خسرانه رجعت من هذيج امالها
جرحو احساسي السولفولي احوالها
يكولون هسه عيونها وذيج الجفون
الدمع بيهن كلشي ما خلالها
يكولون تحلم بيه رجعت من جديد
الكبل ما قبلت اضل ابالها
ثروه ما عندي وكدرت انطيها روح
عمري ما فكرت بستغلالها
الرخصتي ودورت عل يشترون
الراحت وضل بالكلب تمثالها
يكولون نبرة صوتها تحس بيها خوف
وابتسامتها الدمع يختالها
باحلامها اخطوط المخالب واضحات
موقعلها اعله الحلم جتالها
الوادعتني وراحت لكوكب بعيد
اضاهر الكوكب رفض ما شالها
الما عرضتلها ولا كلتلها ليش
كلت ميخالف تروح بفالها
العلمتني شلون اكول الله كريم
الدنيا تفتر ما تضل بحالها
الجنت الملها النده ولمتني ليل
انطيتها اعيوني وعصرت اوشالها
الجانت تغمض بخصلة مستحاي
وجنت اخاف اعيون صلفه تنالها
المثلت دور النوارس بالبياض
تلونت حته بسواد خيالها
راحت وكلبي الترف شوفها خير
او وادعتي وسوت اليحلالها
استكثرت بيه الوفه واني الوفيت
حسبت تالي الوكت يصفالها
اتصورت ينطون الاحلام ابلاش
تاخذ وما تنطي شي حسبالها
يكولون رجعت وضل بواهسها قيد
ماكو مفتاح اليفك اغلالها
واني كلتلهم بعد مابيه حيل
ابني يوميه قصر برمالها
كلولها ادور غصن توكف عليه
للخريف انطيت خصني الشالها
ارضت الدمعه كلت عصت هواي
ومهرت احساسي عثر خيالها
كلولها شال الهوه من الذكريات
والبقه من العشره بس اطلالها
كلولها ادور حلم مضمونه بي
اهواي احلام التغر اشكالها
كلولها ايكول اني ناسي من زمان
وهيه زين اتذكرت هنياله
رد مع اقتباس
