(( صلاة الحب ))
... الى وطني المثقل بالجراح
هناك امال لابد ان تلتفت لها
.. هذا لكم الامر والاطلاع.
اصبغ شيبتك
واعدل مشيتك زين
واترهدن عليهه الدنيا ماتسوى
يالمعلم الفراشه اطير
اشوفك منحني وتعبان موحلوه
الشحوب البيك هذا احساس
ليش اتطيح وانته البيت كله بساسه وبعلوه
دمك عالرصيف يخضر من تكوم
انزف لا يهمك جرحك الميطيب
انه باني عليك احلام يابو احلام
كلت لابد يرد الماحظر توه
شلك بالريح لوجنت
شلك بالطلقه لو ثارت
على اطفال المدينه المالكو دولاب
اعرفك ماتهزك نار
يبو كلب المطر سيابِِ
اكفر بالسياسه البيك
واعبد بيك اول باب
لونك موخريف الموسم شطوله
اريد انخاك كف جادر شعبنا المات
اريد بساحة التحرير اسمع النخله هلهوله
انه ماني يتيم وجفي وسع الكاع
واكدر من اثر الخدود
اشيل الصفعه بيدي متاع
ماكلك صرت ثوري
بعدني بلاجنح بسماك
بس حبك يراودني يبو ضحكه التغيب بساع
اخ الصرخه ماتطلع
اريدك ياوطن الاحزان
تضرب بالكلب مدفع
اريدك تكسر الكسروك
واريدك للوطن ترجع
انه وياك بينه من الحظاره جروح
بينه من الحنين جروح
بينه من النقاء جروح
شلك بالناس التغاويك
انت اكبر من الماشين
تعال وياي هاي الناس
ماكلهه الجهل ماتحس شنهو يصير
تعال وكعد الغافين
ماتحتاج موكب يكطع الشارع
ماتحتاج جلسه بيهه ارذل ناس
بيك تسوم بيك تبيع
وانته بايدهم ياوطن عفوا ليش
جنك يافحل ضايع
انه بيك اقسمت مرتين
مره بطيحة المقبور
ومره اليوم كلت الوطن راح يثور
بسك ذل
بسك من يمر مجهول
جوه اقرب كبر تختل
مامليت موش الحسره
صلفه هواي
وكفت بالكلب تصهل
بلاش نموت ليش وليش
انه ادري باهلنه اعله النجم غالين
ملوحتهم ترس للعيش
ارفع لافته اعله الدين اذا حسيته ماماشاك
واكسر ايد كل سكران نام ومادفع بلواك
واريدك باجر احلى تصير
بداعة تربتك ارجع
تعال وثقف الوادم
علمهم صلاة الحب
اوجب من صلاة الموت
الشاعر مهند صاحب الربيعي
رد مع اقتباس
