الى أمير المؤمنين عليه السلام .. بمناسبه عيد الغدير
الوذن بسمك امن ارد اكتب اعليك
انه بشدة شعر ياسيدي انخاك
جنح عصفور جنحي امن الهوى ايخاف
وانته اصكور تعجز توصل اسماك
انا محتاج حيل اجناح جبريل
خاطر يكدر اجناحي ايتعناك
احجي اويه اليحب والكلب ذاب
شلون اكدر يحيدر احجي وياك
يالشايل احزان الضلع والباب
وتضحك مولظيفك حتى لعداك
عنك أبتعد بجدام الاذنوب
وبس انخاك حاضر شدتي الكاك
أقبلني حمام بكبتك ايلوذ
لورادت تصيده اسهام دنياك
ياأول اسم مر قبل الاسماء
سمعته امن اهلي من كالو علي اوياك
اويأخر شي سمعته بلحضة الموت
هنيالك علي راح ايتلكاك
كبل من جان سعر ازيارتك موت
بعنه ارواحنه وبيهه اشتريناك
عشرتنه اويه حبك بيش تنقاس ؟
بكثر مارافك الفقار يمناك
بكثر ما جفك امشبع مساكين
بكثر ماداخلين ايتام بحماك
كبل لينزل الله العشك للناس
مربينه العشك صدفه وعشكناك
علي المابي وفه ليسولف اعليك
السوالف تحله بس للفهم معناك
الضعيف اليذكر اسمك ينترس حيل
يلاوي الدنيا كلمن تبع ممشاك
الصريفه التنتفض متكضهه الاقصور
ياحيل اليلاوي اجفوف تنخاك
علي.. كرهونه جي بسمك مجانين
وحقدوا عالورد جي عطره يهواك
للشاعر المبدع :- محمد ابو العز
رد مع اقتباس
