رساله من جندي عراقي الى حكام العالم الذين يستهينون بالعراق
بيتي وبيت إبوي شلون مني تريد
أعوفلّك البيت وتگعد إبّيتي
جنسيتي العراق اوماعفت فد يوم
بجيوب الاجانب شرف جنسيتي
يمر بيه الهوى اولوما كرامه وياه
مادگ باب خشمي اولاوصل ريتي
ماماسح ظهر وأمسح ظهر فد يوم
ولاصرخت على الظلام ناعيتي
جرحي بكبر گاعي اوما شلت عكّاز
ولاشديت راسي بغير چفّيتي
گبل اچفوف اديه إتلگت الخطار
هيچ اتعلمت عالضيف صينيتي
إذا مرني الزعل وانكت عباتي بغيض
وعلي تنكت زلم عالزلم خاچيتي
انه الشلت العلم للعرب بالتحرير
وساريته العلم لليوم ساريتي
ونه راس العرب من چان عدهم راس
وهسه ذيولها اتشك ابعروبيتي
موش امن العروبه الماله شجره وياي
وأمّي الرضّعت يعرب عراقيتي
ونه سيف العرب من چانو إبلا سبف
إوصحتهم عدم من غير عافيتي
ماجرّت مواكب للملوك بيوم
لوما للنجف جرّت توابيتي
ولاثبتت عگل للعرب فوگ الروس
لوما ثابته اعله الراس بيريتي
*** *** ***
عليّه إتحزّمو من مال وكتي وياي
ونه وياهم چنت عالحلوه والمرّه
عرف منهم العالم يادماء تسيل
الأخو من الأخو لوراد يتبرّه
شسولفلك عليهم والشرف لومات
من كل القيم لومات يتعرّه
تفجيراتهم ذبحت صبح بغداد
ولاضلّت بلابل ساكنه الشجره
ولاضلت أبيّه بغير خد مجروح
ولانار بنفط ماحرگت الفقره
إوتگلي إنسه الذبح والغدر والتنكيل
وعيون الصگور إمن الزعل حمره
شلون تريد ننسه المذبحه بيومين
وإنكف الدموع ونلجم العبره
وإحنه حسين عدنه إوثلّته السبعين
الف عام وكسر وجروحهم خضره
إبمواثيق الشرف ماريد حيّه تنام
وكل يوم بوطنه النار مستعره
دوّرلي ظلع ضل عدنه مامكسور
حته اقنع خرافه إبقصّة الزهره
إودوّرلي ملك مايدعم الارهاب
إودوّرلي عقل ماگاطع الشعره
واذا گتلي عليمن صبرك إوموتاك
بأطراف الشوارع جثث منتشره
علمني علي ماخون بلّي يخون
ومثل الفجّرك لتصير وإتفجره
وعلمني علي ماشيل ضدهم سبف
عن لا تنكشف لرجالهم عَوره
كلها إتوضّحت ماباقي شي مدفون
والسر انكشف وإنفتحت الشفره
أنه بحاجة زلم عدها العراق إيمام
وچف الضرب خد إيمامها إتبتره
ونه بحاجة زلم تحمي العراق اليوم
موتذبح جنوده وجيشها إتكفره
ونه بحاجة زلم بالشده كون وياي
موتشبع خبز وتخون بالسفره
ونه بحاجة زلم ترفع علم بغداد
مو ترفع اعلام القاعده القذره
ونه بحاجة زلم تعلن حلف وياي
موتعلن حلف وي جبهة النصره
أنه الرافض القسمه ورافض التقسيم
ونه عندي النجف تعنيلي سامرّه
ونه عندي العراق الباب والمحراب
واحد من شمال دهوك البصره
.........
ناظم الحاشي
رد مع اقتباس
المشاركة الأصلية كتبت بواسطة hoosam999
