حقيقة كان المفروض اخذ صور هواي .. بس الرحلة مالتي مو سياحية .. و إنما بالحقيقة دا اتخيل نفسي كـ (عسكري) .. حتى شعري حلقته قصير قبل لا اجي هنا علمود لا يتعبني هواي بالتمشيط هع
المهم .. هسة اني هنا .. بماليزيا ..(مو بالعاصمة) .. مثل ما يظن البعض .. ويمكن مثل ما اني تصورت قبل لا اجي . العاصمة بعيدة منا نسبيا يعني مسافة 45 كيلو .. اني هسة بالمدينة اللي بيها الجامعة اللي (المفروض) ادرس بيها
اها .. نعم .. اني اجيت للدراسة .. هواي يدرون بهذا الشي طبعا .. مممم اكمل ماجستير Software Engineering على الرغم من اختصاصي هو هندسة حاسوب، همزين دائرة البعثات (سيئة الصيت) ما اعترضوا.. اوي ما اريد اتذكرهم و تلعب نفسي هسة هع
مثل ما كتبت بالفيس بوك .. سويت الفحص الطبي و بانتظار النتيجة علمود اكمل اجراءات التسجيل بالجامعة ... هذه الخطوة المهمة اذا نجحت يعني راح ابقى هنا اكمل 11 شهر عل اقل قبل لا اجي .. و إذا فشلت لا سمح الله (لسبب أو لآخر) راح ارجع للعراق خلال شهر بنفس التذكرة الـ two way و نعود كما كنا (موظف ورة المكتب، وادور بس عزومات وزيادات بالراتب عااا)، المهم هسة اني "دايح" على كولة هذا النائب بالبرلمان .. لحد يوم الثلاثاء
بس بالحقيقة مو ما عندي شغل وعمل ... فريت المدينة اللي اني بيها و اللي بيها الجامعة (و اللي هي يجوز بكد بغداد) ادور على سكن ، اتبعت الـ "طريق الصعب" لان حاولت اعتمد على نفسي بالبحث، .. بالانترنت و خرائط كوكل، و المعاينة على ارض الواقع، اجرب الباصات ، الطرق، اشوف النماذج مال الشقق و المجمعات السكنية، الخيارات كلش هواي .. بس انته لازم توفق بين السعر، و البعد عن الجامعة و كونها على طريق الباصات او لا، و بعد ؟ مؤثثة لو لا ، البناء قديم لو لا ، يمك اسواق لو لا ... اخر شي .. تعاقدت على شقة اليوم وبكرة انتقل إلها (لأن هسة بالفندق)
بماليزيا .. لا احد يتصور الامور كلش توب .. ابد مو سهلة المسألة .. اذا محد معتمدك (جاي قبلك ومرتبلك) لازم تعتمد على اللغة مالتك ، و اذا مو قوي باللغة احسنلك ترجع .. اني زين نسبيا، وتعمدت أنه (ما اعتمد على احد) بس تعبت ..بس حصلت نتائج رغم ذلك.
الاكل هنا .. سبايسي هع.. يسولفون عل هند يكولون اكلهم حار .. عمي تعالوا هنا و شوفوا ههههه .. عل عموم بديت (شوية شوية) استسيغ الاكل (خصوصا من تجوع) اكو مطعم ماليزي هنا بصف الفندق.. كلشي تريد بيه بس الاكلات كلها ماليزية ... و الظاهر الماليزيين يحبون اكلهم لان ياكلوه بشغف
الماليزيين طبعا شكلهم اسيوي عيونهم مسحوبة ، البنات كصار وضعاف، و الولد كصار وسمان خخخ يشتغلون من ساعة 8 الصبح إلى ساعة 5 العصر (وقت الغداء ساعة من 1 إلى 2) عدهم سبت واحد عطلة، الشعب هنا فقير نسبيا .. بس بالنسبة للسائح او الطالب اللي يريد يحصل كل اللي يحصله بالعراق الامور غالية
الجو مو كلش حار بس رطب .. البحيرات والمناطق الخضراء بكل مكان .. تمطر مطر غزير فجأة .. وبعدين تسكت ووو .. كافي بعد عطشت .. خللي اروح للمطعم الماليزي اشرب عصير هسة ههههههه
سوري مرة ثانية لان بس صور للاكل اخذت .. تعرفون هذا اهم شي عندي قبل الطبيعة والسياحة ههههه .. عل ايام الجاية اخذ صور لمناطق رائعة إن شاء الله ..بس لحد اليوم اني "عسكري" بعدني مو طالب
رد مع اقتباس
