مبارك: الكويت والسعودية دفعتا لمصر 4 مليار دولار بحرب الخليج
في حرب الخليج "اداني" الملك فهد 2 مليار ونصف مليار دولار والكويت "إدوني" مليار و300 مليون دولار. "ده " غير 500 مليون دولار قالوا "اشتروا بيهم اللي انتوا عاوزينه وهاتولي الشيكات وأنا أدفعهم" .
بغداد/ متابعة المسلة: أكد الرئيس المصري السابق حسني مبارك في جزء ثالث من التسجيلات التي نسبتها اليه صحيفة "اليوم السابع" أن الزعيم الليبي الراحل معمر القذافي وصلت ذروة خلافاته مع العاهل السعودي الملك عبدالله بن عبدالعزيز إلى تأجير قاتل لاغتياله. وقال "القذافي ده كان باعت واحد يقتل الملك عبدالله... وإحنا مسكناه... الواد جاي وبعتله الفلوس عن طريق شركة سياحة من السعودية هنا...
علشان يصرف منها. رحنا عرفنا الموضوع فجبناه. فكان عايز يسافر تاني السعودية ومسكناه. ومنعناه ومرضيناش نسفره السعودية. القذافي طلب يزوره. وقالنا إنتوا منعينه ليه من السفر. فرديت: إحنا منعناه علشان متقتلوش وتجبلنا مصيبة كلنا. بصراحة كده فراح سكت منطقش".
وعن رئيس الامارات الراحل الشيخ زايد بن سلطان آل نهيان، قال"ده كان مِدي قرض لروسيا أيام حرب الخليج بمليار يورو. فقلتله عايزين نشتري طيارات هليكوبتر بيهم من روسيا. طيارات قوية. مسألش ليه ولا بكام. على طول قالي نفذ. وأيام حرب الخليج شفته كانوا شاريين طيارات إيرباص من فرنسا فراح باعهم وإداني بيهم معونة 9 مليارات دولار موجودين في البنك المركزي في حساب الدولة. وهما دول اللي بيقولوا إني أخدتهم. مع إنهم موجودين في البنك المركزي يعني ملك الدولة". ويضيف "الشيخ زايد كان يحولي على البنك المركزي مش على بنك تجاري.
والبنك المركزي ميفتحش حساب خاص لحد. وجيه بتاع النيابة بيحقق برضه. قولتله إنت عاوز إيه. شوف أنا هقولك على كل حاجة علشان ترتاحوا هقولك اتحول من السعودية كام ومن فلان كام ونرجع الفلوس بقى. قالوا لي لا إنت كده تعمل أزمة في الاحتياطي النقدي في البلد. فقلت لهم طيب أو مال إيه الله يخرب بيتكو انتو عاوزين تطلعوني حرامي".
وكشف مبارك أيضا أن وزير التجارة والصناعة السابق رشيد محمد رشيد كان هو مهندس عملية "الكويز" والتي من خلالها تسربت إسرائيل إلى الصناعة المصرية. وقال "رشيد قعد يقولي خلص خلص ولزق في الكويز. لكن أنا في النهاية أخذت اللي أنا عايزه. أنا كنت عايز أصدر ومش عايز منهم حاجة والبعد عنهم - يقصد الإسرائيليين - غنيمة وضحكت عليهم".
وعن المشير السابق محمد عبدالحليم أبوغزالة، اوضح "أبوغزالة قال لي في أحد الأيام وفور عودته من زيارة إلى أميركا. أنا وافقت على طلب الأمريكان ببناء قاعدة عسكرية وهيزودولنا 200 مليون دولار في المعونة. فقلت له تراب البلد ميسويش ملايين الدنيا". وأضاف "بعدها جالي وفد من الكونغرس الملعون بيقولي إحنا عايزين نخفض المعونة العسكرية من مليار و 300 مليون دولار إلى 700 مليون. قولتلهم ديه فلوسكو عايزين تاخدوها خدوها".
ووصف مشروع "النهضة" الذي قدمته جماعة الإخوان برنامجا انتخابيا لمرشحهم رئيس الجمهورية السابق محمد مرسي بأنه "أكبر كذبة في تاريخ مصر وخطورته تأتي من عملية تمويل المشروع من دول عربية أو شركات أجنبية". وتابع "أنا كنت بلف الدنيا وبجيب فلوس: ومبطلبش ومبشحتش زي الكلام اللي قاله القذافي ده مبارك كان بيشحتلكوا فلوس. أنا فاكر الملك فهد (ملك السعودية الراحل) بعتلي مرة 200 مليون دولار في 1989. كنت في استراحة برج العرب لقيت البنك المركزي بيقولي اتحولنا مبلغ 200 مليون.
كلمته قالي أنا عارف اللي عندك. الدنيا عندكو صعبة شوية". وأضاف "وفي حرب الخليج إداني 2 مليار ونصف مليار دولار والكويت إدوني مليار و300 مليون دولار. ده غير 500 مليون دولار قالوا اشتروا بيهم اللي انتوا عاوزينه وهاتولي الشيكات وأنا أدفعهم. ده الملك فهد. أيام ما كانت الملايين ملايين مش زي دلوقتي". واوضح "الأمريكان كانوا زمان بيعملولي حساب.
رغم إني مرضيتش أديهم ولا قاعدة عسكرية ولا حاجه إطلاقا. وطلبوا مني كثيرا وحاولوا معايا محاولات رهيبة. بس أنا مبعلنش ده علشان محدش يزايد عليا. وبسلط عليهم الإسرائيليين بستغل الإسرائيليين... يعني ارييل شارون (رئيس الوزراء الاسرائيلي السابق) كان عندي مرة وبيقولي عايزين ننشط التجارة بينا. قولتله انتوا اللي موقفين. التجارة كانت نشيطة أيام اسحق رابين (رئيس الوزراء الاسرائيلي الراحل) انتوا اللي وقفتوها. كانوا عايزنا نصدر في اتفاقية الكويز من دون جمارك.
وكانوا بيشترطوا في أي صناعة بتصنعها عندك تاخد مكونات من إسرائيل بنسبة 8 أو 10 في المئة". قالي أنا هبعت النائب بتاعي يوم الخميس. جيه ومعاه موافقة بأن المصانع المصرية تصدر بالكامل من دون مكونات إسرائيلية. وبدأت مصانع العاشر من رمضان والسادس من أكتوبر وبرج العرب يصدروا لإسرائيل". من ناحيته، كشف رئيس تحرير "اليوم السابع" خالد صلاح،
أن فريد الديب محامي مبارك، أبلغ الرئيس السابق بالتسجيلات الخاصة التي حصلت عليها الصحفية، مؤكدا أن "مبارك لم يعترض على نشرها، وأن هذه التسجيلات هي أول تسجيلات تنشر بموافقة من مبارك، وبموافقة محاميه".
وأضاف خلال برنامج "آخر النهار" إن "اليوم السابع بادرت بإرسال خطاب للديب تطالبه فيه بإثبات أن هذه التسجيلات تمت بطريقة غير شرعية، وبالتالي سيتوقف اليوم السابع عن نشر هذه التسجيلات التزاما من الصحيفة بنصوص القانون". وأشار إلى أن الصحيفة "حذفت بعض المقاطع المهمة التي قد تكون مثيرة بالنسبة للقارئ والمستمع، لكن آثرت حذفها حفاظا منها على الأمن القومي المصري، لأنها تمسه مباشرة".
رد مع اقتباس
شكرا على الخبر
