اطيب بكتير. نعمل العجينة على شك كبة أو على شكل العروق وهي المفروض ونحشيها وبعد ين نقلي العروق ونعمل الى جنبها شوربة عدس وسمي بالله.
لبنية الذرة:
ننقع الذرة في ماء ساخن ويفضل قبل بيوم في الليل وفي طريقة قديمة وهي نغلي الذرة لمدة نصف ساعة ثم نكمر الذرة بحرامات حتي اليوم التالي بتستوي على راحتها وتتفتح وبتصير أطيب. أو نضعها على الغاز حتى تنضج، وها الوقت بنشوي اللبن على النار طبعا اذا كان لبن الضيعة نضع معه بيضة على شان مايفرط وبنبقى نحرك اللبن حتى يغلى واذا اللبن البلاد الاخرى نضيف نشاء، ثم نضع الذرة مع اللبن حتى تغلي مع بعضها مع رشة ملح، ونعمل معها كبة عجين (شيشبرك ) والعجينة هى عبارة عن كاسة طحين مع ماء فاتر ورشة ملح نعجن العجينة ونتركها ربع ساعة حتى ترتاح، والحشوة نهوس بصلة مع السمنة واللحمة الناعمة مع رشة ملح وفلفل وحد. ونعمل العجينة دورائر على شكل قبعة، ونسلقها بالماء والملح المغلي أو في اللبن ونضيفها للذرة، وصحة وهنا .
المكمورة:
وهى نفس عجينة الكبة مؤلفة من نصف كيلو برغل مع نصف كيلو لحمة أو أقل حسب الرغبة ورشة ملح وبهار ونضع عليها الماء ونعجنها وبعدين نفرمها على المكينة حتى تصبح طرية، ونعملها على شكل دوائر متل الليرة وسمكها نصف سم، ونسلقها فى ماء وملح مغلي على النار، وبعدين نضع زيت بلدي ونقطع بصل جوانح واذا كان كتير أطيب ونهوس البصل، ونضيف المكمورة عليها ونهوسها شوية، ونسكبها في طبق التقديم مع رشة فلفل والى جنبها لبن غنم من الضيعة، أو سلطة خضار أو شوربة. وكلو مع الصحة والعافية.
الكشك بلحمة
نفرم بصلة ونهوسها على النار بعد ما نحمي السمنة أو الزيت حسب الرغبة ونضيف الكشك الكمية حسب عدد الاشخاص ونحمص الكشك سوي
مع رشة ملح اذا لزم الامر ونضيف الماء على الكشك ونتركه يغلى حتى يتعقد، اذا بدنا ناكل الكشك بالخبز لازم يكون الكشك سميك يعني بنخفف الماء، ونسكبه ونرش عليه الفلفل الاسود.
طريقة تانية:
نهوس البصلة بزيت بلدي مع 2 حبة ثوم ونضيف الكشك ونحمصه شوي وبعدين نضيف الماء ونتر كه يغلي وبكون مريء ونرش عليه نعناع يابس، ونفت فيه خبز عادي أو محمص وكتير طيب وخاصة في ايام البرد، وكانوا قديما لما يطبخوا مجدرة ويفضل منها لتاني يوم يعملوا عليها كشك.
وفي كشك بخضار نهوس البصلة والكشك نضيف السلق الجزر العدس اي من انواع الخضار المرغوبة، وطبعا الاكلة الاهم وهى الكبة بكشك، وهي الكبة المعروفة + الشكل المضاف اليه العدس الملفوف. وصحتين على الكشك وعلى الدفء بعد الكشك.
التفين:
نسلق اللحمة وبتكون مقطعة مع العظم، ونضع مع اللحمة الملح والبهار مع ورق غار على شان تروح الزنخة، ثم وبعد الاستواء نضيف البرغل الكبير طبعا عيار البرغل يعني كل كاس برغل = 3 حتى 4 كاسات ماء وخاصة اذا كان البرغل سيقي بحتاج ماء حتى ينضج وقديما قريب النضج كانوا يسقوا البرغل بالسمن العربي وبحبوا البرغل يكون ( سمح ) يعني مو ناشف ونسكب البرغل في طبق التقديم وجديدا صاروا يحطوا عليه المكسرات متل اللوز والصنوبر، والى جانبه لبن الغنم من الضيعة وصحن سلطة على الكيف وصحتين وهنا .
الصرصورة:
وهى ادق شىء من البرغل بعد ما بنخلو البرغل بمنخول واسع لتحصيل البرغل الكبير ومنخل اضغر للبرغل الصغير وبعدين منخل دقيق للصرصورة.
الطريقة :
نضع السمن أو الزيت حسب الرغبة ونهوس بصلة مع لحمة مفرومة ناعمة وبعد النضج نضيف الماء حتى يغلي ثم نضيف الصرصورة ونتركها حتى تتعقد ويتكون مريئة متل الشوربة ونفس الشي ممكن نعمل مع البرغل الصغير وحتى بدون اضافة الحمة فقط البصلة وبكون سميك شوي وفي ناس ما حطوا بصل وكل الانواع طيبة ودافية على المعدة. وعوافي للجميع.
المجمرة:
المقادير:
عجين مخمر (ربع كيلو)، و6بيضات،فلفل ملح سمنة لحمة ناعمة ان وجد.
ندهن الصينية بالسمنة ثم ندلك العجينة بالصينية سماكة نصف سم وترفع مع جوانب الصينية حوالي سم . نخفق البيض مع الفلفل واللحمة ونضع المقدار فوق العجين ونضع القليل من السمنة او الزيت ثم توضع بفرن حامي حتى تنضج أو في التنور فستجد لها طعما آخر، هذه المقادير لصينية ذات حجم متوسط يعني بحجم قالب كاتو عادي.
وهذه اكلة عجة بخضرة:
8بيضات، قطعة بطاطا مسلوقة متوسطة الحجم قطعة بندورة وقطعة بصلة، تهرس البطاطا تفرم البندورة فرما ناعما والبصلة مع القليل من البقدونس يخفق البيض مع الفلفل وتخلط جميع هذه المقادير، نضع ملعقة سمنة كبيرة في صينية بنفس حجم صينية المجمرة ونحميها على النار ونضع الخليط فوق السمن المغلي ونضعها في الفرن حتى تنضج وتقسم حسب الطلب، والف صحة وعافية.
المجدرة :
المقادير:
كاس برغل كبير، 3 كاس ماء، رشة ملح ، زيت بلدي، بصل،كاس صغير عدس. نسلق العدس مع رشة الملح بالماء وقريب النضج نضيف البرغل ونتركه على نار هادئة حتى النضج وبنكون على الطرف الاخر وضعنا الزيت البلدي على النار وقطعنا البصل جوانح ونهوس البصل حتى يصبح لونه زهري بعد استواء البرغل نسقيه بالزيت نفسه واذا كان مبحبح اطيب ونخلط المجدرة بالزيت ونسكب المجدرة في طبق التقديم ونغطي الوجه بالبصل المحمر والى جنبها مخلخل وسلطة أو لبن غنم من الضيعة .
منزلة الباذنجان مع الحمص:
أولا نسلق اللحمة المقطعة مع بصلة ونسلق حمص وبالنسبة للباذنجان اذا كان يابس أطيب بكتير اما اذا ما في بنطبخ طازج ونقطعه مكعبات ونضع المقادير في الطنجرة على النار الحمص مع قليل من مرقته ومرقة اللحمة والباذنجان مع رشة ملح ونضيف دبس البندورة وقليل من دبس الحصرم ونتركه حتى يتعقد على نار خفيفة وبنكون طبخنا الى جنبه الرز وتفضلو لعنا لاني عم يبس باذنجان حتى اطبخ هالطبخة اللذيذة وصحة وهنا .
الكبة بكشك:
المقادير:
كأس كشك قاري، أربع كؤوس ماء أو أكثر، 1/2كيلو سلق او ملفوف، وقية عدس صحيح،القليل من الثوم. الطريقة: نمزج الكشك بالماء البارد ثم نغليه على النار مع التحريك بعد ان نكون حضرنا الكبة لنسلقها به اما طريقة تحضير الكبة للذي لايعرفها مقاديرها وقية هبرة ووقية ونص برغل وبصلة صغيرة والقليل من الثوم مع بعض البهار اذا اردت. الطريقة :نطحن الهبرة ونخلطها مع البرغل وبعض الماء والبصل والثوم ونخلطها جيدا حتى تصبح عجينة متماسكة ولينة ثم نطحنهم على مكينة الكبة دورين يكفي لكبة السلق ثم نقوم بعملية الكبكبة البعض يضع حشوة الكبة دهنة والقليل من البصل والبهار والبعض يضع بدلا عن الدهنة لحمة ثم نسلقها لمدة عشر دقائق في مر ق الكشك وبعد ان ننشلها من مرق الكشك نضع ما حضرناه من السلق المفروم المسلوق ايضا او الملفوف والعدس المسلوق ايضا الى الكشك ونتركهم على النار لمدة عشر دقائق او اكثر مع التحريك واخيرا نضيف له الثوم المطحون وصحتين وعافية ويؤكل الى جانبها الكبة بصينية والكبة المشوية او المقلية وهناك نوع من الكبة هو الكبة بطحينة.
التبولة:
التبولة ورغم انها اكلة عصرية بس داخل البرغل فيها متل اي اكلة تراثية قارية، نفرم 5 جرز بقدونس فرم ناعم، 3 حبات بندورة ناعمة،3 حبات خيار ناعمة اذا بتفضلي الخس 4 -5 ورقة خس وكل الخضار يفضل فرمها ناعمة وطبعا بنكون نقعنا البرغل بماءفاتر واذا مستعجلين بماء ساخن حتى يطرى شوي مقدار كاسة شاي صغيرة ونخلط الخضار ورشة ملح ورشة خيفة فلفل مع الحمض وهو الليمون وثوم أو بصل حسب الرغبة وزيت بلدي ,نسكب التبولة في طبق التقديم ونضع تحت التبولة ورق الخس بشكل حلو وبنزين الطبق بأشكال من الخيار والبندورة وكمشة فستق اطيب واطيب.
السفة:
كأس برغل كبير نضع ملعقة سمنة على الغاز ونحمص البرغل على النار ثم نضع عليه،ماء ساخن ثم نضيف دبس بندورة ورشة ملح ونتركه قليلا
ونخرط 4 بندورة مع جرزة بقدونس ونعناع اخضر و2 حبة ثوم ونعصر ليمون حسب الرغبة،ونخلط الخليط على الغاز شوية واذا اضفنا رشة حد مع رشة فلفل زيادة الخير خير، ونسكب السفة في طبق التقديم ونضع عليها فستق والى جنبها ورق عنب أو ورق ملفوف، وهى أكلة عصرية يعني مو غداء. وألف عوافي.
^ أعلىفتة مكدوس :
المقادير: نصف كيلو باذنجان_ مرق لحم للي مابياكل لحمة أو لحمة مفروموة_ملقة حمض حصرم ورمان وبندورة أو حسب الذوق_خبز مقلي_كأس كبيرة من ا للبن مع ثوم_صنوبر ولوز للتجميل .
الطريقة:نقطع الباذنجان قطع مستطيلة الشكل بحجم 3سم ونقليه بالزيت نضع الحمض مع نصف ليتر من الماء تقريبا يغلي مع الباذنجان المقلي لمدة 10 دقائق ثم نسكبه في وعاء ثم نضع فوقه الخبز المقلي ثم نضع اللبن مع الثوم ونزينه بالصنوبر واللوز وان وجد قليلا من اللحمة المفرومة ورشة فليفلة حمرة للتزيين ايضا.
البكل:
نحضر سمون ونقطعه الى دوائر عرضها 3سم، ونصفها في صينية ونسقيها بالحليب لمدة خمس دقائق من ثم نقليها بالزيت، وبنكون عاملين قطر وهو كأسة ماء + كأسين سكر مع رشة صغيرة حمض على شان ما يسكر واذا في ماء الزهر نضع نقطتين أو رشة فانيليا ونضعه على الغاز حتى يغلي ونتركه حتى يبرد، ونغمر قطع السمون بالقطر ونشيلها ونصفها في طبق التقديم وصحتين. هى اكلة سريعة وبسيطة ولذيذة
الأقراص:
عندما يهل هلال العيد يصير وقت الأقراص، ورح نحكي عن الأقراص القديمة على طريقة جدتي لانو اليوم صارو ا يضيفوا عليها خميرة البسكويت والبيض أما متل أيام ستي على القديم فهى: 4 كاسات طحين كاس سمنة أو زبدة كاسة سكر 2كاس حليب مع شمرة ويانسون ومحلب واذا بدك جوز الهند أو اي منها+ خميرة نذوبها بالماء ونضيفها للطحين، نذوب الزبدة ونخلطها مع السكر المذاب بالحليب ونضع الشمرة واليانسون ونبلش نزيد الخليط على الطحن شوي شوي حتى تصبح لدينا عجينة لينة ندعكهاجيدا ونتركها مدة 3ساعات حتى تتخمر وبنقطعها دوائر ونتكها ترتاح ونحضر القالب الخاص بالاقراص ونضع القطعة على القالب ونمدها بالمدلك ونصفها في صينية مدهونة بالسمن، ونضعها في الفرن حتى تنضج وبعدين ما في اطيب منها مع المتة وعساكم من عواده
البسبوسة:
المقدار: 3 كاس سميد، 1 سكر، 1 جوز الهند، 2 ملعقة بكنبودر، 3 علبة قشطة (نسلة ) ونخلط العجين مع بعضه باليد، وندهن الصينية بالسمن ونسكب العجينة، ونضعها في الفرن حتى تنضج نقطعها الى قطع ونضع على كل قطعة فستق أو لوز، ونسكب عليها القطر البارد والقطر عبار عن 2 كاس سكر 2كاس ماء +رشة حمض خفيفة مع منكه متل فانيلا أو قرفة جربوها وما رح تندموا سهلة ولذيذة.
رد مع اقتباس
المشاركة الأصلية كتبت بواسطة كناري الورد
