هنا

[yousef]

السلام عليكم ورحمة الله وبركاته
تحية طيبة معطرة من نخيل البصرة الفيحاء الى اصدقائنا في كل مكان
اخواني الاعزاء المحترمون يسعدني ويشرفني ان اكتب اول موضوع في منتداكم

اخواني الاعزاء انا بصدد انشاء موقع الكتروني وانا منشغل حاليا بتصميم الموقع طبعا هذا حسب خبرتي المتواضعة في فرونت بيج .
لدي بعض الائسلة اتمنى ان اجد اجابة واضحة وشافية لأسئلتي؟
١- في البداية هل هناك برنامج مجرب احسن من فرونت بيج لتصميم المواقع ؟
٢- كيف اتمكن من رفع الموقع الى الشبكة العنكبوتية ؟
٣- بعد ان اجد الشركة او الموقع الذي من خلاله انشر موقعي على الشبكة كيف اتمكن من دفع اشتراك الموقع علما انني لا املك كردت كارد؟
٤- بعد انشاء الموقع ورفعه على الشبكة هل استطيع ان اضيف تعديلات مثلا اجعل الموقع شات صوتي او شئ من هذا القبيل؟
٥- بعد انشاء الموقع ونشره على الشبكة كيف استطيع الاستفادة من الموقع ماديا مثلا كيف استلم اجور الاعلانات من المواقع الاخرى مثلا كوكل؟
وشكرا لكم اخواني الكرام اتمنى ان اجد اجابة شافية
اخوكم يوسف

[EvAnEsCeNcE]

شكرا الك ع الموضوع المفيد
بس الخط كلش زغير ههههه

[Samer]

شكرا إلك أخ يوسف على أسئلتك .. و إن شاء الله تلكي الاجابة الشافية

قبل ما نفكر بإنشاء موقع .. لازم عدنا فكرة شنو ملامح هذا الموقع .. شراح يحتوي على بيانات أو معلومات أو خدمات بحيث راح يجذب الزوار ؟؟

راح تسويه على شكل صفحات HTML ثابتة ؟؟ لو صفحات PHP أو ASP ؟

راح تنصب عليه مثلا منتديات ؟؟ أو تسويه موقع تحميل ؟؟ او تسويه مجلة ؟ أو مدونات ؟ او موقع اجتماعي مثل الفيس بوك ؟


الشي اللي تريد تسويه ..هو يحدد شراح تستخدم بالضبط

اخواني الاعزاء انا بصدد انشاء موقع الكتروني وانا منشغل حاليا بتصميم الموقع طبعا هذا حسب خبرتي المتواضعة في فرونت بيج .
لدي بعض الائسلة اتمنى ان اجد اجابة واضحة وشافية لأسئلتي؟
١- في البداية هل هناك برنامج مجرب احسن من فرونت بيج لتصميم المواقع ؟

الفرونت بيج .. برنامج يسويلك صفحات HTML ثابتة .. غالبا تكون هذه العملية متعبة جدا و قديمة ... الـ فرونت بيج ممكن استخدامها فقط لتعديل بعض الكودات بحيث ما تاخذ وقت معقول

ممكن تصمم بيها كم صفحة فقط .. و تكون فقط لعرض بعض المعلومات مثلا about us أو ما شابه

اما تصمم موقع ذو حجم لا بأس بيه باستخدام الفرونت بيج فقط .. هذا تقريبا مستحيل

إذا تريد تستخدم الـ PHP أو الـ ASP .. و انته مو مبرمج .. و لا اني طبعا ... اكو منتجات جاهزة و مبرمجة و كاملة (يسموها سكربتات) .. مثل منتج المنتديات هذه .مجرد تنصبها على مساحتك .. و تنطلق

المنتجات هذه أكو بيهن الغالية ... و اكو الرخيصة .. و اكو المجانية


شوف هذا الموقع إذا تحب www.hotscripts.com/ اللي يحتوي على الاف السكربتات اللي تكدر تنصبها على مساحة موقعك

بس الخيار الامثل و الاسهل ... هو مجلة البوابة العربية اللي تصمملك اي موقع مع امكانيات رائعة تكدر تتفحصها بنفسك.. بس حملها من هذا الرابط http://www.arab-portal.info/download...on=view&id=127



٢- كيف اتمكن من رفع الموقع الى الشبكة العنكبوتية ؟

اول شي .لازم عندك مساحة و دومين .. هذه الامور تكدر مثلا تشوف وحدة من شركات الهوست ... مثل www.hostgator.com
راح يصير عندك حساب FTP تكدر ترفع من خلاله الصفحات اللي انته تسويهن .. او المنتج اللي اشتريته او حملته

٣- بعد ان اجد الشركة او الموقع الذي من خلاله انشر موقعي على الشبكة كيف اتمكن من دفع اشتراك الموقع علما انني لا املك كردت كارد؟

لازم يكون عندك كردت كارد إذا تفكر بانشاء موقع .. سوي بطاقة الماستر كارد مال الوركاء .. مرتبة كلش و اشتغلت بيها . مضمونة جدا و سهلة و عملية و راح من تشتري شي ..يطلب منك المعلومات الموجودة بهذه البطاقة و تتم عملية الشراء بالاستقطاع من هذه البطاقة

٤- بعد انشاء الموقع ورفعه على الشبكة هل استطيع ان اضيف تعديلات مثلا اجعل الموقع شات صوتي او شئ من هذا القبيل؟

باوع .. إذا تستخدم الصفحات الثابتة اللي تصممها بالفرونت بيج .. تضيف التعديلات من خلال تعديل الصفحات على حاسبتك و من ثم تعيد رفعها .. بعض المنتجات توفرلك الية لتحديث المحتويات و هي شغالة على الانترنيت مثل المنتديات و ما شابه من سكربتات الـ PHP .. كل منتج و إله الية التحديث مالته.

و طبعا ..تكدر تضيف عدة منتجات على نفس الموقع .. مثل ما احنه مسوين .. مثلا احنه مشغلين منتج المنتديات .. و منتج الدردشة .. و منتج مركز التحميل.. و نكدر نضيف اي منتجات (سكربتات) اخرى نحب نضيفها

٥- بعد انشاء الموقع ونشره على الشبكة كيف استطيع الاستفادة من الموقع ماديا مثلا كيف استلم اجور الاعلانات من المواقع الاخرى مثلا كوكل؟

ممكن .. إذا الموقع مالتك يجذب عدد من الزوار ... تسوي حساب يم كوكل و تقدم application مال Google adsence .. و ممكن تتصل بالمواقع الأخرى لغرض انه يعلنون يمك بس طبعا لازم عندك عدد زوار لا بأس بيه .. و تسلسل بالكسا و كوكل .. و محتويات الموقع مالتك تطلع بالبحث .. و هذا يتطلب جهد جبير .. و بالمكان الصحيح

وشكرا لكم اخواني الكرام اتمنى ان اجد اجابة شافية
اخوكم يوسف


لا تنسى .. اللغة الانجليزية و الاجتهاد و القابلية على التعلم و استخدام بحث الكوكل .. هي عوامل مهمة اللي تساعدك بس علمود تخللي رجلك بالمكان الصحيح .. و لازم تكون عندك امكانية بالبرمجة ايضا


كللي شنو الشي اللي ببالك بالضبط ..علمود اكدر اجاوبك بصورة اكثر دقة

[DARK]

اخي العزيز اوراكل جاوبك او راح اجاوبك ايضا
و ان شاء الله تستفيد
- في البداية هل هناك برنامج مجرب احسن من فرونت بيج لتصميم المواقع ؟

اخويه حبيبي تكدر تصمم الموقع عن طريق فوتوشوب بعدين اتعدله عن طريق
فرونت بيج او تستخدم برنامج دريم ويفر كذلك هنالك الكثير من البرامج البسيطه
التي تساعد في عمل الموقع بس طبعا راح ايصير الموقع بسيط و الواجهه مالته بدائيه مو احترافيه
كذلك بامكانك دفع مبلغ من المال الى احد شركات التصميم راح ايقومون بتصميم \الصفحه الك بمقابل مادي

٢- كيف اتمكن من رفع الموقع الى الشبكة العنكبوتية ؟
حبيبي رفع الموقوع بعد شراء المساحه من احدى شركات الاستضافه
ياما تدفعلهم مبلغ من المال و يرفعو الك او يكون من ضمن الخدمه
ياما ترفعه عن طريق برنامج FTP طبعا انت راح ايكون عندك حساب اف تي بي
و حسب فكرتك مثلا اذا منتدى او موقع خدمي او موقع تقني الخ
٣- بعد ان اجد الشركة او الموقع الذي من خلاله انشر موقعي على الشبكة كيف اتمكن من دفع اشتراك الموقع علما انني لا املك كردت كارد؟
هنالك الكثير من الشركات العراقيه متخصصه بالاستضافه اذا اتريد انطيك
رقم او ايميل او الموقع لشركه اعرفها و ممكن تدفع عن طريق كروت الشخن
مال موبايل و متحتاج اي كردت كارد ولا كاش يو ولا اي شي فقط كارتات تليفون
٤- بعد انشاء الموقع ورفعه على الشبكة هل استطيع ان اضيف تعديلات مثلا اجعل الموقع شات صوتي او شئ من هذا القبيل؟
نعم بامكانك فعل اي شي تريده فقط تشتري الشات الكتابي او الصوتي و تقوم بتركيبه
و نشره ضمن موقعك
٥- بعد انشاء الموقع ونشره على الشبكة كيف استطيع الاستفادة من الموقع ماديا مثلا كيف استلم اجور الاعلانات من المواقع الاخرى مثلا كوكل؟
حبيبي بعد انشاء الموقع و نجاحه ان شاء الله
تسوي بنرات بالصفحه اذا شايفها ضع اعلانك هنا في المواقع
اذا موقعك ناجح و يجذب زوار بامكانك نشر معلومات الاعلان مثلا 10 دولار
شهرين على البنر بس طبعا لتتوقع انو تربح من موقعك قبل سنتين من انطلاقه
مدا احبطك بس هاي الحقيقه لان اول سنتين انت جديد على الشغله
و الموقع في تطوير مستمر كذلك الزوار بعدهم
وشكرا لكم اخواني الكرام اتمنى ان اجد اجابة شافية
اخوكم يوسف
حبيبي تدلل و بخدمتك بس نصيحه
قبل متفتح الموقع فكر انو انت شراح اتسوي
كذلك شوفلك احد المختصين ايصير وياك ثالثا
لتنطي معلومات الموقع الى اي احد
و اتقبل الخساره و الربح و خلي خلكك طويل
و اتعب عليه و ان شاء الله يتطور تحياتي الك و اي سؤال بخدمتك

....

[yousef]

بسم الله الرحمن الرحيم
السلام عليكم ورحمة الله وبركاته
طبعا في البداية لا اخفي عليكم ان فرحتي واعجابي بكوت فريندس واعني بذلك ادارة واعضاء لا استطيع ان اصفها لكم بسبب طيبة الناس الي موجودين في هذا المنتدى وانا متاكد ان هذه المسألة ليست جديدة على العراقيين الذين كانو ومازالو رغم كل المتاعب التي واجههوها سباقين لخدمة الاخرين واصحاب غيرة وهذا الشئ بأعتراق الغير قبل العراقي.
واحب ان اشكر واخص بالشكر الاخوان اوراكل ودارك وكل من اجابني عن موضوعي حتى الذين مروا مرور الكرام في صفحتي لهم فائق الشكر والاحترام.
اخواني الاعزاء طبعا اكيد انا ما راح انشئ الموقع وانشره على الانترنت الا بعد دراسة وتمحيص عميقين وما كان سوآلي الا لمعرفه المزيد عن انشاء المواقع والتصميم وبالحقيقة استفدت الكثير من اجاباتكم واعدكم بأني لا اتردد في اي سوآل ان شاء الله حتى يتحقق الموقع الذي سينشاء ان شاء الله بمساعدتكم المعنوية لي وان شاء الله سيكون هدف الموقع الاساسي لخدمة العراق والعراقيين .
مع فائق الاحترام والتقدير
اخوكم يوسف

[Samer]

و نحن بالخدمة اخي العزيز .. اي معلومة أو اي مشكلة تتوقف عندها.. فنحن مستعدين لمساعدتك

[DARK]

بخدمتك حبي اي وقت

[yousef]

السلام عليكم ورحمة الله وبركاته
يابة اجيتلكم بشكم سوآل ورايد جواب الهن

١- ما معنى حسابFTP ؟
٢- ما معنى ASP &PHP و هل هن لغات مثل HTML ؟

Yousef

[DARK]

السلام عليكم ورحمة الله وبركاته
يابة اجيتلكم بشكم سوآل ورايد جواب الهن

١- ما معنى حسابFTP ؟
٢- ما معنى ASP &PHP و هل هن لغات مثل HTML ؟

Yousef

وعليكم السلام ورحمه الله
هلو اخويه العزيز
حبيبي جواب سؤالك الاول
برنامج اف تبي بي صنع خصيا لرفع الملفات
من الكومبيوتر للموقع يعني من تشتري مساحه ينطوك رابط للسي بنل لوحه التحكم و باسورد
بالاضافه الى لنك تفتحه من برنامج اف تي بي مع باسورد ايضا حتى تكدر تحمل الفايلات الي تريدها الى موقعك
طبعا اني استخدم برنامج CuteFTP وهو المفضل عندي و هنالك مليون برنامج رفع بس في حال اشتريت مساحه انصح بالبرنامج الي ذكرته
خفيف و سهل الاستخدام انتهينا من هذا اذا ما فهمت اشرحلك بصوره ادق

اما السؤال الثاني
حبيبي php & ssp لغات برمجه ايضا مثل html
ايضا اذا اتحب شرح ادق بخدمتك
تحياتي

[yousef]

السلام علكيم
انا اشكرك جدا اخي العزيز دارك على هذا التوضيح وان شاء الله وصلت الفكرة
اخوك يوسف